هامسەرۊکایەتیی دەسەو ڕاوەبەریی کەجەکەی، ئەرەیاوناش، "دەوڵەتی تورکی ئەرەگیرکەری قڕکەر وەرەچەماو گرد لاێوە تاوانوو جەنگی کەرۊ" و داواش وەنەو گرد کەسێوە کەردە، کە دژوو هجووم و تاوانە جەنگییەکاو دەوڵەتوو تورکی هەڵوێستشا بۊ و گنا جموجووڵۊ.
هامسەرۊکایەتیی دەسەو ڕاوەبەری کەجەکەی سەبارەت بە هجوومەکاو دەوڵەتوو تورکی ئەرەگیرکەری پەی سەروو وەرنیشتی ئەرەیاوناێوەشا وەڵا کەردۊ.
کەجەکە واتش، "دەوڵەتوو تورکی چوارچوەو پلانە قڕکارییەکاشنە ١٣ کانوونوو دووەموو ٢٠٢٤ هجوومۍ کەرۊ سەروو وەرنیشتی و ٤ ڕوێن ئا هجوومی سەرەمڕ هەنێ. پێسە وەڵتەری هاموەخت چەنی هجوومەکاش پەی سەروو خەڵکی، ناوەندە ئەرەەنیشتەییەکا چێرخان و سەرخان، ناوەندەکاو بەرهەمئاردەی، ناوەندەکاو واردەی و وزە، کۊگا، سایلۊ، خەسەخانە، مەکتەب و ئانە کە دەسنیشان کریابۊ، گردش بە فرۊکەی جەنگی و درۊنۍ بۊردومانۍ کەردێنێ. ئێمە ئا هجوومە نامەردانا و دڕنداناو دەوڵەتوو تورکی ئەرەگیرکەری قڕکەری بەتندی شەرمەزار کەرمێ. دەوڵەتوو تورکی ڕاو ئا هجووماوە جارێوە تەر بە تەماموو جیهانیش نیشانە دا کە چە ئاستێوەنە دوژمنوو کوردین، دوژمنوو گەلان، جە ئینسانیەتی و ئەخلاقی ماڵیانەرە".
جە ئەرەیاونایەکەینە ئامان، "ئێمە ف رەو ئەرەیاونای و قسەکامانە وزمێش ڕووە، کە دەوڵەتوو تورکی ساعیبوو چە مەژگێوە دوژمنکارانەین وەرانوەر بە کوردی، چوارچوەو سیاسەتوو قڕکەردەی کوردانە گەرەکشا وەرنیشتی ئەرەگیر کەرۊ، ئا ڕاسییەو وێش بە گرد لەونۍ سەلەمنان. دلۍ دەوڵەتوو تورکی و حکومەتوو تەیب ئەردۊغانینە، دوژمنایەتیی وەرانوەر کورداوە پێسە نەوەشییش سەر ئامان. ئا مەژگە نەوەشە کە پێسەن لکێوە گەورێ، زەرەرەکێش ڕۊ دماو ڕۊی زیاتەرۍ با. بڕیەیۊ و فڕەدای مەژگەکەی نەک جە بەرژەوەندیی گەلوو کوردی، هەمان وەخیت بە قازانجوو گەلاو تورکیا، وەرکەوتوو دلێڕاسەی و تەماموو ئینسانیەتین ".
دەوڵەتوو تورکی وەرەچەماو گرد لاێوە تاوانوو جەنگی کەرۊ
هامسەرۊکایەتیی دەسەو ڕاوەبەریی کەجەکەی سەرنجەش پەی ئی بابەتا کێشتە:
"دەوڵەتوو تورکی قڕکەری وەرەچەماو گرد کەسیوە تاوانوو جەنگی کەرۊ. هجوومەکاو سەروو وەرنیشتی گنا دلۍ خانەو ئا تاوانە جەنگییاوە. پا کۊکوشییا، تاوانوو جینۊسایدی کەرۊ. بۊردومانوو کۊگایەکاو واردەی، وێستگەکاو کارەبێ، ئاوۍ و وزەی، بۍ کارەبا، بۍ ئاو، بۍ نان، بۍ سۊتەمەنی ئاستەیوە شارەکا گەورەتەرین تاوانوو جەنگین. دەوڵەتوو تورکی وەرەچەماو جیهانیوە فرەو جارا تاوانوو جەنگی کەرۊ. وەلۍ جیهان وەرانوەر پانەیە بێدەنگا. ئا هەڵوێستە مایۍ قبووڵکەردەی نییا. بێدەنگی وەرانوەر پا هجووماو دەوڵەتوو تورکی هامبەشیین چا تاواناو جەنگینە و تاوانەکاو جینۊسایدوو دەوڵەتوو تورکی. ئا هەڵوێستە تاوانا و حیچ جیاوازیێوەش چەنی کردەوەکاو دەوڵەتوو تورکی نییا. بەتایبەتی مشۊم نەتەوە یۊگێرتەکۍ وەرانوەر پا هجوومە نائینسانانا و تاوانە جەنگیاو دەوڵەتوو تورکی مرداوە. ئانەیە قبووڵ نەکەرا و ڕا گێرارە وە. ڕێکوزیا میاننەتەوەییەکێچ مشۊم هەمان هەڵوێستشا بۊ، وەرانوەر بە هجوومی ئەرەگیرکەرانە و زەوتکەردەی دەوڵەتوو تورکی مرداوە. سەرنیشت و وەرکەوتوو سوریاینە هێزێوە هامپەیمانا هەن، کە زیاتەر جە ٧٠ وەڵاتا گێرۊ وێش ئەگەر دژوو هجوومەکاو سەروو وەرنیشتی نەمرداوە چێش کەرا چاگە! دەوڵەتوو تورکی بە سیاسەتەکاش تەنیا زەرەر بە گەلوو کوردی مەیاونۊ زەرەر بە تەماموو مەنتێقەکەی میاونۊ. حکومەتوو تەیب ئەردۊغانی گەرەکشا وەرکەوتوو دلیڕاسەینە پەرە بە جەنگی بدۊ، قووڵتەرش کەرۊوە و گرد یاگێنە وەڵاش کەرۊوە. سیاسەتەکەش چانەن. گەرەکشا گرد لێوە پەلکێشوو دلێش کەرۊ کوردا دژوو یۊترینی بدۊ جەنگ، بە هجوومەکاش پەی سەروو عێراق، سوریا، پانیشتی و وەرنیشتی گەرەکشا پێسە کەرۊ. ئێمە چێوە جارێوە تەر داوا وەنەو نەتەوە یۊگێرتەکا، ڕێکوزیا میاننەتەوەییەکان، دەوڵەت و هێزەکاو هامپەیمانا وەرنیشتنە کەرمێ، کە وەرانوەروو ئا هجووماوە و تاوانەکاو جەنگیوە ئیتر بێدەنگۍ نەبا، وەرانوەروو ئانەیەنە هەڵوێستشا بۊ.
گەلوو وەرنیشتی تا ئیساتۍ ێستا وەرانوەر بە هجوومەکاو دەوڵەتوو تورکی مدرامان و هەڵوێستی پێویسش نیشانە دان. سڵام جە هەڵوێستی وێگیرانەو گەلوو وەرنیشتی کەرمێ. دەوڵەتوو تورکی ئەرەگیری قڕکەری پا هجووما گەرەکشا گەلاو وەرنیشتی و سەرنیشتی- وەرکەوتوو سوریای شکس بدۊ، پێسە ناچارێشا کەرۊ کە زێد و نیشتمانوو وێشا جیا بازا. گەرەکشا پێسە پلانە قڕکارییەکاش بیاونۊ یاگێ. ئامانجی سەرەکییش چا هجووما ئینەنە. خەڵکوو وەرنیشتی بە هۊشیاری و هۊشمەندیی ئازادییوە، کە هاگاش چا ڕاسییە هەن، مشۊم یۊگێرتەیی و مدرامانیش قەوەتتەر کەرۊ، هەڵوێستوو وێش درێژە پەنە بدۊ و ئا پلانۍ دوژمنۍ جە بار بەرۊ. بییەی و مردنای هجوومەکا و ئازادی تەنیا بە کۊشیای مسۊگەر بۊ. گەلوو وەرنیشتی، کە هاگادارۍ ئانەینۍ میاوناش یاگێ، مشۊم بەردەوامۍ با سەروو ئا هەڵوێستەیە.
دەوڵەتوو سوریا ی مشۊم وەرانوەروو هجووم و تاوانە جەنگییەکاو دەوڵەتوو تورکینە هەڵوێستشا بۊ قبووڵش نەکەرا. یۊبییەی، ڕزگاری و ئازادیی سوریای بە مردایوە وەرانوەروو هجوومەکاو دەوڵەتوو تورکی و چەتەکاش مسۊگەر بۊ. پەوکای مشۊم دەوڵەتوو سوریای دژوو هجوومە ئەرەگیرکارییەکا، دەسملەرەگێرتەی خاکەکەیش و قڕکارییەکاو دەوڵەتوو تورکی چەنی گەلاو وەرنیشت و سەرنیشت –وەرکەوتوو سوریای جووڵیاوە و کۊشیا. هاموەخت ڕای گردین و دەوڵەتاو عەرەبیچ مشۊم ناڕەزایەتی دژوو هجوومەکاو دەوڵەتوو تورکی نیشانە بدا، قبووڵش نەکەرا، وەرانوەرش مرداوە و هەڵوێستشا بۊ.
گەلوو کوردی مشۊم کوردستاننە و بەروو وەڵاتیچۊ گنا دلۍ جموجووڵیوە
گەلوو کوردیچ چوارپارچەو کوردستانینە و بەروو وەڵاتیوە مشۊم پەی وەرنیشتی گنا جموجووڵ و خاوەنداری جە وەرنیشتی کەرا. دۊس و هێزە دیموکراتیکە شۊڕشگێڵنەکێچ چەنی گەلوو کوردی پەشتیوانیینە بەشدارۍ با و خاوەنداری جە شۊڕشوو وەرنیشتی کەرا. شۊڕشوو وەرنیشتی میراتی هامبەشوو تەماموو ئینسانین. بەتایبەتی شۊڕشگێڵنێ، سۊسیالیستەکێ، گەل، ژەنی و گردوو هێزە دیموکراسیوازەکا مشۊم هەڵوێستی قەوەت نیشانە بدا، جە ڕاو ئا هەڵوێستیوە فشارێوە سیاسی ساز کەرا و پاسە کەرا، کە گرد کەس هەڵوێستش بۊ، وەرانوەروو هجوومەکاو دەوڵەتوو تورکیوە، کە ١٣ کانونوو دووەموو ٢٠٢٤ هەنۍ و بەردەوامێنێ، بێدەنگی ئیتر مایۍ قبووڵکەردەی نییا. ئێمە هجوومەکاو دەوڵەتوو تورکی کە دژوو ئینسانیەتینۍ جارێوە تەر بەتندی شەرمەزار کەرمۍ و داوا وەنەو گرد لێوە کەرمێ، کە وەرانوەروو هجووم و تاوانە جەنگییەکاو دەوڵەتوو تورکیوە وەرپەرسانە جماوە و هەڵوێستشا بۊ".
