بەشو دمانیمەڕۆو ٢٢ەمین کۆنگرەی نەتەوەیی کوردستان (کەنەکە)ینە، نوێنەراو پارت و ڕێکوزیا و ئەرەمەرزیا کوردییەکا پەیامو یۆبییەی نەتەوەییشا ئەوەخوای کەردۆ.

عومەر: مشۆم دەسکەوتەکاو کوردا بپارێزنمێ

بە نامێ ڕاوەبەری وێڕاوەبەری وەرنیشتی، دکتۆر عەبدولکەریم عومەر تیشکەش وستە سەرو وەڵێئاما تازەکاو وەرنیشتی و واتش: "پێویسا سەرو بناغەو یۆبییەی نەتەوەیی سەرو چەنیبییەی پارێزنای دەسکەوتەکاو کوردستانی مامەڵە بکەرمێ".

ئەرەیاوناش پانیشت و وەرنیشتنە بە هەزاران قوربانیێ ستاتۆو کوردا وەشێ بێی، سەرنیشتو کوردستانینە سەرەڕاو فشارە فرەکاو دەسەڵاتی، دەسکەوتێ خاسێ بیێ.

واتش تا پەرسەو کوردی چارەسەرە نەبۆ، جەنگ جە وەرکەوتو دلێراسەینە نمەبڕیۆ، جەختش کەردۆ کە دەسکەوتەکێ ئینێ خەتەرنە و میلیشاکاو ئێرانی و ڕژێمو سوریای هەڕەشێ جە وەرنیشتی مکەرانێ و پلانە مجارە و دەوڵەتو تورکیچ هامکارا و بە هجوومی عاسمانی کۆکوشی مکەرۆ، ئڕفانای و ئاوراکەردەی و تەرسنای هاموەڵاتا ئامانجشانە.

هەرپاسە تیشکەش وستە سەرو هەڕەشەکاو دەوڵەتو تورکی پەی سەرو پانیشتو کوردستانی و واتش: "هەڕەشەکاو دەوڵەتو تورکی پەی سەرو یەنەکەی هەنێ، دەوڵەتو تورکی و ئەردۆگان پەی دلێنەبەردەی دەسکەوتەکاو کوردی هەرمانێ دیپلۆماسیێ وێشا بەردەوام مکەرا. چی سەدەنە سیاسەتو دلێنەبەردەی کوردی زیاتەر موزانێ وەڵێ. پارت و جمیەرە کوردییەکێ پێویسا نەبانێ بە هامکارێ، تێکەڵێ گەمەکا نەبانێ و نەبا بەشێو چا گەما".

جەمال: زەروورا یۆبییەی نەتەوەیی پێک بێ

بە نامێ جمیەرو گۆڕانیوە، فواد جەمال داواش کەردە یۆبییەی نەتەوەیی بکریۆ بە بناغەو کۆشیای ئازادیی کوردستانی و گەلو کوردی گرد یاگێونە دژو ئاسیمیلاسیۆنی زوان و چاندو وێشا بپارێزنا.

ئازادی: زەروورا گرنگی بدەیمێ بە زوانی کوردیی

بە نامێ کورداو کازاخستانیوە گوڵنار ئازادییە واتش: "ئێمە سەرانسەرو جیهانینە وەڵێ بیێنمێوە. ئەگەر زوانی کوردی بە زارۆڵەکاما نەیاونمێ، نەوەکێما بە کولتوورو وێشاوە نەژیوا، دلێنە مشمێ".

"زەروورا خاوەنداریی زیاتەر جە تەڤگەرو ئازادیی بکریۆ"

بە نامێ پارتی کۆمۆنیستی ئێرانیوە، تیشکە وزیا سەرو فشارەکاو دەوڵەتو ئێرانی سەرو شارەکاو وەرکەوتو ی کوردستانی و شۆڕشو "ژەنی، ژیوای، ئازادی" دژو فشارو سەرو ژەنا، هەرپاسە چەنی ئی شۆڕشە بییەن هومێدێو پەی مافو ژەناو جیهانی و ئشناسنای کۆشیای جڤاکی کوردی جیهانەنە.

هەرپاسە نوێنەرو پارتەکەی ئەرەیاوناش کۆکوشی و ستەمو ئێرانی پەی سەرو شارە کوردییەکا جە وێرانکەردەی سرووشتینە موینیۆ، واتش کۆشیای ئازادیی کوردستانی چوار پارچەو کوردستانینە بییەن بە هومێدو گرد کوردێو و زەروورا زیاتەر خاوەندارییش وەنە بکریۆ.  

سەربڵند: گردو پارتە کوردییەکا بەشدارێ ئی خەباتەیە بانێ

سەرۆکو پارتی ئیسلامیی کوردستان (پیک)ی، حیکمەت سەربڵند سڵامش وەنەو گردو  ژناو کوردی کەرد و خەباتو کەنەکەیش پەی بۆ یۆبییەی نەتەوەیی مەبارەک کەرد، واتش: "ئانێن کە بەرو ئی خەباتیوەنێ، زەروورا سەرو ئی خەتێوە بەشداریی خەباتی بکەرا. تا گرد لاێو سەرو خەتێ نەتەوەیێ و کۆشیای بجووڵیاوە، زەروورا خەباتی هەمەلایەن بکریۆ".

ئاماژەش کەرد، کە زەروورا خاوەنداری وەنەو کۆشیای و قوربانیدای جەنگەواناو ئازادیی کوردستانی بکریۆ، تیشکەش وستە سەرو تەرسەو ئاکەپەی و مەهەپەی دمای شکسو ورچنیەی، واتش: "گەرەکشانە ڕۆژەڤێوی تازە بخوڵقنا، سەروو بناغەی نەژادپەرسی ڕۆژەڤێو بخوڵقنا و ئامادەکاری مکەرا پەی هجوومێوی گەورەی پەی سەرو پانیشت و وەرنیشتو کوردستانی. زەروورا گەلو کوردی وەرانوەرو ئی هجووماوە بە یۆبییەی و یەکدەنگی، دەسکەوتە نەتەوەییەکاش بپارێزنۆ".

ئۆگەر: ژەناو کوردی وەرپەرسیی وێشا مزانا

بە نامێ جمیەرو ژەناو کوردیوە، سوڵتان ئۆگەرە سەرەتا لەیلا قاسم و ساکینە جانسز و ژینا ئەمینی و هەڤرین خەڵەفیش یادێ وستێ، تیشکەش وستە سەرو داگیرکاری و کۆکوشی و وێرانکەردەی و فاڕای دیمۆگرافی و کۆچبەرکەردەی کوردستاننە، واتش: "پێسەو جمیەرو ژەناو کوردی پەی ڕاگێری جە لۆزانێوی تازەی، ئازاد ژیوای گەلو کوردی سەرو خاکەکەیش، پێسەو ژەنا وێما بە وەرپەرس مزانمێ".

قاسم: خاکەکەیما ئازاد مکەرمێ

سەرۆکو جمیەرو ژیوایوەو کوردستانی، دکتۆر ڕزگار قاسم واتش: "بەیدێ یۆی گێرمێ و کۆشیەیمێ پەی ئازادکەردەی خاکەکەیما".

شەماڵ: دەوریتاریخیما مگێڵنمێ

بە نامێ یەنەکەیوە، شێخ شەماڵ داواش ونەو گردو پارتە کوردییەکا کەردە یۆبییەی نەتەوەیی بارا وەرۆ، چونکوم گەلو کوردی و دەسکەوتەکێش ئینێ خەتەرنە، واتش کوردێ مشۆم دەوری تارێخییشا گێڵنا.

موسلیم: گەلەکەما ڕێکوزیاتەر و قەوەتتەرا

هامسەرۆکو پەیەدەی، ساڵەح موسلیم ڕاو ڤیدیۆیوە بەشدار بی، واتش: "وەرانوەرو هجوومەکانە، گەلو کوردی پێسەو جارا نییا، ڕێکوزیاتەرا. هجوومەکێ هەنێ و بەردەوامێنێ. گەلەکەمان دژو هجوومەکا جەنگێوی شۆڕشگێڵنیشا کەرد ".

موسلیم واتش دەسکەوتە تەکنیکییەکاو گەریلای دەسکەوتێوی خاسێنی پەی گردو کوردا، داواش کەردە گەل  بە یۆگێرتەی ڕووبەڕوو گرد هجوومێو بۆوە، ئەگەر پاسە بکەرا، هەرگیز دوژمن سەرنمەگنۆ.

نوێنەرو باوڕ و گەلە جیاوازەکا داواو یۆبییەیشا کەردە

سیاسەتمەدارو کوردی، سەلیم سەداک دژو هجوومو سەرو کوردا بانگەوازو یۆبییەیش کەرد.

چندین سیاسەتمەدارێ و نوێنەرێ ڕێکوزیا و ئەرەمەرزیایەکا، بەتایبەت نوێنەرو باوڕی و ئیتنیکی و گەلاو کوردستانی پێسە ئێزدی و ئاشووری و سوریانی و یارسانی قسێشا کەردێ و تیشکەشا وستە سەرو گرنگیی یۆبییەی نەتەوەیی.