هامسەرۆکایەتیی مەجلیسوو کۆنسەی ڕاوەبەری کەجەکەی سەبارەڎ بە هۊرچنیە دلێینەییەکا ٣١و ئاداری بەیاننامێوەش وەڵاکەردۆ و ئەرەیاۋناش کە ئاکەپە – مەهەپە تەنانەڎ مەبۆ دەنگێوەیچ بەدەس بارا. مشۊم کەس نەگنۆ دلۍ دوبەرەکی و دەنگ بە کەسێوەتەری بڎۆ جگە جە کاندیدەکاو گەلی.

جە بەیاننامەکەو کەجەکەینە ئاماژە پانەی کریان کە گرڎ جۆرە فشار و فێڵ و تەڵەکێوە بەکار مۍ هەتا کاندیدەکاو دەم پارتی کوردسانەنە سەرۍ نەگنا، حەرپاسە ئاماژە پانەی کریان پۍ ئانەی ئی فشار و فێڵ و تەڵەکۍ  پووچۍ کریاوە، پێویسا گەل بە بەشداریێوە بەقوەتتەر بلۆ سەروو سنووقەکا دەنگدای.

کەجەکە بانگەوازش کەرد:کە "ئاکەپە-مەهەپە و هامبەشەکێش گەرەکشانە بە فشاروو، ساختەکاری و پیلانگێڵنی، دەسەڵاتوو قەیومەکاو شارەوانییە ئەرەگیرکریاکا کوردسانی، ئاسایی ویاسایی بکەراوە". گەلوو سەرنیشتوو کوردسانی مەبۆ ڕا بە چێوۍ چانەی بڎۆ."

دەقوو بەیاننامەکەو کەجەکەی پی جۊرەنە:

"پێسە مزانمۍ ٣١/٣/ ٢٠٢٤ هۊرچنیەی شارەوانیەکا جە تورکیا و سەرنیشتوو کوردسانینە ملۊڕاوە، گەلوو سەرنیشتوو کوردسانیچ گرنگی پی هۊرچنیەیە مڎا و گەرەکشانە بە کاندیدی وڵاتپارێزی و دیموکراتیکی ۋێشا بەشداریی جە هۊرچنیەکانە بکەرا. ئیمەیچ هاموەخت پەشتیوانی جە داواکاو گەلوو سەرنیشتوو کوردسانی کەرمۍ و گەرەکمانە ئەنجامێوە گۊرە بەدەس بارمۍ. ئێمە سیاسەتی دیموکراتیکی پێسە مێڎانێوە گرنگی موینمۍ. مێڎانوو سیاسەتی دیموکراتیکی بەرئەنجاموو کۊشیای گەلەکەیمانە. جە وەشکەردەی ئی مێڎانەینە و بەردەوام بیەیش تا ئارۆ گەلەکەما بە هەزاران گەشمەرڎێش دێنۍ. بە ڕەنج و کۊشیای قیمەت بەدەس ئامان و پارێزیان. ڕاوەبەریە هەرێمییەکۍ پۍ سیاسەتوو دیموکراتیکی و دیموکراسی گرنگی تایبەتیشا هەن حەرپاسە پۍ گەلەکەیما کە پەی ئازاڎیی و دیموکراسی کۊشیای مکەرا. هۊرچنیەی گرڎیی و دلێینەی بەردەوام جە ڕوو بەربڕیەی ھەڵوێس و ئیرادەی سیاسی گەلوو کوردسانیوە پێگێوە گرنگش بەدەس ئاردەن. گەلوو کوردی دژوو کۆمکوشی و ستەمی پەی بیەی و ئازاڎیی کۊشیای فرەش ئەنجام دان. دەوڵەتوو ئەرەگیری تورکیای دەیان ساڵێن حۊڵوو دلێنەبەردەی بواری سیاسی دیموکراتیکی و دوور وستەیۊیش مڎۆ. پۍ ئانەیچ پەناش پۍ فشاری، ڕەشبگیری، دەربەدەری، کۆمکوشی و گرڎ جۆرە کارێوە نامرۆڤانەی بەرۆ. جە ڕاو ژیتەمی و حیزبولکۆنترایۆ هەزاران کوشتەی و بێسەروشۆن کەردەیشا کەردێنۍ و وڵاتپارێزنێشا گەشمەرڎۍ کەردێنۍ. بەڵام نەتاواش گەلوو کوردی جە مێڎانوو سیاسەتی دیموکراتیکی دوور وزاوە. بەڵکم گەل جە مێڎانوو سیاسەتی دیموکراتیکینە مدرامانش کەرد و دەسبەرداروو هەڵوێست و خەتەو وڵاتپارێزنی و دیموکراتیکی نەبیەن و سازشش نەکەردەن. ئێمە ئینەی بە گرنگ و بەقیمەت مزانمۍ و چێنە دیسان گرڎوو گەشمەرڎا دیموکراسی پێسە ڤەدات ئایدینی و ئاپێ موسای یاڎ مارمێوە.

موینمۍ کە کاندیدەکاو دەم پارتی جە سەرنیشتوو کوردسانی و تورکیاینە، جۆش و خرۆشێوە گەورە وەش کەرا. دەم پارتی سەرنجوو گەلەکەیما پۍ لاو ۋێش کێشۊنە و بە هەڵوێس، بەرنامە و کاندیدەکاش جە هەر یاگێنە با جە کوردسان یان جە تورکیانە پەشتگیریش ۋنەکەرا. دماو هۊرچنیە گرڎینەییەکا ١٤و ئایاری، سەردانیکەردەی گەلی و دەسپنەکەردەی پرۆسەو دیموکراسی ئەنجامی گرنگش چنەکۊتۆ. یۆ چا ئەنجاما ئانە بۍ کە کاندیدەکۍ جە تەرەفوو گەلیوە جە ڕاو شیوازوو هۊرچنیەیۆ وەڵۍ هۊرچنیەکانە دیاری کریۍ. ئینە ڕێوە فرە دروسە و دیموکراتیکە بۍ و ڕای گرڎیی ئی ڕێشە بە خاس زانا و پەشتیوانیش ۋنەکەرد. ئینە یۆن جە مەڵامەتەکا مەسڵەحەتوو گەلوو کوردی. دەم پارتی سەروو بنەماو سیستموو هامسەرۆکایەتی کۊشیای مکەرۆ و بە کاندیدوو هامسەرۆکی شارەوانییوە دلۍ گەلینە بەرکۊتێنۍ و بانگەشەشا کەردەن، ئینەیچ جە تەرەفوو گەلیوە پەشتیوانیش بەدەس ئارد.

حکوومەتوو فاشیستی ئاکەپە-مەهەپەی گەورەتەرین فشارش وستەن سەروو بوارەکا سیاسەتی دیموکراتیکی. چونکی حکوومەتوو ئاکەپە-مەهەپەی مەشغوڵێنۍ بە کورد کوژییوە، فشار، ڕەشبگیری، هەڕەشۍ، گێرتەی، کوشتەی، سیاسەتوو سەرکوتی و دلێنە بەردەی گەلوو کوردی، گرڎ جۆرە شێوازێوە پیس بەکارمارا. نیایرەو قەیومەکا قولەپۊپەو ئی دوژمن کارییەینە. جە چوارچێوەو سیاسەتوو کۆمکوشی کوردینە، پەرە بە قەیومی مڎا ئینە دەسگێرتەین سەروو ئیراڎەو گەلوو کوردیرە، ۋێش جە ۋێشەنە نکوڵیکەردەی و دلێنەبەردەین. تەیب ئەردۆغان و حکوومەتوو ئاکەپە-مەهەپەی بە نیایرەو قەیومەکا جە شارەکاو کوردسانینە سەلەمناشا گەلوو کوردی ئینکار مکەرا و گەورەتەرین دوژمنوو کوردانۍ. گەلەکەما فرە عال چی حەقەتینەیە میاوۆنە. جە نەورۆزەنە هەڵوێسوو ۋێش نیشانەدا. گەلەکەما جە نەورۆزەنە دۆسا کوردیش شاڎۍ کەردۍ و دوژمنی زاڵم و نکۆڵیکارش تووڕە کەردەن. ئاشکران کە ئی هەڵوێسە جە هۊرچنیەکا ٣١و ئاداریچەنە بەرگنۆ. ئێمە دووۍ مژارۍ بە گرنگ مزانمۍ و گەرەکمانە سەرنجشا وزمۍ سەر. سەرەتا ئی هۊرچنیۍ بە دڵنیاییوە جە ئاژێوە دیموکراسینە ئەنجام مەڎریا. فشار سەروو گەلی و ئەرەمەرزیا دیموکراسیەکا یاوان بە قولەپۊپە. گرڎوو ڕێکوزیا و دەزگاکاو دەوڵەتی سەرەنجشا ئینا سەروو کوردسانیۆ، گرڎ جۆرە فێڵ و فشارێوە کریۆ پۍ ئانەی کاندیدەکاو دەم پارتی سەرۍ نەگنا. سەڎان هەزار سەروازۍ و پۆلیسۍ و فەرمانبەرۍ ئاردێنێشا پۍ شارەکاو کوردسانی، چا ئەرەنیشتۍ کریێنۍ پۍ دەنگدای. ئینە ئانەی نیشانە مڎۆ کە هۊرچنیەی جە ئاژێوە جیاوازەنە ملۊڕاوە، پێویسا گەل بە بەشداریێوە بەقوەتتەر بلا سەروو سنووقەکاو دەنگدای پۍ ئانەی پیلانە و فێڵەکا پووچۍ بکەراوە. مشۊم ئاکەپە-مەهەپە و هامبەشەکێشا نەتاوا یەک دەنگ جە گەلەکەیما ئیسفاڎە بکەرا. مەبۆ کەس تووشوو دوبەرەکی بۆ، جگە جە کاندیدەکاو گەلی دەنگ بە کەسی تەری نەڎا. پێویسا ئا کەسۍ قەناعەتشا پنەکریۆ، گومانەشا نەبۆ، هۊرچنیەی بە یەک دەنگ ئەنجام مڎریۆ. جە لێوەتەریچۆ بەدڵنیاییوە مشۊم گەل و ۋەرپرسیارا پارێزنای جە دەنگەکا و سنووقەکا بکەرا. ئاکەپە-مەهەپە و هامبەشەکێش گەرەکشانە بە فشار، ساختەکاری و پیلانگێڵنی، گەرەکشانە دەسەڵاتوو قەیومەکا جە دەس گێرتەی سەروو شارەوانییەکارە، ئاسایی و یاسایی بکەراوە. مشۊم گەلوو سەرنیشتوو کوردسانی ڕا پی هەرمانۍ نەڎا.

دووەم: جوابێوە فرە بەقوەت بڎریۊوە بە هامکارا، خیانەتکارا و گروپ و مرۆڤکوژەکا کە ۋێشا بە دوژمنی ورەتەن و شۊنەو موڵک و ماڵی کۊتێنۍ. مەبۆ حیچ کوردێوە بە ڕووەشیۆ چی خائینا نزیک بۆوە. ئی پێکئامایۍ کە حۊڵ مڎا ۋێشا پێسە کوردی نیشانە بڎا، دەسێشا بە ۋنەو گەلەکەیما سوورۍ بیێنۍ و پۍ ئانەی کۊشیای ئازاڎیی سەرنەگنۆ، کردەوە کوشندەکاو دەوڵەتی جابەجی مکەرا. فرە گرنگا گەلەکەما بە یۊگێرتەیی ۋەرا ۋەروو ئا گروپا مرداوە و جوابی پێویسشا بڎاوە.

پی هەست و هیوا و باوەڕییوە داوا جە گەلەکەیما مکەرمۍ کە بە بەشداریشا جە هۊرچنیەکا ٣١و ئادارینە، هیواو سەرکۊتەی پۍ گەلەکەیما و کاندیدە دیموکراتیکەکا موازمۍ.