هیزی شارو دەنهاگو هۆڵەنداینە کۆبییەیۆێو مابیەنو ٢٢ەمینی جڤاتی گردینو کەنەکەینە بە دروشمو "یۆبییەی نەتەوەیی ڕاو سەرکەوتەینە جە کۆشیای ئازادی و ڕزگاریی کوردسانینە"  کریا. کۆبییەیۆکە بە بەشداریی ئەنداما، نوێنەراو پارتە سیاسییەکا، نویسەرا، ڕۆشنویرا و نوێنەرو ڕێکوزیایەکا ڕۆو دووەمینە بەردەوامییش بێ.

کۆبییەیۆکەینە دیوانی پێوەس بە هجوومە ئەرەگیرکارییەکاو دەوڵەتو تورکی، کە بەرەبەیانۆ وە سەرو هەرێمو مەتینای و هەرێمەکاو پارێزنای میدیای دەسش پەنە کەردەن ئەرەیاوناێوەش دا.

ئەرەیاونایەکەنەئە هجوومە ئەرەگیرکارییەکاو دەوڵەتو تورکی سەرو کوردستانی شەرمەزارێ کریێ و بانگەوازش وەنەو پارتە سیاسییەکا و جمیەرە کوردییەکا کەرد، کە دژو ئی هجووما بمردانێوە.  

دماتەر کۆبییەیۆکە بە وانایۆ ڕاپۆرتەو فایلاتو ساڵەکێ بەردەوامییش بێ، دماو ئانەیچە هامسەرۆکەو کەنەکەی زەینەب مورادە و ئەحمەد کاراموس قسێشا کەردێ.

پەدەکە قۆرتو وەردەمو یۆبییەی نەتەوەیین

کاراموس دەربارەو خەباتی سیاسی ١٠٠ ساڵەو لۆزانی، کە بە نامێ یۆبییەی بەینو کورداوە کریا زانیارییش وست وەرو باسی و ئانەش دیاری کەرد، پەدەکە قۆرتش پەی یۆبییەی کوردا.

کاراموس پێسەو کەنەکەی باسش جە هەوڵدایەکاش پانیشتو کوردستانینە کەرد و واتش: "پێسەو شاندو کەنەکەی گەرەکمابێ چەنی بەڕێز مەسعود بارزانی دیدار بکەرمێ. داواو وینایشما کەرد. ماوەو یەک حەفتەی هەولێرنە مەنیمێوە. جوابما نەدریاوە. دمایی گەرەکمابێ بەڕێز نێچریڤان بارزانی بوینمێ، بەڵام دیسان جواب نەدریایمێوە. داواو دیدارەکەیما چوارچوەو خەبات و هەوڵدایەکامانە پەی یۆبییەی نەتەوەیی بەشێوێوی ئەرێیی نەیاوا یاگێ. هیچ چەمەڕایێوەما وەراوەرو ئەنەکەسەی نییا، واقیعنە ئەنەکەسە بە تەمامی ئیناچێرو کۆنترۆڵو دەوڵەتو تورکی و سیخوڕیی تورکینە. پەوکای پەی خەباتو یۆبییەی نەتەوەیی هیچ چەمەڕایێوەما چەنەشا نییا."

دماتەر هامسەرۆکەو کەنەکەی زینەب مورادە پێوەس بە خەباتو کەنەکەی پانیشتو کوردستانینە قسێش کەردە. زینەب مورادە ڕەخنەش وەنەو هەڵوێستو پەدەکەی گێرت و ئانەش دەسنیشان کەرد جە سەدەی تازەنە پەی پارێزنای دەسکەوتەکاو کوردی و پەی دەسوستەی مافو ئازادی و دیموکراتیکی، یەکانە ڕاو ڕزگاریی یۆبییەی کوردان.

دماو قسێ هامسەرۆکا، کۆبییەیۆکە گفتوگۆش سەبارەت بە هەرمانەکاو ئیساتێ و ئایندەو کەنەکەی بەردەواما.