کۆمیتەو پەیوەندییەکاو بەروو کەجەکەی داواێوەش ئاراستەو حکوومەتوو عێراقی کەردە، کە نەبۆ بە هامکاروو سیاسەتە چەپەڵەکاو دەوڵەتوو تورکی و جەختش کەردۆ، کە مشۆم گرنگی پا پەیوەندییە دۆسانەیە بدۆ کە بەرژەوەندیی گەلا وعێراقی بە بنەما مگێرۆ.
ئەرەیاونایەکەو کۆمیتەو پەیوەندییەکاو بەروو کەجەکەی ئینەنە:
"تورکیا و عێراق چوارەم کۆبییەیوەی وێشا بە نامێ 'ڕاکاریی ئەمنیی بەرز'یوە ئەنقەرەنە ڕێک وست. عێراق وەزیروو وەرگێری و حکوومەتوو هەرێمی وەزیروو دلێ سەروو بەشوو پەدەکەی بەشدارێ بیێ و ئینەیچ بەرش موزۆ کە کۆبییەیوەکەی بە چە ئامانجێوە و چە پەرسێوە ساز کریان. دماو کۆبییەیۆکەی وەزیروو بەروو عێاقی کە پەدەکەن پێسە دوا:" حەرهەڕەشێوە کە بکریۆ سەروو خاکوو عێراقی لاو وەڵاتە هامسایاوە یاگێ قبووڵکەردەی نییەنە، ئینە بنەما و پرەنسیپوو ئێمەن' فوئاد حسێن درێژەو قسەکاشەنە واتەنش' ئانە بە ماناو پارێزنای دەسەڵاتوو عێراقیچا'. یانێ بە تەسەورو فواد حسێنێ و حکومەتوو عێراقیچ بێ ئانەیە نامێشا ئاردەبۆ پەکەکەی پێسەو تەرسێوە موینانە. بەڵام پەکەکە حەرگیز دژوو یاسایەکاو عێراقی نەجمانۆ، گرد وەخت بەرژەوەندییەکاو دەوڵەتوو عێراقی و خەڵکەکەیش بە بنەما گێرتێنێ. دەوڵەتوو عێراقی و گەلاو عێراقیچ خاس ئانەیە مزانا، پەکەکە بە قوربانیدای گەورەوە دژوو چەتەکاو داعشی فاشیستی کۆشیان، گەلاو عێراقی و دەوڵەتوو عێراقی وێشا شایەنێ ئانەینێ، وەروو ئانەیە گەلاو عێراقی دۆسانە مامەڵە چەنی پەکەکەی مکەرا و دەوڵەتوو عێراقیچ سڵامش پەی ئا مدرامانەو پەکەکەی کیانان. راسییەکە ئینەنە یانێ ئیسە چەنی کتوپڕ پەکەکە بۆ بە تەرسی سەروو ئاسایشوو عێراقی و پاسە موینیۆ.
ئاشکران کە حکومەتوو عێراقی ئینا وێخەڵەتناێوی گەورەنە، خاکوو عێراقی بە سەدا و دەیا کیلۆمەترێ کە لکنیان و ئەرەگیر کریان، ئانە جوگرافیا و پانیشتی و عێراقی مسۆچنۆ، بەتەمامی سیاسەتوو دلێنەبەردەی سروشتی مکەرۆ، کاریگەریی نەرێیی سەروو ژیوای خەڵکو هەرێمەکەیوە وەش مکەرۆ و شناسنامەو هاموەڵاتا وشکنۆ و دەس وزۆ دلێ گرد چێوێ دەوڵەتوو تورکی ئەرەگیرین. ئانە جە موسڵنە خاوەندارییش وەنەو داعشی کەرد، هجوومەکێش ئاراستەو سوریای و وەرنیشتی کەردێ ئەردۆغان و دەوڵەتوو ئاکەپەینێ، بەبێ مۆڵەتوو عێراقی سەروازێش کیانێ بەعشیقە، پێسەو هێزێوی هەمیشەیی خاکوو عێراقینە نیێشرە و ئیساتێچ هێزەکاش زیاتەرێ مکەرۆ خاکوو عێراقینە دەوڵەتوو تورکین. دەوڵەتوو عێراقی کە گەرەکش نییەن ئینیشا بوینۆ، بە ماناو ڕازیبییەی مێ و بەتەمامی بێکاریگەر و ناچالاک و بێهەڵوێست مەنۆوە. هەڵبەتە ئی دۆخەیچە بەپاو حەقیقەتوو دەوڵەتێوە سەربەوێ و دەسەڵاتداری نییەن. وەروو ئانەیە دەسەڵاتداریی عێراقی بەڕسمی لاو دەوڵەتی ئەرەگیری و ئیمپریالیستیوە پاشێل کریان. حکومەتوو عێراقیچ هاگاداروو ئینەین و متاوۆ بە پاو مافە یاساییە میاننەتەوەییەکاش هورش بسەنگنۆ و دژوو دەوڵەتی تورکی ئەرەگیری هەڵوێست برمانۆ و جیای ئانەیە ئی نافەو وێش بەکار بارۆ ئیساتێ بەغدانە' ژووروو ئۆپراسیۆنی هامبەش دژوو تیرۆر'ی وەش مکەرۆ. چی ئاخریچۆ کۆبییەیوەی لووتەو ئاسایشی ئەنقەرەنە کریا، ئا قەرارێ چەنەش دریێ، بە ماناو پەسەندکەردەی ئەرەگیرکارییەکاو تورکی، هەمیشەییبییەی ئەرەگیری و پەشتیوانیی ئینەینە. چێگەنە بەرمگنۆ کە حکومەتوو عێراقی ئینا چەنی دەوڵەتوو تورکی ئەرەگیری و گەریلاکاو ئازادیی کوردسانی مکەرۆنە ئامانج. گەر ئەوەڵۆ حکومەتو عێراقی ئی هجووماو دەوڵەتوو تورکیشە پەی سەروو پانیشتو وکوردسانی وەشکەردەی دەیا، مەحاڵ بێ سەرەڕاو مافە میاننەتەوەییەکاش دەوڵوتوو تورکی ئەرەگیری هجوومێ زیاترێش بکەردێنێ و بەردەوام بیێ.
دەوڵەتوو تورکی ئەرەگیری بە سیاسەتی عوسمانیی تازەیوە هەوڵێ مدۆ سەروو وەرکەوتوو دلیڕاسەیوە کاریگەری وەش بکەرۆ، یۆ چانیشا عێراقا چندین هەرێمێ و وەڵاتێ پیسەو ویلاەتێوە وێش تەماشە مکەرۆ و ورگیروو لکەو ئیمپریالین. وەرکەوتوو دلێڕاسەینە قەیرانێ وەش مکەرۆ و پەرە بە بەرژەوەندییەکاو وێش مدۆ و سیاسەتی بنەڕەتیی دەوڵەتوو تورکی ئەرەگیرکارییا. پەوکای بەنائەخلاقانە دەسش هەن جە نیایوەی گرد ناکۆکیێوی ئەتنیکی و باوەڕینە. داوا وەنەو حکومەتوو عێراقی مکەرمێ نەبانە هامکارێ سیاسەتە چەپەڵەکاو دەوڵەتوو تورکی پپەنەوازا بایەخ بدانە بە پەیوەندییە دۆسایەتییەکا بە نۆعێوە کە بەرژەوەندییەکاو گەلاو عێراقی بە بنەما بگێرۆ."
