کۆنگرەو گلېرگەو دیموکراتیکوو کوردسانی جە ئەوروپا (کەجەدەکە-ئە)، ئەرەیاۋنېوە نویسیاش وەڵاکەردۊ و ماچۆ: "پۍ شەرمەزارکەردەی کۊکوشیەکا پاریسی و خاوەندارێتی جە گەشمەرڎا، جە گرڎ لېوە ئەوروپاینە سەفەربەرۍ بیمۍ".

جە ئەرەیاۋناکەینە ئامان: "جە ٩ و کانوونوو دووەموو ٢٠١٣ ینە، ٣ شۆڕشگێڵنۍ ژەنی کوردی، ساکینە جانسیز و فیدان دۆگان و لەیلا شایلەمەزە جە تەرەفوو میتیوە بە نامەردی تیرۆرکریۍ، ئیسە ١١ ساڵۍ سەروو کۊکوشیە نامەردانەکەیرە ۋیەردەن.

٢٣ ۍ کانوونوو دووەموو ٢٠٢٢ جە دووەمین کۊکوشی پاریسینە، ئەمینە کارا (ئەڤین گۆیی)ە و میر پەروەر (محەمەد شیرین ئایدن) و عەبدولڕەحمان کیزیل گەشمەرڎۍ بیۍ، ئی کۊکوشیە ڕۊشن نەکریاوە و ۋنەپەرسایۆ نەکریا".

کەجەدەکە-ئە داواش کەردە ئی دووە کۊکوشیە دەمودەس ئاشکرا کریا و تاوانبارا جە دادگېوە میان نەتەوەیینە دادگایی کریا.

حەرپاسە ئەرەیاۋناش، ئۍ ساڵ بە سەرمەشقایەتی تەژەکە-ئە جە ٦ و کانوونوو دووەمینە جە پاریس پۍ شەرمەزارکەردەی کۊکوشیەکاو پاریسی و خاوەندارێتی جە گەشمەرڎا، ڕاپیمایۍ ناوەندی ئەنجام مڎریۆ و داواش جە گرڎ کەسێوە کەرد جە گرڎ لېوە ئەوروپایۆ بەشداری ڕاپیماکەی کەرا و دەیان هەزار کەسۍ مېڎانەکا پەڕ کەرا.