جەسەردەشت ژەنېوە جە تەرەف و کەسوکارەکەیشۊ کوشیا
جە دەگېوە سەربە شاروو سەردەشتوو ۋەرکەوتوو کورڎسانی،ژەنېوە جە عمرۍ کەمەنە ناچار بە هامسەرگیری کریۍ بۍ، بەمەڵامەتوو پاگېرتەیرەیش سەروو جیابیەیۊ، جە تەرەف و کەسوکارەکەیسۊ کوشیا.
بەپاو سەرچەمە هەواڵیەکا ۋەرکەوتوو کورڎسانی، ڕۊو ٢٩ و ئەیلولی، فاتیمە محەمەڎ پەناهی-ە، عمر ١٧ ساڵانە، خەڵک و دەگاو 'ماراغانی' سەربە شاروو سەردەشتی جە پارېزگاو ورمۍ جە تەرەفوو دووۍ زڕبرایاش و هامسەرەکەیشۊ بە تفەنگ کوشیا.
بەپاو ئا سەرچەما فاتیمە، ساڵۍ چېوەڵتەر بە زۊر هامسەرگیریش پنە کریان و دماو ۋیەرنای ساڵېوە گەرەکش بیەن جە هامسەرەکەیش کە مامۊزاشا جیابۊوە، بەڵام خانەواڎەکەش دژش مردېنېوە.
ئانەیچ وزیان ڕووە، ڕۊو ٢٩ و ئەیلولی، نامەبریۍ جە دەگاو ماراغانی جە تەرەف و دووۍ زڕ برایاش و هامسەرەکەیشۊ تەقەش ۋنەکریان و جە ئاکامەنە گیانش جە دەسدان.
بەپاو ئامارېوە تۊڕەو مافوو مرۊڤوو کورڎسانی، جە ٢١ و ئاداروو ئېساڵیۊ تا ئیسە، لاو کەمیۊ ١٣ حاڵەتۍ کوشتەی ژەنا جە لاو کەسووکاریشاوە جە ۋەرکەوتوو کورڎسانینە تۊمارۍکریېنۍ.
متەیرەی یاساکا ئېرانی بەپەشت بەستەی بە عەقڵیەتی پیا سالاری و سزا نەڎای تاوانبارا، حەرپاسە کولتوروو گلېرگەی پاسەش کەرڎەن ساڵانە ژمارېوە ۋەرچەم جە ژەنا جە ۋەرکەوتوو کورڎسانی و ئېرانی بەبەهانۍ جیاجیای چانیشایچ 'شەرەف'جە لاو کەسە نزیکەکاشاوە کوشیا.
