بە پاو ئەرەیاوناکەو ڕۆژنیوزی، تابلۆو گەشمەرڏا ئەرەیاونای ئازادی کە جە مەراسیمو ئشناسیای سەرو ڕاو سەیسایەق سلێمانینە نریارە، جە لایەنو کەسانێوە نەیاریوە مەڕیان و ئێرش ونە وەردریان
ڕۆو ٢٣ـی ئابو ٢٠٢٤ی، فڕۆکێوە بێفڕۆکەوانو دۆڵەتو ئەرەگیرو تورکی نزیک بە ناوچەو سەیسایەقەنە سلێمانی تڕۆمبێلێوە کۆمپانیاو چەتری پەی هەرمانەو میدیایی کەرد ئامانج و با مەڵامەتۆ هەردووی ڕۆژنامەنوویسێ ئەرەیاونای ئازاد “گوڵستان تارا و هێرۆ بەهادین” گەشمەرڏێ بیێ.
دماو ئانەی ژمارێوە جە چالاکی ناوچەو سەیدسادقی بە نووسراوێوە داواشا جە قائیمقامییەتو ناوچەکەی کەرد، پێسەو ڕیز ونەنییای ئا جووتسایدە کە هەر دووی ڕۆنامەنوویسەکێش چنە گەشمەرڏێ کریێ بە نامێ “جادەو ڕۆنامەنوویسا گەشمەرڏێ گوڵستان تارا و هێرۆ بەهادین”.
دماو ڕازی بییەو قائیمقامییەتو ناوچەکەی، بە مەراسیمێوە جە ١٠ـو شووباتینە پەردە سەرو تابلۆو گەشمەرڏا لابریا و شەقامەکە با نامێوە" جادەو ڕۆنامەنوویسا گەشمەرڏە گوڵستان تارا و هێرۆ بەهادین" ئشناسیا.
ئارۆ پەیامگیانو ڕۆژنیوزی جە سنوورەکە ئەرەیاوناش، تابلۆکە جەلایەنو کەسانێوە نەیاریۆ مەڕیان و سۆچیان.
یاگێ ئاماژەینە لواشۆنیرە جە لایەنو ڕۆژنیوزیۆ سەرو ئا کردەوەیە جنی ڕاوەبەرا ناوچەکەی تا ئیسە ئەنجامێوەش نەبییەن.
