هامسەرۆکەو شارەوانی سێرتی سۆفیا ئاڵگەشە جە لایەنو دادگاو سزای قورسە ٥هەمینی جە ئامەدەنە بە ٦ ساڵێ و ٣ مانگێ سزاو زینانیبکەردەیش سەرەرە سەپیا. دماو سزاو سوفیا ئاڵگەشێ، شارەوانی سێرت دەسش سەرەرەگیریا و یاگێ هامسەرۆکەو شارەوانی سۆفیا ئاڵگەشێ و محەمەد کایسی، پارێزگارو سێرتی کەمال کزڵکایا پێسەو قەیومی نیارە.

هامسەرۆکو شارەوانی سێرتی محەمەد کایسی پەیوەس بە دەس سەرەرەگێرتەو ئیرادەی جە سێرتەنە پەی ئاژانسو هەواڵو فورات (ANF) قسێش کەردێ و واتش: "گرد شاهێدێ بیدی کە ٦ ساڵێ و ٣ مانگێ سزاو زینانی کەردەی سەرو هامسەرۆکەو شارەوانی سوفیا ئاڵگەشێرە سەپیان. ئیتر متمانەما بە دادگای نییا، بە ئارەزووی وێش سزا منیۆرە. دماو سزاداو هامسەرۆکەو شارەوانییما وەردەمو شارەوانینە دەسما بە ئێشکگیری کەرد. پێسەو ئانەی وڵاتێوە ئەرەگیر کەرانە سەعات ٦:٠٠ بەیانی ئامێ سەرو شارەوانییەکەیما و قەیومشا سەپنا".

گەلوو کوردی کودەتاو قەیوم قەبوڵ نمەکەرۆ

کایسی ئاماژەش پانەیە کەرد کە دەسەڵات حسابش پەی ئیرادەو گەلوو سێرتی نەکەردەن و واتش: "قەیوم پەی ئێمە بە واتاو دزی و تالانی مێ. قەیومەکێ بە هیچ شێوێ خزمەتو گەلی مکەرا. ئی گەلە ڕەنجێوە فرە گۆرەش دان و خاوەندارێتیش جە شارەوانی کەردەن، بەڵام ئاڏ بە شێوێوە بێ ئەخلاقانە، حساب پەی ئیرادەو گەلی مەکەرۆ. ئینە بێ یاسایین. با خاس زانانە یەرێ جارێ تەریچ قەیومی سەپنانە ئی گەلە دەس سەرەرەگێرتەو ئیرادەی قەبوڵ مەکەرۆنە. گەلوو سێرتی سەرەش وەردەمو ئاڏشا نەنامنانەرە ، وە سەریش مەنامنۆرە. چێش بۆنە با بۆ بە دزی سەرێ مەگنا. وەرو ئانەی گەلوو کوردی کودەتاو قەیومی قەبوڵ نمەکەرۆ. گەلوو سێرتی ئیرادەو وێش ڕادەسو ئێمە کەرد، ئاڏ مەتاوا وەردەمو ئی ئیرادە وێشا گێرانە".

کاتو خاوەندارێتی کەردەین جە ئیرادەی

کایسی داواش جە پارتە سیاسییەکاو، نوێنەرا ڕێکوزیەکێ گلێرگەی مەدەنی کەرد کە بە مڏرامان جوابو دەس سەرەرەگێرتەو ئیرادەی داوە و واتش: "تا دما دڵۆپو ونێما خاوەندارێتی جە ئیرادەو وێما مکەرمه. شارەوانی پەی ئاڏشا جیانمازمێ. ئی هەرمانێ نایاساییەنە و نایاسایی قەبوڵ مەکەرمێ. بە تایبەت دوا جە گرڏ چین و توێژەکا گلێرگەی مکەرمێ مڏرامان کەرانە و ئەوەکۆشانە. ڕۆ ڕۆو خاوەندارێتی کەردەین جە ئیرادە و شارەوانییەکاما".