خەتیب دیجلە: پېسە چنی ئەفریقای پانیشت و دی کلێرکی سەرۆکش ۋەروودەم و ئازاڎیی ماندێلاینە بەتەنیا مەنێوە، هەڵمەتەو 'ئازاڎیی پۍ عەبدوڵا ئۆجالان"یچ تورکیاش تەنیا کەردەن. تورکیا یان ئازاڎیی رابەر ئۆجالانی قبوڵ کەرۆ، یا ئانەن تەنیاتەر بۆ.
جە سەروبەنڎوو ٢٥ەمین ساڵیاڎوو پیلانگێڵنیی میان نەتەوەیی ١٥و شوباتینە، تا مۍ هەڵمەتەو ''ئازاڎیی پۍ ئۆجالانی، چارەسەریی سیاسی پۍ پرسوو کوردی'' کە سەروو ئاستی میان نەتەوەیی جە ١٠و تشرینوو یووەموو ساڵەی ویەردێوە، دەسشپنەکەردەن، تا مۍ فراوانتەر بۆ. ئامانج جە هەڵمەتەکۍ ماڕای گۆشەگیری چڕ و ئازاڎیی جەسڎەیی رابەروو گەلوو کوردی عەبدوڵا ئۆجالانی و چارەسەرکەردەی پرسوو کوردین جە ڕاو دیموکراتیکیوە.
چا بارۆ خەتیب دیجلە سیاسەڎمەداروو کوردی و واتەواچوو هەڵمەتەو ''ئازاڎیی پۍ ئۆجالانی، چارەسەریی سیاسی پۍ پرسوو کوردی'' قسێس پۍ ئاژانسوو هەواڵوو فوراتی کەردۍ و ئانەش وست ڕووە، کە هەڵمەتەکۍ سەروو پێشنیازی و بە سەرمەشقایەتی دۆسا گەلوو کوردی دەسشپنەکەردەن و واتش، "مەبەسما جە دۆساما فرەو کەسایەتیە ئەکادیمیک، چالاکا سەندیکای، سیاسەڎمەدار، نویسەر، رۆشنۋیر و هونەرمەنڎان سەروو ئاستی میان نەتەوەیینە.
جە ١٠و تشرینوو یووەنییەنە بەپاو تەمەنوو رابەر ئۆجالانی جە ٧٤ ناوەندا جەهانینە بە ئەرەیاۋنێوە رۆنامەوانی هامبەش و هاموەخت هەڵمەتەکۍ دەسشپنەکەرد، کە دووۍ داوۍ گرنگێش پێسە ''ئازاڎیی پۍ ئۆجالانی، چارەسەریی سیاسی پۍ پرسوو کوردی'' جە ۋێش گێرتێنۍ و ئینەیچ ئامانجوو دەسوەڵێوستەکەی نیشانە مڎۆ.
خاڵێوە گرنگەی تەرە ئانێنە کە ڕاوەبەرا ئی کەمپینەیە چا هێز و کەسایەتیا پێکمۍ کە وەڵتەر پەی ئازاڎیی نێلسۆن ماندێلایچ هەرمانەشا کەردێنە. جمیەروو ئازاڎیی و گەلوو کوردسانی جە چوار پارچەو کورڎسانینە بە تەمامی خۊتانکەردەی چا هەڵمەتۍ کەرا و کە ئیسە فاڕیێنە بە هەڵمتێوە سیاسی و دیپلۆماتیکیە کە هەڵایچ بەردەوامەنە".
خەتیب دیجلە، ئانەیچش وست ڕووە کە ئا هەڵمەتۍ کە وەڵتەر پەی ئازاڎیی رابەروو گەلوو کوردی عەبدوڵا ئۆجالان لوێبێنۍ ڕاوە، وەختیۍ و پۍ ماوۍ کەمی بێنۍ، واتە تاکتیکیۍ بێنۍ، بەڵام "هەڵمەتەکۍ ئیجاریە ستراتیژیەنە. واتە هەڵمەتەو مسۆگەرکەردەی ئازاڎیی جەسڎەیی رابەر ئۆجالانیا و جەڕاو هەڵمەتەو دیپلۆماتیکی و سیاسیوە بەردەواما. جە ناوەنڎوو هەڵمەتەکێنە گەل هەن و جە چوار پارچەو کوردسانی و جە گرڎ یاگێنە کە دۆسەکێما چا چالاکێنۍ، بەردەواما.
جە ئیسە بە دمایچۆ جە بنچینەو گرڎ چالاکیەکانە ئا هەڵمەتۍ بیەیش بۆ. ئازاڎیی رابەر ئاپۆی پېسە ستراتیژێوە بەردەوام ئینا رۆژەڤ و بەرنامەو هەرمانەکامانە تا ئەنجام بەدەسنۍ، هەڵمەتەکۍ دمایش نمۍ".
خەتیب دیجلە ئاماژەش پانەیچ کەرد، کە رابەروو گەلوو کوردی حەجگیز جە رۆژەڤوو گەلوو کوردی و دۆساش نەبڕیانەرە و واتش، "ساڵیاڎوو ٢٥ەمینی مەعنا و جیاوازی تایبەت بە ۋێش هەن. قەرارەکۍ دادگاو مافەکا مرۆڤوو ئەوروپای جە بارەو ئانەی مەکریۆ کەسێوە زیاتەر جە ٢٥ ساڵا جە زینڎانەنە ڕاگیریۆ، واتە مافوو هیوای ئینا ئارانە. جە ١٥و شوباتوو ٢٠٢٤یچەنە گێرتەو رابەر ئۆجالانی ٢٥ ساڵۍ پەڕکەرۊوە. حەر ڕووۍ کە سەروو ئاڎیرە ویەرۆ بە مەعناو ئانەینە کە تورکیا قەراروو دادگاو مافەکا مرۆڤوو ئەوروپای پاشێل کەرۆ. ئێمە ئینایمۍ ئاژێوە گرنگی چی جۊرەنە.
تورکیا یان مشۆم ئازاڎیی رابەر ئۆجالانی قبوڵ کەرۆ یاخوڎ بە تەنیا مەنۆ و لا وزیۆ. سەرۆکوەزیرانوو ئا وەختەو ئەفریقاو پانیشتی درێدریک دی کلێرک جە جوابوو پرسیارەو ئانەینە کە ' ماندێلێوە کە ماوێوە فرەن دژایەتیش کەرا، پۍ چی ئیسە ئازاڎش کەردۍ؟' پی جۆرە واتەبێش: 'کەوتیمۍ ئاژێوە پا جۆرۆ کە جە جەهانەنە کەس مامەڵەما چنی نەکەرۍ. ۋەروو ئانەی بە تەنیا مەنیمێوە، ناچارۍ بیەیمۍ کە فاڕیای بنچینەیی جە سیاسەتیمانە ئەنجام بڎەیمۍ'. تا هەڵمەتەو ''ئازاڎیی پۍ ئۆجالانی، چارەسەریی سیاسی پۍ پرسوو کوردی'' گەورەتەرە بۆ، تورکیایچ پېسە ئەفریقاو پانیشتی، سەروو ئاستی میان نەتەوەیی لا وزیۆ و بەتەنیا مەنۊوە.
گەل و دۆسا کوردی ئاژەو 'مافوو هیوا'ی بەردەوام جە رۆژەڤەنە مازاوە، خۊتانکەردەی جە رابەر ئۆجالانی کەرا و ساڵەو ٢٠٢٤ ی کەرا بە ساڵێوە چارەنوویس سازۍ.
تا ئازاڎیی رابەر ئۆجالانی مسۆگەر نەکریۆ، پرسوو کوردی چارەسەر مەبۆ، ئاشتی یاگۍ جەنگی مەگێرۊوە، ئینە بەسیێنۍ یۊترینیۆ.
ۋەروو ئانەی ئی هەڵمەتۍ پېسە حۊڵێوە دێر وەختی مەوینوو، وەڵتەر فرەو هەڵمەتا لووۍ ڕاوە، بەڵام بەشوو ئازاڎکەردەی رابەرایەتیشا نەکەرد. حەرپۊکەی مشۆم دەس بە چالاکی جەماوەری ۋەرفراوان سەروو ئاستی میان نەتەوەیینە کەرمۍ".
خەتیب دیجلە ئاماژەش پا قەیرانە فرەرەهندا کەرد کە تورکیا پۆشاوە گیرۆدەن و واتش، "جە قەیرانەو ئابووریوە، تا فرەو قەیرانا سیاسی، ئینا چێروو فرەو قەیرانانە. تورکیا پێگەش جە دەس دان. مەڵامەتوو سەرەکی ئا قەیرانایچە گێڵۊوە پۍ چارەسەرنەکەردەی پرسوو کوردی، جەنگ، گۆشەگیری و گێرتەی نە حەقوو رابەر ئۆجالانی. ئا گۆشەگیرییە جە جەهانەنە هامشێوەش نییا. رۆشنۋیراو جەهانی ۋەروودەموو ئا گۆشەگیرییەینە کە سەروو رابەر ئۆجالانیرە سەپیان، تووشوو شۆکی و تاسیای بیێنۍ.
ئا ئاژەی تورکیاش کۊتەنەنە پېسەنە ئاژەو ئەفریقای پانیشتی کە جە ۋەران ۋەروو داواکاری پۍ ئازاڎیی ماندێلاینە جە جەهانەنە بە تەنیا مەنەبێوە".
خەتیب دیجلە جە دمادمایی قسەکاشەنە داواش جە گرڎ لێوە کەرد کە جە ١٧و شوباتینە کۆڵنەنە بەشداری جە ڕاپیماکەینە کەرا و واتش، "ئا هەڵوێسەی چا ڕووەنە گەلوو کوردی چا یاگێنە نیشانەش مڎۆ، پاگیری سەروو ئازاڎیی رابەر ئۆجالانیچ نیشانە مڎۆ حەرپۊکەی ١٧و شوباتی ڕۆو خاوەندارییا جە ڕابەر عەبدوڵا ئۆجالانی و ئەندێشەکاش".
