کۆمیتەو گەلی و باوەڕییەکا کەجەکەی، جەژنەو چوارشەممە سەرۍ نیسانی(چوارشەمەی سۆر)یش پیرۆزە کەردە و داواش کەردە جەژنە بۆ بە وەسیلەو بەقوەتکەردەی کار وڕێکوستەو گەلوو شەنگالی سەروو بنەماو ئاوەڎان کەردەیۆ شەنگالێوە دیمۆکراتیکی و خۆسەری.

دەقوو پەیامەکەو کەجەکەی پی جۊرەنە:

"گلېرگەو ئێزدی ساڵەو ٢٠٢٤ینە چوارشەممە سووری قەڎیمی گێڵنا، ئێمەیچ پا بۆنۆ یاڎوو چوارشەممە سووری گەلوو ئێزدی کە نزیکەو ١٠ ساڵا دماو کۆمکوشی شەنگالی پەی ئازاڎیی کۊشیای مکەرا، پیرۆزە مکەرمۍ. هیواڎارېنمۍ ئی جەژنۍ بۊ بەمەڵامەتوو ئانەی کە گەلوو ئیزدی شەنگالی سەروو بنەماو بنیاڎنیایۆ نەتەوەی دیموکراتیکی و خۆسەری دیموکراتیکی، بەقوەتتەر کار و کۊشیایشا ڕاوەبەر کەرا. جە هەمان وەختەنە ئێمە جەژنەو ئا کوردا گرڎیی کە بە کولتوروو ڕۊو چوارشەممەو نیسانی پێشوازی چی ڕووەیە مکەرا پیرۆز مکەرمۍ و هیواڎارێنمۍ ئی جەژنۍ بۊ بە وەسیلەو ئازاڎیی، یەکسانی و ئاشتی بەینوو گرڎوو گەلانە.

پېسە وەڵتەری ئێساڵیچ گلېرگەو ئێزدییەکا چېروو هجوومە کۆمکوشییەکا دەوڵەتوو تورکینە جەژنەو چوارشەممە سووری بەرا ڕاوە. گەلوو ئێزدی کە پەی بنیاڎنیای ئایندەو ئازاڎیی ۋېشا و پەی گرنگیدای بە بەها کولتووری، زۋان و باوەڕیەکاشا هەنگامەی گرنگەش نیێنە، بەردەوام ئینا چېروو هەڕەشا دەوڵەتی ئینسان کوشی و ئەرەگیروو تورکی و هامبەشەکەیش، واتە پەدەکە ینە. مزانمۍ کە هجوومەکۍ دەوڵەتوو تورکی ۋەروو قبوڵ نەکەردەی پێگەو گەلی ئێزدیماوە سەرچەمە گېرا. پەی ئینەیچ بنیاڎنیای گلېرگێوە ئازاڎ و خۆسەری دیموکراتیک یۊن جە ئەرکە بنەڕەتییەکاما. سەرەڕاو بەردەوامبیەی مەترسی کۆمکوشی، ئینەیچ ۋەرپرسیاریەکا زیاتەر مکەرۆ. ڕەنگە جە ئایندەنە هجوومی کۆمکوشی واوەی بۊوە، بەڵام جوابی بەقوەت جە ۋەرا ۋەروو ئا هجوومانە ئانەنە کە هێزوو ۋېپارێزنای ۋێشا پەرە پنەبڎا، ڕێکوستەی ژەنا و گەنجا فراوانتەر بکەرا، حەرپاسە سەروو خەباتوو ئەنجومەنەکاو گەلی و سیستموو خۆسەری شەنگالی زیاتەر کۊشیانە.

دەوڵەتوو ئەرەگیروو تورکی بە عەقڵیەت و سیاسەتوو کۆمکوشی جەنگێوە سەرانسەریش دژوو گەلا مەنتیقەکەی ڕێک وستەن چنی هامبەشەکەیش پەدەکە کە دوژمنی بنەڕەتی گەلوو شەنگالین، هاموەخت دەوڵەتا مەنتیقەکەی، ڕووانە هجوومی کۆمکوشی ئەنجام مڎا. گلېرگەی ئێزدی و کوردا بە هەڵوێس و ئەرەکۊشایشا بەڕاسی ۋێشا زینڎە کەردەنۆ. گەلی ئێزدیما کە بە ئیراڎەو ۋێپارێزنای و ۋەرفراوانکەردەی قیمەتە کولتوورییە قەڎیمیەکاش، بە ئیراڎێوە بە قوەتۆ دژوو هجوومەکا دوژمنی مدرامانی گۊرەش کەردەن و نیشانەش دا کە گلېرگەو ئێزدی پی هجووما دلێنە مەشۆ. پی مەعنۍ، جەژنەو چوارشەممەی سووری جە گەلی ئێزیدیما پیرۆز مکەرمۍ، گرڎ ساڵێ بە ڕۆح و هەستوو جەژنەو مدرامانیوە، بیەی و ئازاڎیی، پیرۆز مکریۆ و ماناڎارتەرە بۆ.

گەلی ئێزدیی کە بە هوشیاری، ئیرادە و کۊشیای ۋێشا زیاتەر جە مافەکا خۆسەری دیموکراتیکی نزیکۍ بیێنێوە، بە ئیراڎە و باوەڕێوە ئێژاوە پەی بنیاڎنیای ئایندەو گەلەکەیشا سەروو خاکی قەڎیمیشاوە ئەرەکۊشا. حەرپاسە ئینۍ جەنگېوە یەکلاکەرەوەنە پەی بنیاڎنیای سیستمێوە کە ئاینڎێوە ئازاڎ مسۆگەر بکەرۆ. ئی کۊشیایە و هەڵمەتەو ئاوەڎانکەردەیۆ کە بە ئیراڎێوە فرۆ شەنگالەنە ئەنجام مڎریا، جە سەرانسەروو جەهانینە هیوا بەگەلی ئێزدی باخشانۍ. بە مەڵامەتوو مدرامانوو شەنگالیوە گەلی ئێزدی جارێوەتەر تەسلیمۍ هجوومەکا مەبا و چی قۆناغە تاریخیێنە بە بەقوەتتەرین شێوە ڕووبەڕوو لایەنی ۋەرا ۋەریشا باوە. خاکوو ئێزدییەکا مافی ڕەواو ۋێشانە، بیروباوەڕ و ئشناسنامەی کۆمەڵایەتی مانای حەقەتینەو ئێزدییەکانە. ئی ڕۆح و ئیرادە ئانڎەیتەر ورە بە گەلوو کوردی بەخشۆ.

ئێمە پېسە تەڤگەری ئازاڎیی کوردسانی پەی ئانەی گەل و بیروباوەڕییەکا کوردسانی و مەنتیقەکەی بە عەقڵیەتوو نەتەوەی دیموکراتیکی بەردەوامۍ با جە پېوەرە ژیۋای و ئازاڎیی، زیاڎ جە ٥٠ ساڵان کۊشیای مکەرمۍ. چی کۊشیا شکۆمەندانەینە، کە بە ئیراڎێوە ئېژاوە لووان ڕاوە، گەنجا و ژەنا قارەمانوو گەلی ئێزدیما بەشداریشا کەرد و بە بەدیل و ڕەنجێوە فرە پاڵپەشتی ئی کۊشیایشا کەرد. چی ڕوۆ گەلی ئێزیدی بە ئشناسنامەو باوەڕی ۋێشا، بە هوشیاریێوە قووڵ و بە ئیراڎېوە فرە بە قیمەتۆ کۊشیای مکەرا. پېسە تەڤگەری ئازاڎیی کوردی جارێوەتەر ئەرەیاۋنمێش کە بە پاو مۊچیاریەکا ڕابەر ئاپۆی یۊبیەی ۋێما بەقوەت مکەرمۍ و پەی پەشتیوانی جە دۆزوو ڕەواو گەلی ئێزدی وگەلا هەرێمەکەی، کە جە تەرەفوو هەڤاڵە گەشمەرڎەکاماوە پېسە ئەمانەتێوە جیا مەنە درێژە بە کۊشیای مڎەیمۍ. حەرپاسە ئەرەیاۋنمېش کە پېسە گەلێوە باوەڕی و بەهاکاو شوناسوو ۋێما پارېزنمۍ و بە سەرمەشقایەتی پەکەکەی پەی ئازاڎیی کوردسانی و گرڎوو گەلوو کوردسانی کۊشیەیمۍ.

بۊنەو جەژنەو چوارشەممەی سووریوە دیسان جەخت سەروو ئانەی مکەرمېوە کە پێویسا جە بەینوو ئێزدییەکانە یۊبیێوە بەقوەتتەر وەش کریۆ. ئێمە قەناعەتما پاسەن کە گەورەکۍ گەلی ئێزدی دەوروو ۋێشا جە هېقم کەردەی یەکڕیزی و ڕووبەڕوو بیەیۆ هجوومە کۆمکوشییەکانە و جەنگی تایبەتینە بەکار بارا. ئێمە جەژنەشە ۋنە پیرۆزە مکەرمۍ. بەتایبەتی ئا فەرمانڎۍ و جەنگەوانە ئازۍ گلېرگەو ئێزدی جە کەسایەتی هاجەر، بەنەڤش، خانێ، بێریڤان، مام زەکی، مام بەشیر، سەید حەسەن، دژوار (مەروان فەقیر)، زەردەشت شەنگالی کە جە کۊشیای ئازاڎیی و خۆسەری شەنگالینە گەشمەرڎۍ بیۍ، بە حۆرمەت و ڕێزدارییوە یاڎشا مارمۍ. حەرپاسە جارێوەتەر وەعدما واوەی مکەرمېوە کە کۊشیای ئازاڎیی ئا گەلەی کە گیانوو ۋێشا پەیش فیدا کەرد، بیاونمێش بە سەرکەوتەی.