جەنازەو ڕێبەر سۆیدانی کە بەشێوێوە گوماناوی جە زینڎانوو ئاسایشوو باڵاو جۆروو F و وانی گیانش جە دەسدا ، دماو گوزارشتەو توێکاری جە خەسەخانۆ ڕادەسوو بنەیانەکەیش کریا، بنەیانەکەیچ جەنازەکەشا هۆرگێرت و گێڵناشاوە پەی ماواو ۋێشا جە مەنتیقەو گەڤەروو جولەمێرگی. تا یاوای بە ماواو وێش قافڵەو جەنازەکەیش جە چنڎین نوقتۍ پۆلیسی و سەروازینە مردناشا. سەرەڕاو ئاستەنگیەکا بە بەشداری بنەیانەی و ئەنداماو ڕێکوستەکا پارتوو هەرێمە دیموکراتیکەکا (دەبەپە)ی و پارتوو یەکسانی و دیموکراسیی گەلا (دەم پارتی) گەڤەری، ئەنداماو جەمەو پەشتیوانی و هامکاری بنەیانەو زیندانیا و حکومدریایا (توای دەر)ی و سەدان کەسا، جەنازەکەش ئەسپەردە کریا.

وەڵێ بەخاک سپارایشەنە قافڵەکە جە چوارڕیانوو خەسەخانەو دەوڵەتی گەڤەرینە تەوقە دریا، پۆلیس ڕاشا نەرا جەنازەکە جە خەسەخانە و مزگینە شۆریۆ. بنەیانەکەیچ پا مەڵامەتۆ جەنازەکەشا یانەنە شۆرد.

دماو جابەجێکەردەی مەراسیمە ئایینییەکا جە قەبرسان و ئاسری بە بەشداری سەدان کەسا جەنازەکە ئەسپەردە کریا. هامسەرۆکوو دەم پارتی گەڤەری، ئەرجان سەڤمەز سەرەوەشیش جە گەلی کەرد.