ئەرەنیشتاو کانتۆنو فوراتی بە شێوێوە جەماوەری کۆبانێنە ڕاپیمایشا کەرد و پەشتیوانی وێشا پەی قەسەدەی دوپاتکەردۆ. جە ڕاپیماکەینە ئانە وزیا ڕووە کە گرد کاتێ بانۍ بە بازنێوە دەورو قەسەدەیرە.
بە هەزاران کەسێ جە ئەرەنیشتا کانتۆنو فوراتی بەمەبەسو پەشتیوانی جە قەسەدەی مجیێرە جاڎەگا و ڕاپیمایشا کەرد.
جەماوەرەکە جە مێڎانو ژەنێ ئازادێنە دەسشا بە ڕاپیمای کەرد. جە ڕاپیماکەینە ئاڵاکۍ قەسەدەی و ۋێنەو گەشمەرڏا ئازادی و لافیتێوە کە سەرشۆ نوسیابێ "گردیما قەسەدەنمێ"، "قەسەدە شکۆو ئێمەن" بەرزکریابێوە و سەرەمڕە دروشمۊو "بژیوۆ مڏرامانو قەسەدەی" وچیاوە.
جەماوەرەکە بەرەو مېڎانو گەشمەرڏە عەگیدی ڕاپیمایشا کەرد، چا پەی رێز ونەنیای جە ڕۆحو گەشمەرڏا یەک دەیەقە بە بێدەنگی مدرێ، دماتەر جە ڕاوەبەرایەتی ئەنجومەنو سەروازی کۆبانێ ئیسماعیل قسێش کەردێ و سڵامش ۋنەو مڏرامانو جەنگاوەرا جە سەنگەرەکانە کەرد.
ئیسماعیل واتش، "جەنگاوەرا جە سەنگەرەکا جەنگینە چ جە قۆڵو بەنداو تشرینینە، چ جە سردەو قەرەقۆزاقینە، دەگاگۍ دەوروبەرو منبجینە و هەرپاسە جە قۆڵو گرۍ سپینە ئینێ جەنگێ دژوارەنە. چا جەنگەنە جەنگاوەرەکێما مڏرامانێ تاریخی مکەرا".
ئیسماعیل ئانەیچش وست ڕووە، کە دۆڵەتو تورکی و چەتەکێش بەردەوام پلانە چەپەڵەکاشا بەراڕاوە، بەڵام گرد کاتێ جەنگاوەرا قەسەدەی ئا پلانا شێونا و واتش، "مەرامو دۆڵەتو تورکی گرد کاتێ گەرەکشا کۆبانێ تەوقە بڎۆنە. بەڵام حەجگیز ئا وەرمەشا نمێدی، با حەجگیز ویر چانەیە نەکەراوە، وەرو ئانەی جەنگاوەرەکێما بە مڏرامانشا ڕا نمەڎا خاکەکە گنۆ چێرو پەیاو ئاڎیشا. جەنگاوەرا قەسەدەی گرد کاتێ هرووژمە ئەرەگیرییەکا ماڕانە، ئێمەیچ گرد کاتێ دەور قەسەدەیرە بیمێ بە بازنێوە و قەڵغانی".
ئەندامۆو کۆردیناسیۆنو کۆنگرە ستاری جە کانتۆنو فوراتی پەیمان عەلۆشە باسش چانەیەکەرد کە جەنگاوەرا قەسەدەی، یەپەگە، یەپەژەی گرد کاتێ جە وەراوەرو ئەرەگیرینە ئەرەکۊشێنۍ، وێڕاگیری مکەرا واتش، "جەنگاوانەکێما گرد کاتێ هرووژمە دڕندانەکا دۆڵەتو تورکی و چەتەکاش دلێنە بەرا و جە وەرا وەرو ئاڎیشانە مڏرامانێ تاریخی بە پیتۍ ئاڵتونی منویساوە. گەلە شکۆمەندەکەما گلێرۆبییەیما چێ پەی پاڵپەشتین جە هێزەکا یەپەژەی، یەپەگەی و قەسەدەی، مڏرامانی تاریخی ئاڎیشا مکەرمێ. گردیما قەسەدەنمێ، ئێمە گرد کاتێ ئینایمێ پەشتەو هێزەکاماوە و پارێزنمێشا".
ڕاپیماکەی بە دروشمۆو "بژیوۆ مڏرامانو قەسەدەی" دمایش ئاما.
