جە بەردەوامی کار و کۆشای ئەدەبی و فەرهەنگی و نوسیاری، ڕێکوزیا و سازی چاپ و وەڵاوکەردەیۆ (زایەڵە)ی جە مەریوان، (ئاوەزیار -٢) چاپ و وڵاوکریاوە و ڕەوانەو کتێبخانەکێ هەورامانی کریا.
بەپاو پەلیانەو (کتێبخانەو هەورامانی)، ئاوەزیار کتیبێوە زەنجیرەییەن بە شێوەی ڕێکوزیا و سەردەمیانە جە لاو سازی چاپ و وەڵاوکەردەیۆ (زایەڵە)یەوە چاپ و پەخش مەکریۆنەوە.
ژمارە یەکوو ئی زەنجیرەیە تایبەت دریان بە ئەدەبیاتی دەمواچ یان فەرهەنگی شفاهی. ژمارە دوو تایبەتەن بە ئەدەبیاتی داستانی.
چی ژمارەنە بە چڕی سەروو ڕەوتوو ئەدەبیاتی داستانی جە بەشی هەورامیەنە کار کریان. سەعیە ئانێ بیێنە بە شێوەی سەردەمیانە و بابەتیانە ئی ڕەوتە بە ئارشێو کریۆ و گنۆ وەردەسوو هۆگراو فەرهەنگ و ئەدەبیاتی.
ئاوەزیار(٢)، چند بەشێجەوێش مەگێرۆن و هەر بەشێوەش هورفشاریاو گۆشێوە جە ڕوتوو داستان نویسی هەورامی وزۆ وەروو باسی.
بەشوو یەکەمی: پەیلوای و ئەوەوانای جە وێ گێرۆ؛ ڕەوتوو داستان نویسی هەورامی، سەرنجێو سەروو داستان نویسی جیهانی، نەقدیێ چڕوپڕ سەروو ڕۆمانەو سیاوڕێحانەی، بابەتوو تەرجومەی ویاگێش دلێو داستان نویسی هەورامیەنە(بە وەرچەم وستەی تەرجومەو ڕۆمانەو چەمەکێش)، داستانە و جیاوازیی (Plat) و (Story) و....
بەشوو دووی: دیمانە و دۆنای ، دەورەگۆ(میزگرد) سەروو ڕەوتوو داستان نویسی.
بەشوو یەرێ: چند داستانێ کۆتا. 
بەشوو چواری: تەرجومەو چند داستان کۆتایا.
بەشوو پەنجی: ویرەوەری و ڕەوایەتی ئەدیبانە.
ئی کتیبە جە ١٨٠ لاپەلا هورکەوتەن و بە زەحمەتوو پۆلێو کەسا ئامادە کریان. پاییزوو ساڵەو ١٣٩٩ ک.ه، چاپ و نەشروو زایەڵەی چاپ کەردەن.
چەنی ئانەی ئی کتیبە پێسەو فایلێوە چڕوپڕی بەشێوەن جە ئارشیوو ڕەوتوو داستان نویسی، وانایشۆ پەی ئا کەسا گەرەکشانە دلێو کاروانوو داستان نویسیەنە هەرمانە بکەرا لازم و زەروورەن.

یاگۍ باسین، کە (ئاوەزیار -٢) بەهامکاری ئەنجومەنە فەرهەنگیێ و ئەدەبیە هەورامیەکێ؛ (ڕۆجیار، مامۆستا بێسارانی سنەی، نەسیمو فەرهەنگو هەورامانی)، وەڵاو کریانەوە.