کەجەکە ئاماژەش پانەی کەرڎ، لکەدریای هجومەکا قڕکەرڎەی بە چالاکییەکەو ئەنقەرەیۊ، چەواشەکەرڎەین. کەجەکە ئەرەیاۋناش، دەوڵەت و ئەرەمەرزیا میان نەتەوەییەکۍ بە پەشگیری دەوڵەتوو ترکی بانۍ بە هامبەشوو سیاسەتوو قڕکەرڎەی کوردا و داواش جە گەلی کەرڎ چالاکی ئەنجام بڎا.
هامسەرۆکایەتی دەسەی ڕاوەبەری کۆما جڤاکێن کوردسان (کەجەکە)ی پەیوەس بە هجومەکا قڕکەردەی سەروو سەرنیشت و ۋەرکەوتوو سوریای ئەرەیاۋنېوە نۋیسیاش ۋەڵاکەرڎۊ.
ئەرەیاۋناکەو هامسەرۆکایەتی دەسەی ڕاوەبەری کەجەکەی، پی جۆرەنە:
"ماوەو چن ڕووېوەن ئەنڎاما دەسەڵاتی فاشیستی بەتایبەت سەرمەشقوو فاشیستی تەیب ئەردۆگان هەڕەشۍ هجوم و کۆکوژی جە ۋەرنیشتی کەرا. جە ئارۊوە هجومی ۋەرفراوان جە دژوو ۋەرنیشتی و سەرنیشتی و ۋەرکەوتوو سوریای ئەنجام مڎریۊ. ئی هجومۍ نەک تەنیا گەل، بەڵکو سیستمی ژیۋای گلېرگەیچش کەرڎ ئامانج. چا هجومانە فرەو کەسی گیانشا جە دەسدا و زامدارۍ بیۍ، فرېوە جە بەنداو و ئەرەمەرزیا و کارگەکا جە لایەن و فڕۆکە جەنگییەکاوە بۆردومان کریۍ. ئی هجومە نامرۆڤانەو دەوڵەتوو تورکی بە تنی شەرمەزار کەرمۍ. پەنەوازەن گرڎ لایۍ ئی هجوما شەرمەزار کەرا و هەڵوێسشا بۊ. ئی هجومە قڕکەردەیۍ ئاشکرا و تاوانەنە دژ بە مرۆڤایەتی. ئینسان جە ۋەران ۋەروو تاوانێوە پا جۊرەینە مەتاۋۊ بێدەنگ بۊ، مەبۊ ڕاش پنە بڎریۊ.
ئەردۆغان بە دوژمنایەتی کورڎا ژەعراوی بیەن
دوژمنایەتی ۋەران ۋەر بە کورڎا جە تەرەفوو دەوڵەتوو تورکی و حکومەتوو ئاکەپە – مەهەپەیۊ یاوان بە ئاژەو و ئاستێوە تەر. پی زیهنیەتۊ تەماشەو جەهانی کەرۊ، جە حەر یاگېوەنە وەڵېکۊتەی بۊ بەنامۍ کوردایەتییوە هجوم کەرۊ، حۊڵ و هجومکەرڎەی و دلېنەبەرڎەو گرڎ چېوۍ مڎۊ کە نامۍ کوردایەتی هۊرگېرۊ. ۋەروو ئی مەڵامەتیە گۊش مەڎۊ بەحیچ سنوور و ڕێسېوە و یاسېوە. بێگومان ئی دەوڵەتە نەوەشا. تەیب ئەردۆغان بەمەڵامەتوو دوژمنایەتی کورڎیوە ژەعراوی بیەن و ئی هجومە جە چەنی دایوەنەو ئی ژەعرەیە زیاتەر نییا. ۋەروو ئانەی سیاسەتی دیموکراتیک و ڕای گردی جە تورکیا ئینا چېروو فشارێوە فرەینە، ئا ڕۆشنۋیر و هونەرمەنڎ و ڕۆنامەنۋیسا ڕەخنە جە غەڵەتەکا گېرا و ڕاسی ئاشکرا کەرا، گیریا و بێدەنگ کریا. زیهنیەت و سیاسەتەکا فاشیزمی ئاکەپە-مەهەپەی کە پەشتی بە حیچ لۆژیکێوە مەبەسۊ، پېسە چېوۍ ڕاسی، وزیا وەڵۍ گلېرگەو تورکیای. حەرکەسێ گەرەکش بۊ واچۊ پاسە نییا، دەمودەس سەرکوت کریا و دەسبەسەر کریا و کپۍ کریا، حەرپاسە ئا کەسۍ کە حەوت ڕووۍ و ویس و چوار سەعاتۍ خەبات جەنگ کەرا و پەسەنوو سیاسەتی فاشیستی کەرا و بە ڕەواش مزانا، ۋەروو دەموو بەرنامە تەلەفزیۆنییەکانە بەرگنا و قسۍ کەرا . پی جۊرە پاسە ۋیرکەراوە کە متاوا پی جۊرە ڕاسی فاشیزمی لاو گلېرگەیۊ پەسەن کەرا و سیستمێوە چەوەسیایۊ سەروو بنەماو دروا بنیاڎ بنیا. بەڵام پاسە وینیۊ پا چالاکییەی جە ئەنقەرەنە ڕووەشدا، درووۍ حکومەتوو ئاکەپە-مەهەپەی و ئانۍ حۊڵشادا جە ڕاو جەنگی ٢٤ سەعاتیۊ فاشیزمی سەروو گلېرگەو تورکیایرە سەپنا، ڕووەی ڕاستەقینېشا بەرکۊتە. چونکی ئی چالاکییە ئا فەرمانۍ کە سەروو بناغەو درووا بنیاڎ نریابۍ، ئەسەڕیشۊ، کاروەداکەی فرە بۍ. جە ڕاسینە جەنگەکە تەنانەڎ پۍ یەک دەقەیچ نەمردا. حکومەتوو ئاکەپە-مەهەپەی ئی جەنگەیە سەپنۊ. ئانەی ماچۊ گرڎ چېوۍ بە جەنگ چارەسەر بۊ، دەوڵەتوو تورکین. ئاڎېنۍ فەخر پانەیۊ کەرا کە ڕووانە چن کوردۍ کوشا. گەلوو کورڎی جە ۋەران ۋەروو قڕکەرڎەینە ۋېش پارېزنۊ و مدرامان کەرۊ. گەلوو کورڎی ملکەچوو فاشیزمی و قڕکەرڎەی و ستەمی مەبۊ. جە گرڎ هەلومەرجێوەنە مدرامان کەرۊ و بیەو ۋېش پارېزنۊ.
لکەدایشۊ بە چالاکییەکەو ئەنقەرەیۊ، چەواشەکاریین
ڕۊشنکەرڎەیۊ هجومەکا سەروو ۋەرنیشتی بە چالاکییەکەو ئەنقەرەیۊ، چەواشەکاری و بەهانېنە. حکومەتوو تورکی بە کۆکوژی و کۆچبەرکەردەی کورڎی قەراروو ئەرەگیرکەرڎەو ۋەرنیشتیش دان. دەوڵەتوو تورکی و حکومەتوو ئاکەپە-مەهەپەی ئی قەرارشا دان. ئینە ڕاستییەکەن، چانەی زیاتەر گرڎ دروېنە. چن ڕووۍ چېوەڵتەر سەرمەشقوو فاشیستەکا تەیب ئەردۆگان بە ڕۊسنی ئینەس ئاشکرا کەرڎ و ئەرەیاۋناش کە ئەرەگیرکەرڎەو ۋەرنیشتی مژاروو ئاماڎەکاری و وەختی و هەلومەرجین. پۊکەی هجومەکۍ بەشێوەنۍ جە قڕکەرڎەی کورڎی. پەنەوازەن گرڎوو گەلوو کورڎی و هەم ڕای گرڎی ئی ڕاسییە عال بزانا. جە ۋەران ۋەروو ئی ڕاسییەینە، نزیکایەتیی کەسی و وەرچەمنەگېرتەی ئی چېوەیە قبووڵ مەکریۊ.
مەبیدۍ بە هامبەشوو سیاسەتوو قڕکەرڎەی کورڎا
ئاشکران جەهان بە هجومەکا دەوڵەتوو تورکی پۍ سەروو گەلوو کورڎی تاقی کریۊوە. ئینسان چن ڕاستگۆ و بەویژدان بۊ، ئانە بە هەڵوێسش ۋەران ۋەر پی ڕاسییە دیاری کریۊ و پەیوەسا بە داڎپەروەرییۊ. تا ئیسە حیچ ئەرەمەرزیېوە و دەوڵەتێوە میان نەتەوەیی بەڕسمی، بەتایبەتی نەتەوە یۊگېرتەکۍ، ڕەخنەشا چی هجوما دەوڵەتوو تورکی نەگرتەن و هەڵوێسی جددیش هۊرنەگېرتەن. بە پێچەوانۊ، بە شێۋېوە ڕاسەوخۆ یان ناڕاسەوخۆ پەشتیوانیشا جە سیاسەتەکا دەوڵەتوو تورکی کەرڎەن. دەوڵەتوو تورکی پی پەشتیوانیا ئی هجوما ئەنجام مڎۊ و سیاسەتوو قڕکەرڎەی کورڎا جابەجۍ کەرۊ. جارێوەتەر داوا جە ئەرەمەرزیا و دەوڵەتە میان نەتەوەییەکا و بە تایبەت نەتەوە یۊگېرتەکا کەرمۍ، پەشتیوانی چی هجوما دەوڵەتوو تورکی نەکەرا و هەڵوێسۍ ڕۊشن جە ۋەران ۋەروو ئا هجومانە نیشانە بڎا. نەنەتەوە یۊگېرتەکۍ، نە ناتۆ، نە حیچ دەوڵەت و ئەرەمەرزیېوە مەبۊ پاڵپەشتی دەوڵەتوو تورکی کەرا و بانۍ بە هامبەشوو سیاسەتوو قڕکەرڎەی کورڎا.
پەنەوازەن هەڵوێسی گۊرەتەر نیشانە بڎریۊ
داوا جە گەلوو وڵاتپارێزوو کوردسانی و گرڎوو هێزە دیموکراتیکەکا جەهانی کەرمۍ؛ پەنەوازەن دەموودەس و خېرا هەڵوێسېوە گۊرەتەر نیشانە بڎا جە ۋەران ۋەروو هجومە قڕکەریەکا دەوڵەتوو تورکینە. فاشیزم ته نیا جە ڕاو ڕێکوستەی و چالاکیی دیموکراتیکیوە مردۊ و سنووردار کریۊ و دلېنەبریۊ. پېسە وینیۊ، جەهان جە دەوڵەتەکا پێکئامان؛ ئینەیچ ئیمتیاز مڎۊ بە دەوڵەتوو تورکی، جە ۋەران ۋەروو هەرمانەکاشەنە بێدەنگ بۊ، پەشتیوانی ئی قڕکەرڎەیە کەرۊ. پېسە جەهانێوە دیموکراتیکی و ڕای گرڎی مەتاومۍ ئینەی قبوڵ کەرمۍ. پەنەوازەن بە هەڵوێسېوە تن فشاری سیاسی وزمۍ سەروو دەوڵەتی و ئەرەمەرزیاکا و ناچارشا کەرمۍ دەسبەرداروو ئی هەڵوێستەیشا با. ئی نزیکایەتییە جە دەوڵەتی و ئەرەمەرزیا ڕسمیەکا قبووڵ مەکریۊ. سەروو ئی بناغەیە پەنەوازەن گەلەکەما جە کوردسان و بەروو وڵاتی و جە حەر یاگېنە بۊ، پەنەوازەن هۊربېزۊ سەروو پەیا و ناڕەزایی تن دژوو هجومەکا نیشانە بڎۊ. پەنەوازەن گەل، ژەنا، گەنجا، هێزە دیموکراتیکەکۍ و گرڎوو دۆسا دەس بە چالاکی کەرا پۍ پەشتیوانیکەرڎەی جەگەلوو کورڎی".
