جەبار یاوەر، شارەزاو کاروباری سەروازی و ئەمینداری وەڵینوو وەزارەتوو پێشمەرگەی ماچۆ: ئا جەنگەی کە تورکیا گەرەکشا چنی پەکەکەی کەرۆش هیچ مەسڵەحەتێوە عێراقیش نیا چنە و عێراق بەشێوە نییا چا جەنگەیە.
دەوڵەتوو تورکی ئینا ئاماڎەکارینە پەی ئەنجامدای هجوومێوە تازەی ئەرەگیری و پەی ئانەیچ نەک هەر پەدەکە بەڵکوو گەرەکشا حکومەتوو عێراقیچ چا هجوومە ئەرەگیریەنە هامکاریش بکەرا، سەبارەڎ پا مژاریە جەبار یاوەر ئەمینداری وەڵینوو وەزارەتوو پێشمەرگەی و شارەزاو کاروباری سەروازی و ئەمنی بە رۆژنیوزیش ئەرەیاۋنان: جە ڕوو یاسایی و دەستوورییوە ئەرکوو حکومەتی فیدراڵین سنوور و سیادەو عێراقی پارێزنۆ، بەڵام نەتاوانش ئا سنوورا کۆنتڕۆڵ بکەرۆ، چونکی هێزەکاو سنووری، بنکە و بارەگای سنووریشا نییا و نەتاوانش هێزەکاش بیاونۆ سنووروو عێراق-تورکیای.
ئاماژەش پانەیچ کەردەن، "دماو گفتوگۆکا بەینوو عێراقی و شاندەکاو تورکیای، تا ئیساتۍ هیچ نیشانېوە بەرنەکۊتەن کە عێراق بلۊنە دلۍ جەنگێوە کە مەسڵەحەتوو ئاڎیش نیا چنە، چونکی بەشێوە نییا چا جەنگیە، بەڵکم جەنگوو بەینوو تورکیای و هێزەکاو پەکەکەین، پۊکەی ئیسفاڎەش پەی عێراقی نییا بلۆ دلۍ ئا جەنگەیە جە وەختێنە چنڎین قۊرتۍ دلێینەیش هەنۍ".
ئەمینداری وەڵینوو وەزارەتوو پێشمەرگەی واتش: ئا ئۆپەراسیۆنەی، کە باس کریۆ پاسەش پەی ملوو کە ئەنجام بڎریۆ، چونکی ۋێش ڕووانە ئۆپراسیۆن بیەیش هەن و بە بەردەوامی جە ساڵەکاو ٩٠یۆ تا ئیساتۍ چنڎین ئۆپراسیۆنۍ بیێنۍ، بە تایبەتی ئی ئۆپراسیۆنەی، کە پنەش وچیۆ چنگی قوفڵ جە ٢٠١٩ بەردەواما بە هێزی ئاسمانی و زەمینی، حەرپاسە هەلومەرجەکۍ دلۍ تورکیای نیەنۍ مەسڵەحەتوو ئاکەپەینە، دیارا سیاسەتوو ئاکەپەیچ جە سەرەتاوە غەڵەت بیەن، چانەینە ئاژەو ئیساتۍ ئاکەپەی، حکومەتوو تورکیای یاردیدەر نەبۆ، کە ئا ئۆپراسیۆنەیە ئەنجام بڎۆ.
جەختیچش کەردۆ، کورد "مشۊم تەرەفوو ئاشتیی بۆ، ئا قۊرتۍ کە هەنە مشۊم سەروو مێزەو گفتوگۆیۆ چارەسەر بکریۆ نەک بە جەنگ".
