کۆڵبەرێوە نەوجوان بەسەختی زامڎار کریا
سنووروو شاروو سەردەشتینە جە ۋەرکەوتوو کوردسانی هێزەکۍ دەوڵەتوو ئێرانی تەقەشا جە کۊڵبەرێوە نەوجوانی کەرد و بە سەختی زامڎار بی.
بەپاو هەواڵێوە جەمەو مافوو مرۆڤوو کوردسانی ڕۊو جومعەی ٣ۍ ئایاری نەوجوانێوە تەمەن ١٧ ساڵ بە نامۍ ئاریانی (دمانامەکێش نەزانیان) خەڵکوو دەگاو ساوانی سەردەشتی بە تەقەی راسەوخۆو هێزەکا ئێرانی زامڎار بیەن.
بە پاو گرتە ڤیدیۆییۍ کە وەڵاکریانۆ، ئا نەوجوانە بە چەکی ساچمە تەقەش ۋنەکریان و ژمارێوە فرە ساچمۍ ۋەروو دەموچەمیش کەوتێنۍ و ئەگەروو جە دەسدای تواناو وینایش هەن.
جە سەرەتاو مانگەو ئایاریوە دووۍ کۆڵبەرۍ بە نامەکا هێمن ئەحمەدی جە سنووروو بەستامی سەقزی و جەلال سۆهرابی جە سنووروو سورکێوی بانەینە کوشیێنۍ و جە نەوسوڎەیچەنە کۆڵبەرێوە جە ئاکاموو عەزیەت کەردەی هێزەکا دەوڵەتوو ئێرانینە زامڎاربییەن.
مانگەو نیسانینە لاو کەمیۆ ٤ کۆڵبەرۍ کوشیێنۍ و زیاتەر جە ٣٠ کۆڵبەرایچ زامڎارۍ کریێنۍ، هاموەخت بە پاو ئامارێوە جە ماوەو بەینوو ١و ئایاروو ٢٠٢٣ پەی ١و ئایاروو ٢٠٢٤ نزیکەو ٥٠ کۆڵبەرا کوشیێنۍ و زیاتەر جە ٤٢٠ کۆڵبەرێچ زامڎارۍ کریێنۍ.
