جەمیل بایک هامسەرۆکو کەجەکەی، جەژنەو نەورۆزیش وەنەو گەلاو نەورۆزی مەبارەکە کەردە و ئەرەیاوناش، دەوڵەتو تورکی بە هامکاریی ناتۆی نەتاواش کوردی بەرۆ دلێنە، ئیساتێ گەرەکشا بە هامکاریی پەدەکەی و دەوڵەتو عێراقی پیلانێوە تەرسناکە دژو کوردی بگێڵنۆ.
جەمیل بایک، هامسەرۆکو کۆما جڤاکێن کوردستان-کەجەکەی، ئاهەنگو مەبارەککەردەی جەژنەو نەورۆزینە بنارو قەندیلینە پەیامێوە ڤیدیۆییش پێشکەش کەرد.
تەماموو پەیامەکەو جەمیل بایکی، هامسەرۆکو کەجەکەی ئینەن:
گەلاو نەورۆزی، نەورۆز و ژیوای ئازادتا مەبارەک بۆ، ئی نەورۆزە هاموەخت ڕەمەزانیچا، مانگەو ڕەمەزانی مانگێوە مەبارەکەنە، پا بۆنەوە من مانگەو ڕەمەزانی ونەو گردو گەلو کوردی و گلێرگەی موسڵمانی مەبارەک مکەروو، پێسە مزانیۆ وەختێو ڕابەر ئاپۆ بناغەو پەکەکەیش نیارە نەورۆزنە بێ، چونکوم ڕابەر ئاپۆ تارێخو گەلو کوردی و هەقیقەتو گەلوو کوردیش پەی وێش بەبنەما گێرتەبێ، پەوکای پەکەکە ڕۆو نەورۆزینە مەرزیارە و چا ڕۆوە تا ئیساتی ڕابەر ئاپۆ کۆشیای ئازادی و یەکسانییش پەی گەلو کوردی و ئینسانیەتی کەردەن، ڕابەر ئاپۆ پەی ئازادیی گەلو کوردی و ئینسانەیەتی گرد چێوێوە وێش پێشکەش کەرد، پەی شەخسو وێش هیچش ناستۆ، پەوکای من جەژنەو نەورۆزی وەنەو ڕابەر ئاپۆی مەبارەک مکەروو، پێویسا ئی نەورۆزە بۆ بە نەورۆزو ئازادیی جەستەیی ڕابەر ئاپۆی، هەر چوارپارچەو کوردستانینە وەنەو گەلەکەیما، چا کوردا کە بەرو وەڵاتیوە مژیوا، جە دۆساو گەلو کوردی، گردو هامڕایاو زیندانی و گردو ئا هامڕایا کە دلێ ڕیزەکانو گەریلاینە کۆشیای کۆشیا، نەورۆزشا وەنە مەبارەک مکەروو.
جە کۆشیای پەکەکەینە فرەو هامڕایاو پانیشتی کە دلێ ڕیزەکاو گەریلاینە کۆشیێنێ گەشمەردێ بیێ، هەڵای فرێچشا دلێ گەریلاینە کۆشیێنێ گەشمەردێ بیێ، هەڵای ئانێچ دلێ ڕێزەکاو گەریلاینە کۆشیا هەنێ سادق عومەر، عەلی شەعبان، ڕەئوف ئاکرێی، حسێن سورچی، جوتکار، دکتۆر سیروان، هەڤاڵ هەڵـمەت، هەڤاڵ ڤیان سۆران، چاوڕێ، دەستینا، شۆرش گەرمیان، هەڤاڵ هەڵمەت دێرەلووک، گەشمەرداو هیرانی، ئا گەشمەردێ چی دمایۆ گارەنە گەشمەردێ بێی، گەشمەردە دکتۆر سەبری، شەنگالنە و وەرنیشتنە گەشمەردێما بێنێ، کەسایەتیی ئا گەشمەردانە هەموو تەماموو گەشمەرداو کوردستانی یاد مکەرووە و ڕێزوو وێمشا پێشەکەش مکەروو، ئا وەعدە ئێمە بە گەشمەرداما دابێ ئەوەخوایش کەرووە و پۆشۆ پابەندێنمێ.
مانگەو ئاداری پەی گەلو کوردستانی گرنگا، چی مانگێنە پانیشتنە کۆکوشیی هەڵەبجەی ڕووەش دێنە، وەرنیشتنە کۆکوشیی قامیشلۆی و عەفرینی ڕووەش دا و سەرنیشتنە کۆکوشیی ئەستەنبوڵی مەنتێقەو گازینە ڕووەش دا، پەوکای ئی مانگێ گرنگەنە، هاموەخت حەر چی مانگێنە گەلەکەما پانیشتو کوردستانینە دژو ڕژێمو سەدامی ئەرەپڕێ، ئەرەپڕاکەیچەنە ئەنجامشا ورگێرت و ڕژێمو سەدامیشا کوردستاننە زنیۆ، ئا ئەرەپڕایە مەنتێقەو زاخۆ و دەرکارو ئەرەپڕاینە بە سەرمەشقیی سادق عومەری و هامڕا لوقمانی وەڵێ کەوت، ئا هامڕا خەڵکو وەرنیشتو کوردستانی بێ هەرپاسە ئەندامی ناوەندیی پەکەکەی بێ، ئا هامڕێ یۆوە ئەرەپڕایشا کەرد هاموەخت ڕانیەیچنە ئەرەپڕای وەڵێ کەوت پاسە ئەرەپرای ئەنجامش گێرت، پا بۆنەوە من مەبارەکبایی وەنەو گەلەکەیما مکەرو کە بە ڕۆحو نەورۆزیوە مدرامانشا کەرد و ئەنجامشا گێرت، ڕێزو وێمشا پێشکەش مکەرو، گەلو پانیشتی گەلێوە وەڵاتپارێزنا بە ساڵان کۆشیایشا کەرد و قوربانیی فرەشا دا، ئا وەڵاتپارێزنییە، کە گەلەکەما کەردەنشا بییەن بە نموونێوە و گەلو کوردی ئیسفادەش چەنە کەرد.
وەختو دەوڵەتو عوسمانیینە پەی ئەوەڵ جاری میرنشینو بابانی سلێمانینە دژو دەوڵەتی عوسمانی ئەرەپڕێ، چا وەختۆ تا ئیساتێ گەلەکەما کۆشیای ئازادیی مکەرۆ، حەرچندە کۆشیای بەئازار بۆ و قوربانییش گەرەک بۆ، بەڵام گەلەکەما دەسش جە کۆشیای وێش وەرنەدان، هیچ وەختێوە سەرەشا ئاستوو ئەرەگیرکەرانە شۆڕ نەکەردەن و بەڵکوم بە پێچەوانەوە بەکەرامەتەوە ژیێنێ، تارێخنە نەبییەن هیچ نەتەوێوە نیا پێسەو کوردی پاسە درێژمەودا پەی مافەکاش کۆشیابۆ و هیچ نەتەوێوە نیا پێسەو کوردی قوربانییش دێبا پەی ئازادیی وێش، ئانەیچە ڕاسیی گەلوو کوردی نیشانە مدۆ، کە کورد هیچ وەختێوە کۆیلایەتی و بندەسییش قەبووڵ نەکەردەن، هەمیشە جەخت جە ژیواێوە ئازادی مکەراوە.
گەلوو قەندیلی پەی گردو کوردا نموونەن، چونکوم قەندیل یاگێ کۆشیای ئازادی و دیموکراسیین، گەلو قەندیلی پەی ئێمە شەرەفێوە بەڕوومەتا، قەندیل تارێخێوە بەکەرامەتا، گەلو قەندیلی فرەش خزمەتوو شۆرشو کوردستانی کەردەن، مام جەلال، نەوشیروان مەستەفا و عەبدولڕحمان قاسملۆ قەندیلنە ژیوێنێ و کۆشیای ئازادییشا کەردەن، پەکەکە نوێنەرایەتیی شەرەفو ئەو کۆشیایە تارێخییە مکەرۆ کە قەندیلنە کریان، پەکەکە نوێنەرایەتیی ئا گەشمەردا مکەرۆ، کە کۆشیایشا کەردەن.
دەوڵەتو تورکیای فاشیست ئەرەگیرکاریی سەرو پانیشتو کوردستانیوە مکەرۆ، پێسە مزانیۆ زیاتەر جە ٥٠ هەزار سەروازێ تورکیای ئەرەگیرکەری چا هەنێ، ناوەندی سەروازییشا وەش کەردەن، ڕاشا وەشەکەردێنە، ئانە چێشما نیشانە مدۆ؟ بێگومان دەوڵەتو تورکیای گەرەکشا پانیشتو کوردستانی ئەرەگیر بکەرۆ، گەلو پانیشتو کوردستانی بکەرۆ نا بە کۆیلە، دەسکەوتەکاو گەلو کوردی چی پارچەو کوردستانینە بەرۆ دلێنە، ئامای دەوڵەتو تورکیای پەی بۆ پانیشتی بە تەمامی سەروو ئا بنەمێنە کە ئاماژەم پەنە کەرد، دەوڵەتو تورکیای ئیسفادە جە بنەیانەو بارزانی مکەرا، ئەگەر دەوڵەتو تورکیای سەرو پانیشتو کوردستانیوە ئەرەگیرکاری بکەرۆ، بێگومان جە ڕاو یانەو بارزانییەکاوە مکەرۆش، گەلەکەما گرد ڕوێ ئا ئەرەگیرکارییە موینۆ، دژو ئا ئەرەگیرکارییە گەریلاکاو پەکەکەی گرد ڕوێ کۆشیای کۆشیا، ئیمکانو گەریلای فرە نیا، بەپێچەوانەوە ئیمکانو دوڵەتو تورکیای و یانەو بارزانیی فرەن، گەریلاکاو پەکەکەی پەی گەلو کوردی پەی کوردستانی پەی ئازادیی ژیوای کوردی ژیوای وێشا پێشکەش کەرا، دەسوو گەریلاینە تەنیا فکر، چەک و ئامانج هەنێ، پانەیچە دژو ئەرەگیرکاری و خاینا مردا و وەرگێریی ئەرەگیرکەرا کەرا، ئاستەنگشا پەیوەش کەرا و نمازا پیلانەکێشا سەر گێرا.
گەریلا هەلومەرجی فرە زەحمەتنە داستانێ تۆمار مکەرا، گردوو دنیێنە نموونێوە چینە نمەوینی، بەڕاسی گورزی گەورە وەنەو ئەرەگیرکەرا مدانێ و ئەرەگیرا تێک مدا. دەوڵەتی ئەرەگیرکەر و قڕکەر، گرد جۆرە چەکێوە دژو گەریلای بەکار مارۆ، فرۆکەی جەنگی، فرۆکەی سیخوری، تانک، چەکی کیمیاوی، بۆمبی ئەتۆمی تاکتیکی و گرد جۆرە چەکێوە پێوە بەکار مارۆ بێمردای، بەتایبەتیچ چا جەنگەنە چەکی کیمیاوی و بۆمبی ئەتۆمی تاکتیکوو بڕێ هامڕایاما گەشمەردێ بیێ، ئێمە ئا گەشمەردێچما ئەرەیاونێ و گەلەکەیچما ئا ڕاسییە مزانۆ، گەلەکەما پانیشتو کوردستانینە ئا ڕاسییە خاس مزانۆ، کە چەکی کیمیاوی چێشا، چونکوم گەلەکەما بە هەزاران گەشمەردێ و بریندارێش دێنێ هەڵەبجەنە، بەڵام سەرشۆرییشا قبووڵ نەکەرد، تا ئیساتێچ کاریگەریی کیمیاوی هەڵەبجەنە هەڵای بەردەواما، ڕەنگە بڕێو کەسێ نەزانا چەکی کیمیاوی چێشا، بەڵام گەلو پانیشتو کوردستانی ئانەی خاس مزانا، پەوکای مشۆم گەلەکەما پانیشتوو کوردستانینە پەشتگیریی گەریلا بکەرۆ، تا گەریلا خاستەر بتاوۆ کۆشییۆ و گورزی گەورەتەر وەنەو ئەرەگیرکەرا بدۆ، ئینە ژیوای وەش مکەرۆ، ئانە کۆشای وزۆ وەڵێ.
پێسە مزانیۆ گەریلا ئەنقەرەنە چالاکییش کەرد، دماتەر زاپنە چالاکییش کەرد، ئا چالاکییێ دەوڵەتو تورکیایش لەرنێوە، چونکوم دەوڵەت واچێ ئێمە پەشتەو پەکەکە-یما ماڕێنە، پەکەکە نمەتاوۆ چێو بکەرۆ،وەختێو تورکیا پاسە سیاسەت کەرێ، دلێ تورکیاینە و بەریچۆ، بەڵام پا چالاکییا گەریلا گردو دروەکاو تورکیایش ئاشکرێ کەردێ و دەوڵەت جما، پەوکای گەرەکشابێ هەقەو وێشا بکەرانێوە، پەی ئا مەبەسیچە گردوو پێویسییەکاو ژیوای گەلو وەرنیشتیشو کوردستانیشا کەردێ ئامانج بە فڕۆکەی جەنگی و سیخوری و گردشا تێک دا، چونکوم دەوڵەتو تورکیای دوژمنو گردو کوردان نەک تەنیا پەکەکە، پەوکای هەرکوردێو کە کۆشیای ئازادیی بوازۆ دەوڵەت کەرۆنەش ئامانج، ماچا مشۆم کورد نەبۆ، ئازادیی کوردی نەبۆ، کورد چا مەیدانەنە نەمەنۆ، پەی ئانەیچە هجوومێ مکەرانێ سەروو گەلو کوردی، هجوم کەرا سەرو ڕابەرو گەلو کوردی و پەکەکەی، چونکوم پەکەکە ئشاسنامە و کەرامەتو دماڕۆو کوردین، ئانێ ئاستەنگ پەی سیاسەتو تورکیای وەش کەرانێ، ڕابەر ئاپۆ و پەکەکە-نێ پەوکای سەروو پەکەکەی و ڕابەر ئاپۆی سیاسەتی گۆشەگیری، ئەشكەنجە، فشار و کوشتەی کەرا، ئانەیچ نیشانەما مدۆنێ کە ڕابەر ئاپۆ و پەکەکە، وابەسێ گەلو کوردی و ئازادیی کوردستانینێ، گەرەکشانە ئا هجوومە قڕکەرانێ، کە سەروو گەلو کوردیوە مکریانێ پووچەڵشا بکەراوە، بە جەسارەت ئا کۆشیایە مکەرا.
ناتۆ هامکاریی تورکیایش کەرد بەشش نەکەرد، یانەو بارزانیی هامکاریی تورکیایشا کەرد دیسان بەشش نەکەرد، ئیساتێ تورکیا چەنی عێراقی بڕێو پیلانێ گێڵنا، سەرو بڕێ خاڵا ڕێکێ کەوتێنێ، گەرەکشانە پیلانێوە پێوە بکەرا، دیارا ئا فشارەو دەوڵەتو تورکیای و بارزانییەکا دژو عێراقی کەردشا، بڕێ ئەنجامێشا بیێنێ، چێشما نیشانە مدۆ، ماوێوە نزیکەنە جەنگێوە گەورە ڕووە مدۆ، نیشانەما مدۆ کە هێزو پەکەکەی چندە قەوەتا، کە پەکەکە چند عاشقو کوردستانین، چندە عاشقو گەلو کوردین و چندە پەکەکە پەی ئازادیی کۆشیۆ، پەوکایئا هێزێ یۆی گێرا تا هجووم بکەرانێ سەرو پەکەکەی، تا قڕکەردەی کوردی گردو کوردستانینە تەمام بکەران، بەڵام مشۆم گرد کەسێوە ئا ڕاسییە بزانۆ، کە نمەتاوان ئا ئامانجەیە بپێکان، پێسە چەنی تارێخنە هەرچندە کۆکوشییشا کەردەن، نەتاوانشا گەلو کوردی دلێنە بەرا و گەلو کوردی تەسلیم بکەرا، چێولای بەهیچ شێوێوە مەتاوۆ گەلو کوردی تەسلیم بکەرۆ، گەلو کوردی قەرارو ئازادیی وێش دانش سەرو ئانەیچە تا ئاخر جەختش سەرۆ مکەرۆوە، گەلێوە کە قەرارو ئازادیی وێش دابۆش هیچ هێزێوە نمەتاوۆ دلێشنە بەرۆ، ئا گەلە چندە ئازارەیچ چەشۆ و قوربانیێ بدۆ، بێگومان ئەنجامو وێش ورگێرۆ.
وەک مزانیۆ، ئێمە هەڵمەتێوەما دەس پەنە کەردێبێ بە نامێ "ئازادیی جەستەیی پەی ڕابەر ئاپۆی، چارەسەری پەی دۆزو کوردی" ئا هەڵمەتێ تا ١٥و شوباتی بەردەوامە بێ، ئەنجامی خاسش بێ و گرد کەسێوەیچ دیش، ١٥ـی شوباتو ئێساڵیوە هەڵمەتێوە تەرەما دەس پەنە کەردە بە نامێ "کوردستاننە یۆبییەی گەلوو کوردی، ڕێکوستەی گەلوو کوردی وەڵێوستەین، جە ئاستی میاندەوڵەتیینە پەیوەندیی وەڵێوستەی و فشاری وەڵێوستەین پەی سەروو ئەرەگیرکەرا" پەی ئانەیچە گەلەکەما ئینا چکۆ، ئینسانی ساعیب شەرەف و ویژدان حەر یاگێوە دنیێنە بۆ هەرمانەو وێشا وەرپەرسانە بکەرا، ئەگەر ئا هەڵمەتێ بیاوۆ ئەنجاموو وێش ئانە دەوڵەتوو تورکی قڕکەری نمەتاوۆ کۆکوشی دژو گەلو کوردی بکەرۆ و ئا سیاسەتە دماییش پەنە مێ، گەلو کوردی گردو بەشەکاو کوردستانینە ملۆ سەرو ڕاو ئازادیی، ئا کۆکوشیێ سەرو گەلو کوردیوە کریا دماییشا مێ، گەلو کوردی بە زوانو وێش و بە کەرامەتو وێش سەرو خاکو وێشۆ مژیوۆ، پەوکای نەورۆزو ئێساڵی بۆ بایسو ئازادیی جەستەیی ڕابەر ئاپۆی، سەرو ئا بنەمێوە واتما ئا نەورۆزە، نەورۆزو ئازادیین، ڕاو ئێمە ڕاو ئازادیینە، کۆشیای ئێمە کۆشیای ڕۆحو نەورۆزین، سەرو ئا بنەمێوە سەرو ئا ڕۆحەیە سەرکەوتەی بەدەس مارمێ و دەسکەوتی گەورە پەی ئینسانیەتی مارۆ.
ئاخرۆ جارێوە تەر مواچوو مانگەو ڕەمەزانی و جەژنەو نەورۆزیتا مەبارەک
بژیوۆ ڕابەر ئاپۆ
بژیوۆ نەورۆز
بژیوۆ یۆبییەی گەلوو کوردی"
