ئەندامو کۆمیتەو ڕاوەبەری پەکەکەی دوران کاڵکان واتش: "گرڏ دەقێوە ئەوەکۆشای ئازادی ئاپۆیی ٥٢ ساڵەیما بە فرەتەرین سەختی، بە فیداکاری و بە قارەمانێتی و بە ئازای جە وەراوەرو ئاستەنگییەکانە بە گەشمەرڏەبییەی بەدەسئامان."
دماین کۆنگرەو ١٢ـەمینو پەکەکەی ئەنجامنامەو کۆنگرەو ١٢ـەمینو پارتو کرێکارا کوردەسانی (پەکەکە)ی پەی ڕاو گرڏی و گەلوو وڵاتپارێزی وەڵاکەردۆ، جە بەستەو کۆنگرەو پەکەکەینە گەشمەرڏەبییەو هەردووی گەشمەرڏێ سەرمەشقی و ئەرەمەزنارەو پەکەکەی هەڤاڵ گەشمەرڏە عەلی حەیدەر قەیتان و ڕەزا ئاڵتوونی ئەرەیاونا.
ئەرەیاوناکەی جەلایەنو دوران کاڵکانی ئەندامو کۆمیتەو ڕاوەبەرایەتی پەکەکەیۆ ونریاوە.
هورسەنگناو ئەندامو کۆمیتەو ڕاوەبەری پەکەکەی دووران کاڵکان پێوەس بە شەهادەتو عەلی حەیدەر قەیتانی و ڕەزا ئاڵتوونی پی جۆرەنە:
"ئی کۆنگرەما کە ڕابەر ئاپۆ بە ئاشکرا ماچۆنە جە ڕوانگەو ڕێکوزتەیۆ بۆنە دماین کۆنگرەو پەکەکەی. چی گۆنگرەنە گەشمەرڏە بییەو دووێ هەمڕێ سەرەتاییێ ڕابەر ئاپۆی، دووێ هەڤاڵێ قارەمانێ ئەرەمەزنارەو پارتەکەیما ئەرەیاونمێ.
گرڏ و هەمڕێیاما ئی دووە هەڤاڵا مشناسا. ڕاو گرڏی مشناساشا، گەلەکەماو، ژەنێ و جوانێ فرە خاس مشناساشا.
هەڤاڵ فواد یۆ بێ جە هەڤاڵە سەرەتاییەکا ڕابەر ئاپۆی
هەڤاڵما فواد هامشێوەو هەڤاڵا حەقی و قەرار و کەمال پیر یۆن جە هەمڕا سەرەتاییەکا ڕابەر ئاپۆی. هەمڕایێ بێ بەشداری گلێرۆبییەو بەندواو چوبووکی بی، کە پایەو ڕێکوزتە و پارتەکەیما دلێشەنە نریارە و تا گەشمەرڏەبییەیش درێژە بە هەرمانەکا ڕێکوزتەکەیش دا.
دڵسۆزی نەبڕیاوە جە بەشداربییەی حەقیقەتو ڕابەر ئاپۆی نیشانەدێ. بە ئەوەکۆشای پراکتیکی ماوەدرێژ و گەشمەرڏەبییەیش ئی حەقیقەتەشە سەلەمنا. بە خاستیرن شێوە نیشانەو گرڏ کەسیش دا کە چنین هەرگیز حەقیقەتو ئاپۆیی دلێنە مەشۆ،. دلێ ئی هەلومەرجە فرە سەخت و ئاڵۆزەینە، جە کاتێنە کە جە دلێ و چبەریش هرووژم سەرو حەقیقەتو ڕابەرایەتی و هێڵەو ئەوەکۆشایش کریێ، گرڏ کاتێ بەبێ دوودڵی جە دیمو حەقیقەتو ڕابەرایەتینە مردێ، سەرو بنەماو هێڵەو ڕابەرایەتی هەڵوێسش نیشانەدا و ئەوەکۆشایش بەرد ڕاوە.
بە گرڏ و هێز و هونەری وێشۆ جەختش سەرو ڕێکوزتەی، پەروەردە و ئەوەکۆشای پراکتیکیما کەرێوە. کاریگەرییێ فرەش ئینا سەرو ڕەنجدانەکاماوە. جە ڕوانگەو هۆشمەندی تیۆرییۆ، جە ڕوانگەو هەستو شۆڕشگڵی وڵاتپارێزییۆ، جە ڕوانگەو هەرمانەی پراکتیکی، ئازای و فیداکارییۆ گرڏ کاتێ هورگێرو هەڵوێسێوە پەروەردەکاری و سەرمەشق بێ. گرڏما گەواهیدەرو ئی هەڵوێسەینمێ. جە گرڏ بوارێوەنە هەست و فکرەکا بەڕێبازی جیاواز بەربڕۆنە. نەک حەر ئانەی هامکاری ئەدەبیاتی پارتەکەیما کەردەنش، بەڵکوم خودو وێش چنی ڕابەر ئاپۆی دەسشا پنەکەردەن و پەرەش پنەدریان. ئیسە سەرو ئی بنەمێ قسێ مکەرمێ، یاومێنە و، وانمێوە، منویسمێ، بیمێ خاوەنو مۆراڵی، گۆرانیێ و شیعرێ ماچمێ. گرڏ و ئینیشا بە دەستپێکێوە چی جۆرە ئامێ ئاراوە، یۆ چا هەڤاڵا کە سەختییەکا قۆناغو دەسپنەکەردەیش چەشت، دەسپنەکەردەو هەڤاڵ قەیتانی بێ چنی ڕابەر ئاپۆی.
جارێوە تەر بە ڕێز و وەشەویسیۆ یاڏش مکەروە.
هەڤاڵ ڕەزا نوێنەرو کەسایەتی کەمال پیری بێ
گرڏ و هەڤاڵا فرە بەعالی هەڤاڵ ڕەزای مشناسا. کاتو گرووپی سەرەتایینە جە ئەنقەرەنە بەشدار بێ، جە گرووپەکەنە یاگێش گێرتە، جە گەشەکەردەی بە تەڤگەری و بنیادنیاو هێڵی چالاکیینە هامکارییێ گۆرە جە بە‌هێزبییەو ئەوەکۆشای و ڕێکوزتەیشەنە کەرد.
حەر چنین هەڤاڵ فواد هەوڵشدا بۆنە ڕوح، هۆشمەندی و هەستو ئەوەکۆشای ڕابەرایەتی و چا بوارەنە یاگێوە گرنگە و کاریگەرش گێرت... هەڤاڵ ڕەزایچ پەی فرەو جە هەڤاڵا نەشناسابێشا، فرە و هەڤاڵا حەقیقەتو ئایشا نەشناسان. نمەتاونە واچو چا کاتەنە گرڏو هەمڕێیا هەڤاڵ ڕەزای ئەشناسێنێ.
باسو کەسایەتی میلیتانێوە حەقەتینە، شۆڕشگێڵو و کەسایەتی کەمال پیریم کەرد. هەڤاڵ ڕەزا دووەم نوێنەرو کەسایەتیە کەمال پیری بێ. دلێ سەختترین بارودۆخو هێڵەو ئەوەکۆشایمانە، جە یاگێنە کە هیچ ئیمکانێوە دلێنە نەبێ، جە وەراوەرو گرڏ جۆرە دووژمنێوە پاشڤەڕۆینە بە ئازای و فیداکاری، بە ڕێبازی ئافرێنەر و ژێرێتییۆ هامکاریێ گۆرەش جە خوڵقناو چالاکی پەکەکەینە کەرد.
دماتەر کەوت زینان. جە زینانەنە واناشۆ و ئەوەکۆڵییایش کەرد. گەشەش بە هۆشەمەندی تیۆری وێشدا. هونەرو ڕاوەبەردەی ڕێکوزتەیش بەرەو وەڵێ بەرد. یاواینەو سیاسەتیش وەرفراوان کەرد. جە هەرمانەی ڕێکوزتەی تا یاوۆنە بە هەرمانەو دیبلۆماسی، بەشداریس جە چن ئەرکێ جیاواز کەردەن. بەڵام دلێ پارتەکەینە یوەم ئەرکو فەرمی هەڤاڵ ڕەزای جە ڕێکوزتەو کۆمیتەو مییانو دماو کۆنگرەی یوەمی، ئەندامێتی کۆمیتەو سەروازی ناوەندی بێ. یارمەتیدەرو محەمەد قەرەسونگوری بێ پێسەو فەرماندەو کۆمیتەو ناوەندی ئەرکش پنەدریا.
ڕابەر ئاپۆ گرڏ کاتێ ئینەیە واچێ. گرڏ کاتێ پەکەکە بە زەحمەتی، بە ئەوەکۆشای بەدەسئامان. هیچ چێوێ خۆبەخۆ نامان، بەشێوێوە ئاسان نەخوڵقیان. پی زۆر و زەحمەتییۆ، ئاستەنگییەکا ئەوەکۆشای ئاسایی نەبێ. ڕابەر ئاپۆ ماچۆنە، 'پێسەو هەنگام نییاین سەرو نوکو کاردێرە'. چی ڕاپیماینە بڕێ زامڏارێ بیێ، بڕێش ونیشا مجیا.
حەر دەقێوە ئەوەکۆشای ئازادی ٥٢ ساڵەیما بە فرەتەرین سەختی، بە فیداکاری بە قارەمانێتی و ئازاییۆ جە وەراوەرو ئاستەنگییەکانە، بە شەهادەتۆ بەدەسئامان.
حیچ چێوێ بە ئاسانی، بێ قوربانی دای بەدەس نامان."
