ئەنداموو کۆمیتەو ڕاوەبەری پەکەکەی، دوران کاڵکان، سەرنجش وست سەروو چالاکییەکاو ئی دماییەو گەریلاکاو هەپەگەی و یەژاستاری و ئەرەیاۋناش، چالاکییەکۍ گەریلای جە ساڵیاڎوو ئەرەمەرزناو پەکەکەینە، نیشانەش مڎا ساڵەو ٤٦ ەمینوو پەکەکەی چنی ۋیەرۆ.
ئەنداموو کۆمیتەو ڕاوەبەری پەکەکەی، دوران کاڵکان، جە بەرنامەی تایبەت و تەلەفزیۆنوو میدیا نیوزینە قسېش کەرڎۍ، ئەرەیاۋناش، جە چالاکییەکاو ئی ڕووا دماییەینە جە زاپ و مەتینانە سوپاو تورکی گورزەی قورسەش جە تاریخوو ۋېشەنە وارڎېنە.
دوران کاڵکان ئەرەیاۋناش، ئۆپەراسیۆنە شۆڕشگێڵنیەکۍ جە کەش و جودی تا کەش و ئامێدی و مەتینای و گرڎوو مېڎانەکا، نیشانەش مڎا، پەکەکە جە ساڵەو ٤٦ ەمینینە چنی هەنگامە منیۊو واتش، "پەنەوازەن چالاکییەکۍ گەلیچ شۊنەو ئینەی گنۆ، گەریلا چی چالاکییا بەردەوام بۆ".
هۊرسەنگناکۍ کاڵکانی پی جۆرەنۍ:
"سەرەتا بە ڕێزۆ سڵام جە مدرامانی تاریخی ئیمراڵی و ڕابەر ئاپۆی کەروو. حیچ فاڕیایۍ تازە جە ئاژەو ئیسەو گۆشەگیرینە نییا. ئەشکەنجە و گۆشەگیری و قڕکەرڎەی ئیمراڵینە پېسەنە ۋېش. گرڎ جۆرە فشارێوە سەروو ڕابەر ئاپۆی بەردەواما. داواکاری و حۊڵ و پارێزنەر و بنەیانەکا بێ جواب مەناوە یان ڕای دیسپلینیی دەسکردشا پۍ مېزاوە، ئەرەیاۋنا و حۊڵەکۍ گلېرگەی یاسایی سەبارەت بە گۆشەگیری جە لایەن و لایەنی پەیوەندیداریوە مەوینیۆ و مەژنەویۆ، ئانۍ سیستموو ئیمراڵی بەراڕاوە دەوروو یەرۍ مەیمونا گېڵنا. ئینە ئاژېوە ئاشکران، هامکاری تاوانۍ هەن. ئێمە ئینەما بە ڕۊسنی ئاشکرا کەرڎ.بەڵام ئاستوو مدرامانی تەنانەت ئی هجومایچە ۋیەرنۆ، هەڵوێست و ژیۋای ئیمراڵینە ۋېش جە ۋېشەنە مدرامانېوەن؛ مدرامانېوەن کە ڕاو ئازاڎیی و ڕزگاری بە مرۆڤایەتی نیشانە مڎۊ..
کەمپینوو ئازاڎیی پۍ ڕابەرایەتی یاوان بە ئاستێوە گرنگ
جە لېوەتەرۆ، بێگومان ئانەی پۍ ئازاڎیی جەستەیی ڕابەر ئاپۆی گرنگا، ئەرەیاۋناو هەڵمەتەو ئازاڎیی جەهانی بۍ جە ١٠و تشرینوو یوۋەمی. ئی هەڵمەتۍ پۍ گرڎ مېڎانۍ ۋەڵابیەنۆ. جە ڕاسینە فاڕیان پۍ هەڵمەتەو ئازاڎیی جەهانی، فاڕیان پۍ تەڤگەرێوە دیموکراسی. ئاستێوە گرنگش بەدەسئارڎەن. چی قۆناغەنە وەڵېکۊتەیۍ تازە چی بوارەنە ئاما ئاراوە. جە بنەڕەتەنە ئاژېوە هەن کە متاومۍ واچمۍ مرۆڤایەتی ڕووبەڕووش بیەنۊ. گەلوو کوردی و ژەنا و گەنجاو کوردی سەروو بناغەو ئازاڎیی جەستەیی ڕابەر ئاپۆی ئینۍ سەروو پەیاوە. بەهەمان شېوە مرۆڤایەتیچ ئینا سەروو پەیاوە. جە تەماموو جەهانینە. ئی هەڵمەتۍ جە ١٠و تشرینوو یوۋەمی دەسش پنەکەرڎ. سەڎان ڕێکوزیۍ پەشتیوانی و هێزشا بەخشا. ڕووانە ئەرەیاۋنای تازەو بەشداربیەی چا هەڵمەتېنە مژنەویۊ. ئا چینەی جە گرڎی زیاتەر لاو مرۆڤایەتییوە مشناسیا ئینېنۍ، ڕۆشنۋیرا و سیاسەتمەدارا و پارێزنەرا و ئەکادیمیستەکا و هونەرمەنڎا و کەسا و گرڎوو بەشەکاو گلېرگەی. گرڎوو ئا بەشا کە متاومۍ نامېشا بارمۍ مەژگ و ڕۆح و دڵ و مرۆڤایەتی بەشڎاریشا چی هەڵمەتەو ئازاڎیېنە کەرڎ. ژەنی سەرمەشقایەتیش کەرا.
جە کۆنفرانسوو جەهانی گەنجانە حەفتەی وەڵین ئینە بەڕۊشنی ۋینیا. گەنجا جە کۆنفرانسەکەنە کە جە پاریس لوواڕاوە، ئەرەیاۋناشا کە ئی کۊشیایشا گرتەن ئەستۆ و بەرەو سەرکۊتەی بەرا. واتشا: "پەنەوازەن دەموودەس ڕابەر ئاپۆ ئازاڎ کریۊ". ئینە هەڵمەتێوە فرە گرنگا. ئەگەر گەنجا و ژەنا خۊتانکەرڎەی چی هەڵمەتەیە کەرا، بەدڵنیاییوە ئی کۊشیایە گۊرە بۆ و وەڵۍ گنۊ و میاوۆ بە سەرکۊتەی. کەس مەتاوۊ ئی ڕاپیمایە مردنۆ.
ئیسەیچ ئەرەیاۋنا و بەشدارییەکۍ فرېنۍ. گلېرگەیچ ئینا سەروو پەیاوە. گەنجا و ژەنا کوردی جە ئەوروپانە بەردەوام چالاکی کەرا. حەرپاسە جە پارچەکاو کوردسانی و گلېرگەو ۋەرنیشتیچمانە بەهەمان جۆرا. حەرپاسە جە سەرنیشت چالاکییەکۍ ئەنجامدریۍ. کۊشیای بە ڕاپیمای گەملیکی بەردەوام بۍ. گلېرگە بە شێوېوە جددی هەڵوێسوو ۋېش نیشانە دا. ئاڎۍ بە ڕۊشنی بە ئەرەیاونا و کردەوەکاشا نیشانەشا دا کە چنی خۊتانکەرڎەی جە ڕابەر ئاپۆی کەرا، دژوو سیستموو ئیمراڵی و ئەشکەنجە و گۆشەگیری و قڕکەرڎەی مرداوە. ئینە فرە گرنگا.
زینڎانییەکېچ چالاکانە بەشڎاری جە کەمپینەکەینە کەرا
ئیسە دەنگ جە زینڎانەکایچۆ مزنەویۆ. جە زینڎانەکانە خودوو مەنەیۊی و ژیۋای مدرامانا. پۍ بەشداریکەرڎەی چا هەڵمەتېنە، زینڎانیا شۆڕشگێڵنی ئەرەیاۋناشا کە دەسشا بە مانگرتەی بەنۆرەی کەرڎەن، ئینۍ دلېڕاسەو چالاکییەکەینە و چالاکانە بەشداری چا کۊسیاینە کەرا. ئاڎۍ بە هەڵوێستوو ۋېشا، بە ژیۋایشا، بە هەڵوێستوو کۊشیای ڕووانەیشا بیۍ بە بەشێوە چی هەڵمەتۍ، بەڵام ئیسە بانۍ بە بەشێوە ئەکتیڤ چی هەڵمەتېنە. ئازېوە فرە گرنگ هەن کە جە گرڎ شۊنېوەنە وەڵا بۊوە. ئی ئاژە بە هەڵمەتەی جیا جیا بەردەواما. جەمەو ژەنا جە ٢٥و تشرینوو دووەمی، ڕۊو جەهانی ۋەرەنگاربیەیۆ تنوتیژی دژوو ژەنا، جاڎەکېشا پەڕ کەردۍ. داواو ئازاڎییشا کەرڎ. واتە ئا لایەنەی کە فرەتەرین کۊشیای پۍ ڕزگاری ژەنۍ کەرۆ و فەلسەفە و میتۆدو ئایدیۆلۆژی ۋېش بە ڕۊشنتەرین شێوە جە ڕاو ژنۆلۆژییوە بەربڕۆ. گرڎوو کۊشیاکاو ئازاڎیی ژەنا جە ئەساسەنە کۊشیاین دژ بە سیستموو ئەشکەنجەدای و گۆشەگیری و قڕکەرڎەی ئیمراڵی و کۊشیای ئازاڎیی جەستەیی ڕابەر ئاپۆین. ئازاڎیی ژەنۍ و ڕاسی ڕابەر ئاپۆی چی ئاستەنە یۊبیەی بەینیشا بەروزۆ.
ئی کەمپینە کەمپینوو ئازاڎین پۍ گرڎلایۍ
مەراسیمەکۍ ساڵڕۊو ئەرەمەرزناو پارتەکەی لووۍ ڕاوە. گرڎ یاگېنە خەڵک جاڎۍ و مېڎانەکېشا پەڕ کەرڎۍ. بێ گومان گرنگتەرین داواکاری کە ئاما وەڵېوە ئازاڎیی جەستەیی ڕابەر ئاپۆی بۍ. گلېرگەی کوردی بە سەرمەشقایەتی ژەنا و گەنجا جە گرڎ مېڎانېوەنە ئینەی بەربڕۆ، هەڵوێستێوە ڕۊسن نیشانە مڎۆ و ئیرادەو ۋېش بەربڕۆ. خۊتانکەرڎەی جە پەکەکەی واتە خۊتانکەرڎەی جە ڕابەر ئاپۆی و داواو ئازاڎیی جەستەیی ئاڎیی. چی ئاستەنە وەڵېکۊتەی هەن.
جە لووای ڕاوەو ئی هەڵمەتېنە ئاستێوە گرنگ سەرشهۊردان. سەرەتېوە شکۆمەندش بۍ. وەڵابیەیۊیچش چا ئاستەنە بۍ. پەنەوازەن فۆرمۍ چالاکیەکا بە پلانەی تازۍ فراوانتەر و هەمەچەشن و دۆڵەمەنتەر کریا. چی لایەنۊ گفتوگۆ هەن، نرخنای هەن، ئەرەیاۋنای هەن، جە بنەڕەتەنە حەر لایەنێوە کە بەشداری کەرۆ دۆڵەمەنڎی و جۆرێوە جیاواز زیاڎ کەرۆ. ئانۍ کە هەڵمەتەکېشا ڕێکوستە و بەردەشا ڕاوە، ئەرەیاۋناشا کە بەردەوامۍ با و واتشا "پایۍ وزمېنە قۆناغەو دووەمی". چوارچێوەکەشا دیاری کەرڎ.
ئی هەڵمەتۍ پۍ ئازاڎیی جەستەیی ڕابەر ئاپۆی و چارەسەری پرسوو کوردین، بەڵام هەڵمەتێوەنە پۍ ئازاڎیی گرڎ لایۍ، هەڵمەتێوە جەهانییەنە پۍ ئازاڎیی. جە چالاکیېوە چی جۆرەنە هەرکەس بە ۋیر و ڕۆح و دینامیزمەوە ۋېس پەروەردە و ئازاڎ کەرۆ. پۊکەی کۊشیایۍ گۊرەن پۍ ئازاڎیی، هەڵمەتەو ئازاڎیی وەڵۍ وزۆ. ئی هەڵمەتۍ کە گرڎ جۆرە چالاکیېوە جە ۋۍ گېرۆ، تەنیا بە دۊڵەمەنڎکەرڎەی چالاکییەکا بەردەوامیش پنە مڎریۆ. ئێمە پاسە مزانمۍ پی جۊرە گەشە کەرۆ. ئێمە پاسەمزانمۍ حەر بەشێوە بە بەکارئارڎەی دەرفەتەکاش بە کاریگەرتەرین شێوە، بە دۊڵەمەنڎکەرڎەیش، بە هەمەچەشنکەرڎەی و فراوانکەرڎەی شێوازوو هەرمانکەرڎەیشا، چالاکییەکا بەرۊ وەڵېوە.
ئەوەڵجارا کەمپینێوە پا جۊرە ملۆڕاوە. ئی هەڵمەتۍ، هەڵمەتەو گەلی و چېردەسانە. کەمپینەکە پۍ ژەنا، گەنجا، کرێکارا، ڕۆشنۋیرا، سۆسیالیستەکا، شۆڕشگێڵنەکا. کەمپینوو گەلا ئازاڎین، واتە ئیراڎەو گەلی نیشانە مڎۆ.
گرڎ چېوۍ مۆدێرنیتەی سەرمایەداری نییا
ئیراڎەو ئازاڎیی گەلا جە ئاستوو جەهانینە دەسوەردای جە قۆناغەکېنە کەرۊ. جە چوارچێوەو داواکاریی ئازاڎیی جەستەیی ڕابەر ئاپۆینە ۋېش بە ئامانجێوە پا جۊرەیۆ لکەدان و ئیرادەو ۋېش بەربڕیەن. حیچ ۋەربەستێوە ۋەروودەمیشەنە نییا. جە ئیسۆ ڕۊشنا تا چن گۊرە بۆ و گەشە کەرۆ. سەروو ئی بناغەیە گۊرە بۆ و وەڵۍ گنۆ. وەڵتەر قسېما کەردېنە و ئەرەیاۋنایما بیەن. جە ساڵەو ٤٦و کۊشیاینە، پېسە تەڤگەری، ئی هەڵمەتۍ جە جە گرڎ مېڎانېنە فراوانتەر کەرمۍ. ئێمە پېسە گەلێوە ئی هەرمانۍ کەرمۍ. ئێمە پېسە تەڤگەری ژەنا و گەنجا ڕەفتار کەرمۍ. مرۆڤایەتی خۊتانکەرڎەیش ۋنە کەرۆ، ئێمە پاسەمزانمۍ گرڎوو مرۆڤە چېردەسەکا جەهانی، ژەنا، گەنجا، گرڎوو مرۆڤایەتی ئازاڎی و دیموکراتیکی پاسە کەرا. بە مەعنېوە تەر یۊبیەیۍ چا شکڵیە وەش بۆ، هامپەیمانیېوە وەش بۆ، سیستموو پەیوەندییەکا، پێکئامایۍ ڕۆحی هامبەش، پێکئامایۍ هەستیاری، یۊبیەی ڕامانی، یۊگېرتەیۍ پېکمۍ. یۊگېرتەی مرۆڤایەتی... دیموکراتیکتەرین، ئازاڎیوازتەرین یۊگېرتەی. ئینەیچ بە ماناو جەهانێوە تازەی مۍ. جەهانێوە ئەڵتەرناتیڤا. پۊکەی گرڎ چېوۍ مۆدێرنیتەی سەرمایەداری نییا. تەنیا ئانۍ نییەنۍ پیلانگێڵنیی میان نەتەوەییشا پێکئارڎ و جابەجێشا کەرڎ. تەنیا ئانۍ نییەنۍ کە ٢٥ ساڵېن ئیمراڵینە بە زوڵم و ستەمۊ گۆشەگیریی بەراڕاوە. دنیا بەتەنیا جە لایەنوو ئاڎیشاوە بنیاڎ نریان. بەڵێ ئارۊ بەشێوەنۍ جە جەهانی، بەڵام بێ ئەڵتەرناتیڤ نیەنۍ. ئانۍ کە بانگەشەو ئانەی کەرېنۍ کە جەهان پۍ هەمیشەی پی جۊرە بۆ، هۊرخەڵەتیۍ. ئانە ڕووەمەڎۊ. وردە وردە جەهانێوە تازە وەش بۆ. جەهانێوە ئازادیوازا، فرە دیموکراتا، فرە تەعاجب کەرا، فرە بە جۆش و خرۆشا. ئەگەر سەرنج بڎەیدۍ، ئی هەڵمەتۍ هەڵمەتەو چالاکینە جە تاریخەنە، بە جۆش و خرۆشێوە فرۆ خەڵکی پې لاو ۋېش کېسۊنە. سەروو ئی بناغەیە سوپاسوو گرڎوو ئا کەسا کەروو کە بەشداری کەمپینەکەیشا کەرڎ و پەشتیوانیشا ۋنەکەرڎ، حەرپاسە بەنامۍ ڕاوەبەروو پارتەکەیماوە سڵام کیان و باوەڕم پاسەن جە قۆناغی ئاینڎەنە کۊسیای زیاتەر کەردۍ و بە هێزوو ۋېتا دۊڵەمەنڎتەرۍ بیدۍ و هیواو سەرکۊتەی موازوو.
پەکەکە گرڎ ساڵێوە سەرکۊتەی زیاتەرش بەدەس ئارڎەن مقارنە بە ساڵەی ۋەڵینتەری
ئێمە یاڎوو ٤٥ ساڵەو ئەرەمەرزناو پارتی پېسە جەژنەو پارتەکەی، پېسە ڕۊو مدرامانی نەتەوەیی پێناسە کەرمۍ. مبارەکبایی جەژنەو پارتەکەی و ڕۊو مدرامانی نەتەوەیی جە گرڎوو هامڕایا، بەتایبەت جە ڕابەرایەتی و هێزەکاو گەریلای و ژەنا و گەنجا و گەلەکەیما و دۆساما کەروو. گرڎوو گەشمەرڎە قارەمانەکاو پارتەکەیما، خوڵقنەراو کوردی ئازاڎی و مرۆڤایەتی ئازاڎی بەڕێز و سوپاس و وەشەسیایۆ ۋیرمارمېوە، جە هەڤاڵ حەقی قەراریۊ تا دمایین هەڤاڵاو مدرامانی تاریخی زاپی، کە ئازایانە کۊشیایشا کەرڎ و گەشمەرڎۍ بیۍ. هیواو سەرکۊتەی گەورەی پۍ گرڎوو ئا کەسا موازوو کە جە ساڵەو ٤٦ینە کۊشیای پۍ ئازاڎیی کەرا. حەرپاسە باوەڕم چانەن کە ئاڎۍ سەرۍ گنا. بەڕاسی ساڵەو ٤٥و پەکەکەی ساڵەو ئەرەکۊشای چالاکی و سەختی بۍ جە ڕوو ئایدۆلۆژیای و سیاسەت و سەروازییوە. گرڎ ئینەشا دیەن و تەجرووبەشا کەرڎەن. گرڎ ساڵێوە تازۍ پەکەکەی بی بە ساڵەو کۊشیای کە جە ساڵەو وەڵینتەری فراوانتەر و گۊرەتەر و بەقوەتتەر و پەڕ جە سەرکەوتەین. گرڎ ساڵێوە جە ساڵەی وەڵینتەرۍ زەحمەتتەرا. حەرپاسە سامان و دەسکۊتەکېچ فرېنۍ. ئینە ڕاسیېوە ڕۊشنا. ڕابەر ئاپۆ ساڵاو پەکەکەیش پی جۊرە پێناسە کەرڎ. بەڵام واتش، ژیۋای چنی پەکەکەی وەشتەرا. مرۆڤدۆسانەتەر و دیموکراتیکتەرا. ئینە ڕاسیېوە ئاشکران. چی ئاژەنە بیەو پەکەکەی ژیۋای وەشتەر کەرۆ. چنی وەشش کەرۆ؟ چونکیم ئازاڎش کەرۆ. ڕابەر ئاپۆ ۋېش ئینەش ئەرەیاۋنابۍ. واتش "ئانەی کۊشش کەرۆ، ئازاڎ بۆ، ئانەی ئازاڎ بۊ جوان بۆ، ئانەی جوان بۆ وەشەسیایچ بۆ ". ئینە پیمەرە بنەڕەتییەکەو ئېستەیۊ وەشەسیای و ڕێزیا، با ئینەی نامۍ بنیەیمۍ پیمەری ئاپۆیی، پیمەروو وەشەسیایی و ئازاڎیی ئاپۆیی.
بارۆنەکۍ جەنگی قەراروو ئێمەشا پۍ مردنای چالاکی پېسە دەرفەتێوە ۋینا
بابزانمۍ، ڕووودایە گرنگەکۍ ساڵەو ٤٥ ی چېشۍ بېنۍ؟ ئێمە بە پلانێوە لوایمۍ دلۍ ساڵەو ٤٥ی، ڕێکوستەی و ئاماڎەکاریما کەرڎ. زمسانی ۋیەرڎە جە زاپ و ئاڤاشین و مەتینا کە ناوەندۍ گەریلای بېنۍ، مدرامانېوە گۊرەشا کەرڎ. قارەمانانە جەنگشا کەرڎ و گورزەی قورسەشا ئەو دوژمنی ئەشا. بێگومان جە زمسانەنە ڕووەدایۍ نەرێنیما بۍ. جە ٦و شوباتینە بوومەلەرزېوە کۊت. ئاژېوە پەڕ جە ئێش بۍ. جە ڕاسینە ئێمە پېسە تەڤگەرێوە پۍ پەرەپنەداو هەڵوێسېوە هامبەشی پەشتیوانی، مردنای چالاکیما ئەرەیاۋنا. ئی ناچالاکییەما تا وەختوو هۊرچنیەکا درێژکەرڎۊ. ئینەیچ بەڵگەو سەروەریما بۍ سەروو ئا جەنگەیرە کە بەرېنمێش ڕاوە، ئیراڎەما بۍ پۍ کۊشیای و چارەسەرکەرڎەی کێشە گرنگەکاو جەنگەکەی. ئېمەیچ پېسە بڕۍ کەسا هێزێوە نیەنمۍ پۍ بیەی و دەسەڵاتی و مەسڵەحەتەکاما پەنا پۍ جەنگی بەرمۍ. بە پوختی ئێمە بارۆنۍ جەنگی نیەنمۍ. بەڵام بارۆنەکۍ جەنگی حۊڵشادا بە زیاڎکەرڎەی هجومەکاشا جوابوو هەڵوێسی ناچالاکی ئێمە بڎاوە و مەجالېشا پۍ ۋېشا ئێستۆ. ئا ئێشە قورسەو گەلی بەمەڵامەتوو بوومەلەرزەکەیۆ لاو ئاڎیشاوە پەشتگۊش وزیا. جە لېوەتەرۆ حۊڵشا دا قەراروو ناچالاکی پارتەکەیما و چالاکیی گەریلای و جابەجێکەرڎەی ئا قەراریە کەرانۍ دەرفەت. ئانڎە لاواز و دەسەپاچېنۍ و شۊنەو دەرفەتیرە گېڵا. بەڵام سەرەڕاو ئینیشا گرڎی، وەعدەکېما جە وەختوو ۋېشەنە جابەجێ کەرڎۍ. ئا قەرارۍ دېما جابەجێما کەرڎۍ. ئینە هەڵوێسوو ئێمەن پېسە تەڤگەرێوە.
هۊرچنیەی مژارېوە گرنگ بۍ. بی بە مېڎانوو کۊشیایۍ گۊرەی. بڕۍ غەڵەتۍ و کەموکوڵیۍ جددیۍ بېنۍ. حەرپاسە ئینە ڕۊسن بۍ، ئەنجاموو هۊرچنیەکا ڕۊشن بۍ. دیار بۍ ئەگەر بە عالی ڕێک نەوزیۆ، ئەنجامەکەش پی جۊرە بۆ. تەیب ئەردۆگان پەشتیش بە هێزوو دەسەڵاتی بەست، حەرپاسە ڕاسی جەنگەکەی و گرڎ چېوۍ بەپاو ئەنەی دیاریکریا. هۊرچنیەی چنی ئەنجامدریا، مژاروو مشتومڕیا. جە گرڎ حاڵەتێوەنە هۊرچنیېوە داڎپەروەر و یەکسان نەبۍ. پا مەعنۍ حیچ ئەنجامێوەش نەبۍ، واتە فاڕای ئیدارەو تەیب ئەردۆگانی ڕووەش نەڎا، بەڵام گورزەی قورسەشا وارڎە.
