کەجەدەکە-ئە ئەرەیاوناش، ئەجەڤیت پیرئۊغڵو، کە سربیانە زینڎان کریان، جە ئەگەروو ڕادەسکەرڎەیش بە تورکیای سزاو زینڎانیی تا ئاخیریش ملەرە سەپیۊ، پەوکای داواو پەشتیوانیکەرڎەیش ئەرەیاونا.
جە ئەرەیاونیاکەو کەجەدەکە –ئەینە ئامان، "دۊسیەو ئەجەڤیت پیرئۊغڵوی، کە ماوێوە فرەن هەن، هەڕەشۍ سربیایش پەی تەسلیمکەرڎەیۊ بە تورکیای سەرنە. ئەجەڤیت پیرۊغڵو کە دۊسوو گەلان، چالاکوو وێگێریی گەزی، داکۊکیکاروو دیموکراسی و ئازادی و کۊشەرێوە دژوو داعشین، بە فشارەکاو دەوڵەتوو تورکی جە سربیانە دادگایی کریۊ. لایەنی سڕبی گەرەکشا تەسلیموو دەوڵەتی تورکی فاشیستیش کەرۊوە".
جە ئەرەیاونیاکەینە ئانەیچە وزیان ڕووە، کە تەسلیمکەرڎەیۊ ئەجەڤیت پیرئۊغڵوی بە تورکیای بە ماناو سەپنای سزاو زینڎانیی تا ئاخیرینە ملوو نامەبریایرە و باسوو ئانەیچش کەرد: "بۊنەو ئانەیۊ ئێمە جە ٧وو حوزەیرانیرە جە فرانکفۊڕت، شتوتگارت، کۊڵن، ڤیەننا، بێرن و پاریسنە چەنی یۊبییەی دیموکراتیکی پەی ئەجەڤیت پیرئۊغڵوی چالاکی و وێنیشانەدای ساز کەرمێ".
جە ئاخیروو ئەرەیاوناکەی کەجەدەکە-ئەینە ئامان، "مشۊم ئەجەڤیت پیرئۊغڵو تەسلیم نەکریۊ. پەی ئانەیچ داوا جە ڕای گرڎینی کەرمۍ کە پەشتیوانی جە ئەجەڤیت پیرئۊغڵوی کەرا".
س.ز
