چ ڕژێموو ئێرانی و چ بەرەو «پانتورکیزمی-پارتە ناسیۆنالیستە کوردییەکا- موجاهدینی خەڵق-داعش»ی پېسە یۊی پۍ گەلاو ئێرانی و گەلوو کوردی ترسناکێنۍ، هیچ جیاوازیېوە بەینوو داعشی و ئا هێزە پڵۊسنەرانە نییا کە سەروو جاڎەکاو ئێرانینە خەڵکی بێگوناحشا خەڵتانو ۋنۍ کەرد.
تا مۍ ئاێروو جەنگوو جەهانیی یەرەمی زیاتەر بڵێسە مسانۆ، سەرەتا داعش مېڎانەکەنە پەیڎابی پەلامارۍ دڕندانۍ کورداش دا، جە ئاکاموو مدرامانوو گەلوو کوردی بە سەرمەشقایەتی گەریلاکاو پەکەکەی، داعش مەڕیا، دماتەر جەنگوو ئۆکرانیای و دماتەریچ جەنگوو ئیسرائیل-حەماسی، پېسە هەنگامەو دماتەروو جەنگی جەهانیی یەرەمی بڵېسەش سانا، چنی ئینیشا گرڎی، بەڵام مەبۆ چەمەڕاو ئانەی بیمۍ ئی جەنگە چی قۆناغەنە مرکیۊراوە.
تەقینەوە ۋێکوشیەکەو کرمانی جە ساڵیاڎوو کوشتەی شاکرېڵ و ڕژێموو کۆماروو ئیسلامیی (قاسم سڵێمانیی)نە قۆناغێوە تازەو جەنگیا، ئی تەقینەوە بی بە مەڵامەتوو کوشتەی ژمارېوە فرەو خەڵکی مەدەنیی، کۆماروو ئیسلامیی پېسە قەڵغان و ئامڕازېوە ئیسفاڎەش جە «توخمە بەهادارەکا»و ۋێش دی، دوور نییا ڕژێم ئاگاش جە ڕووەدای ئی تەقینەوەیە بیەبۆ، تەنانەڎ دوور نییا نیشانۍ و خەتېوە ئی کردەوە ۋێکوشیەیە جە لایەنوو بریکارەکاو ئیتڵاعاتیوە ئەنجام نەدریابۆ، چونکی ۋۍ بەقوربانینیشانەدای یۊن جە تایبەتمەندییە هەمیشەییەکاو کۆماری ئیسلامیی، تا پی هەرمانۍ ۋېش پۍ دەسوەردای و«حەق ئەسای» و دژە هجومی تازە کەرۊوە.
جە لېوە تەرۆ، بەرەو ئیسرائیل- تورکیا- ئازەربایجانی جە تەڵەو جەنگوو ئازەربایجانی و ئەرمەنستانینە گورزێوە کەمەر ماڕەشا جە پێگەو ژیۆپۆلەتیکیی ئێرانی جە قەوقاس شانا، جا جە دژە هجووم و ئێرانی جە ڕاو حەماسیوە یاوېنە، جەنگ جە فەڵەستینەنە پێگەو ڕژێموو ئێرانیش ۋەران ۋەر پی بەرەیە بەقووەت کەرڎ، سا پی ڕەنگەیە ئەگەروو ئانەی هەن داعشی چالاک کەرۊوە و غەزەبی جە ئێرانی گېرۆ، تەنانەت ئەگەروو ئانەی ئینا ئارانە ئی کردەوە ۋێکوشیۍ فراوانتەرۍ با، هەرچیۍ بۆ، هەلومەرجوو هەرێمیی و دلېینەیی کۆماروو ئیسلامیی بە شێوېوەن، کە ئینا سەروو لێواروو پێچواردەی و گێژاوو جەنگین پۍ دلۍ ئێرانی، چونکی کێشمەکێشوو دەسەڵاتوازانەو ئێرانی و ئیسرائیلی فیتاوفیت بیەن بە جەنگێوە ڕووت، ئی دووە هێزە سەرباروو ئامڕازەکاو ۋېشا دژوو یۊی پەلکێشوو مېڎانەکەی کەردەن
جە لېوەتەرۆ بەرەو پان تورکیزم و تورکیا و ئازەربایجان کۆماری ئیسلامیی بە کۆسپوو ۋەروو پەیاو خەریتەو نیم عوسمانیی و دوژمنوو فروانوازییەکاش جە مەنتیقەکەنە مزانۆ، ئی بەرە چ بە دەسکیسەو نۆکەرە ناسیۆنالیستە کوردەکا پېسە (بارزانیی و پارتیی) و موجاهیدینی خەڵقی و چ جە ڕاو هێزە تاوانکارەکا پېسە داعشیوە متاوۆ بەرێوە تازە دژوو کۆماروو ئیسلامیی کەرۊوە، ڕۆ بەڕۆ کێشمەکێشوو بەینوو ئی دووە بەرەیە بەگوڕتەر بۆ و چەمەڕا کریۆ دماجار بە ڕووبەڕووبیەیۆ ڕاستەوخۆی دمایش بۍ، بەرەو تورکیای حۊڵ مڎۆ جمیەری شۆڕشگێڵنیی «ژەنی، ژیۋای، ئازاڎیی» پۍ قازانجوو ۋېش پاوان کەرۆ، جا گەر بە شێوېوە وەختیچ بۆ، سەنگەو سەرهۊردای گەلاو ئێرانی مرکیارە، ئیسە ویر چانەی کەرۆوە پۍ ڕووبەڕووبیەیۆ کۆماروو ئیسلامیی، ئیسفاڎە جە ڕێبازی تەری وینۆ، چی سۆنگۆ ئەگەرش هەن هجومی ۋێکوشی و زینڎەکەردەیۆ داعشی بە پڕۆژە و ڕێبازێوە گونجیا بزانۆ.
ساڵەو ٢٠٢٤ ئاوسەنە بە جەنگی تنتەری، ئێساڵ، ساڵێوە چارەنوویسسازەنە، جا مشۊم ۋەران ۋەر پا مەترسییا پاسە هەڕەشۍ جە گەلاو ئێرانی کەرا و ئا هۊرکۊتۍ کە وەردەسېنۍ، ئاگاڎارۍ با ، ئا هەلومەرجەی جمیەروو شۆڕشگێڵنیی «ژەنی، ژیۋای، ئازاڎیی»ش ڕەنگڕێژ کەرد، ئیسەیچ بە شێوێوە ۋەرچەم بەردەواما. گلېرگەو ئێرانی وزە و جووڵېوە دلېینەی پاسشە هەن کە متاوۆ خەباتوو دیموکراسیوازانەو ۋېش بەقووەت کەرۆ، حەر ۋەروو ئی مەڵامەتیە هەم ۋەران ۋەر بە ستەمی و چەپۆکسالاریی کۆماروو ئیسلامیی و هەمیچ ۋەران ۋەر بە جەنگوازی زلهێزە جەهانییەکا و دەسکێشە هەرێمییەکاشا پەنەوازشا بە ڕێ و ڕێبازێوە جیاوازین. جا پەنەوازش بە ڕېوە سیاسیېن کە هەم ڕووبەڕوو دیکتاتۆرییەتوو ڕژێمی بۊوە و هەمیچ جەنگوازی زلهێزە جەهانییەکا و دەسکێشەکاشا.
چی چوارچێوەنە ئایینڎەو گەلوو کوردی و گرڎوو گەلاو ئێرانی لکدریاو پیاڎەکەردەی سیاسەتێوە درووسی و هەنگامېوە کردارییا چی ڕێنە.
