بەرنامە پەڕجۆشەکانە چوارچوە خەباتوو ورچنیەینە کە هەزاران کەسێ ئامادێ بێنێ، پەیاموو "کیانایۆ قەیومەکا" ئەوەخوای کریاوە.

وان

ئەردیشوو وانینە بە بەشداریی سەدان کەسا یوەم نویسگەو ورچنیەی کریاوە. چالاکییەکەنە پەی ماوێوە فرەی بە دەهۆڵ و زوڕناوەخەڵک ورپڕا. جەماوەر و کاندیدەکاو هامسەرۆکوو شارەوانی بە کارەوانێوە سەیارا مەنتێقەکەنە سووڕیێوە. کاندیدەکاو هامسەرۆکایەتیی شارەوانیی ئەردیشی، گولەر تەمەل و باران بیلجی، واتشا، کە بە سەبەبی بێپاساو قەیومێشا ڕوانەەو شارەوانییەکاشا کەردێنیوە و باوڕشا هەن کە سەرێ گنا.

کاندیدوو دەم پارتی پەی هامسەرۆکایەتیی شارەوانیی وانی، عەبدوڵا زێدان، واتش، کە ئادێ شارەوانیی ئەردیشی بەراوە و قەیومەکا کیاناوە. زێدان واتش، کە ڕابەروو گەلوو کوردی عەبدوڵا ئۆجالان ئازاد بۆ. هامسەرۆکوو دەم پارتی وانی، گوڵشەن کورتە، واتش"ورچنیەیی ٣١ ئادارینە قوفڵوو زیندانەکا ماڕمێ، ئیرادەو گەلوو کوردی نیشانە مدەیمێ، قەیومەکا کیانمێوە یانە".

ڕحا

ڕێکوستەی دەم پارتی ڕحانە دماو کۆبییەیۆ ئشناسای ئەنقەرەنە، کاندیدەکێ یاوێ شارەکە و بە کارەوانوو سەدان سەیارا خێرامایشا وەنە کریا. کاندیدێ بەشدارێ جە ئاهەنگەکەو گەڕەکەو بادیلی و چا قسێشا کەردێ. پەرلەمانتاروو دەم پارتی مەدحەت سانجار واتش ڕحا ئیرادەو چارەسەری دیموکراتیکی وێش بە قەوەتی نیشانە مدۆ. کاندیداو هامسەرۆکوو شارەوانیی شاری گەورەو ڕحای، گوڵسەر یەڵدرم و جەلالەدین ئەرکمەن واتشا پەی بەیاگەیاونای زیهنیەتوو شارەوانیی دیموکراتیکی ئامێنێ ڕحا. ئاهەنگەکە وەردەموو بیناو دەم پارتیینە دماییش ئاما.

ئیستەنبوڵ

کاندیداو هامسەرۆکوو شارەوانیی دەم پارتی ئیستەنبوڵنە، مەراڵ دەنیش بەشتاش و موراد چەپنی بەشێوێوە جەماوەری خێرامایشا وەنە کریا. جەماوەر بە چەپڵێ و هەلهەلێ و سروودێ ورچنیەیی دەم پارتییوە خێرامایشا وەنەو کاندیدا کەرد. هامسەرۆکوو دەم پارتی ئیستنەبوڵنە گۆنجە یانگۆز و ڕێکوستەی مەنتێقەکەی و هامسەرۆکوو ئەسەپە ئۆزلەن گوموشتاش و نوێنەروو ڕێکوزیا مەدەنییەکا بەشدارێ چالاکییەکەی بێنێ. چالاکییەکەو ئیستەنبوڵی واوەی جۆش و پاگێرتەیرە دەم پارتیش نیشانە داوە.