گەلو کانتۆنو فوراتی بە مەراسیمێوی جەماوەری جەنازەو گەشمەردە محەمەدیانیشا بە خاکی ئسپارا. هاموەخت یادو گەشمەردە میزگین دڵبیرینێ، کە هەرێمەکاو پارێزنای مێدیاینە گەشمەردێ بییە، کریاوە.
ڕێکوزیایەکاو ڕاوەبەریی خۆسەری، گەلو کانتۆنو فوراتی و بنەیانەو گەشمەردا بە مەراسیمێوی شایستە جەنازەو گەشمەردە محەمەد (محەمەد ئەلموسا)یشا، کە ١٠و نیسانینە وەختو ڕاوەبەردەی هەرمانەکێشنە گەشمەردە بی بە خاکی ئسپارا. هاموەخت مەراسیمەکەنە، جەماوەر یادو گەشمەردە مزگین دڵبرین (فاتمە ئیبراهیم)ێ، کە ١و تشرینو یوەمو ٢٠٢١ لە ئاڤاشیننە گەشمەردێ بییە کەردۆ.
دماو دەیەقێوی ڕێزگێرتەی جە یادو گەشمەرداو ئازادیی، هامسەرۆکو فەرمانگەو کانتۆنو فوراتی، نەبۆ تەمۆ واتش: "پێویسا خاوەنداری وەنەو میراتو گەشمەردا بکەرمێن، ڕاو گەشمەردا ژیواێوی ئازادا، ئێمە گەشمەردێ فرێما دێنێ و تا ئازادییشا درێژە بە کۆشیایما مدەیمێ و درێژەدەرێ ڕێبازو ئازادیی گەشمەردە محەمەدەکانمێ."
ئاخرۆ سارا خەلیلە، سەرۆکەو مەجلیسو ژەناو پەیەدەو -کانتۆنوفوراتی وتارێوەش واناوە و واتش: "گەشمەردێ مزگینە و محەمەد بۆ بنیاتنیای گلێرگێوی ئازاد و ئاشتییێوی هەمیشەیی مدرامانشا کەرد. گەشمەردە محەمەد تاتەو یەرێ زاڕوا بێ، بەڵام پەی ئازادیی وەڵاتەکەیش گیانش بەخشا. بەڵێ بە سەدانێ پێسەو محەمەدی پەی ئازادیی کۆشیا و زاڕوەکێشا وەرو جەنازەو تاتەیشانە پەنجێ ئازادیی بەرزێ مکەرانێوە، ئینەنە ڕەمزو سەرکەوتەیما."
بە نامێ بنەیانەو گەشمەرداوە شێخ ئەحمەد حەمۆ محەمەد واتش: "گەریلێکێما سەختتەرین بارودۆخنە، کۆشیا چێش بۆ با بۆ، ئێمە خاوەنداری وەنەوگەشمەردەکاما مکەرمێ."
دمایی شناسنامەو گەشمەردەی ونیاوە و دریاوە دەسو بنەیاکەیشۆ و بە دروشمێ و هەلهەلێ جەنازەو گەشمەردەی بەخاکی ئسپارییا.
