کەجەکە پەی کۆچی دماینوو رۆنامەوان جەلال باشلانگیچی جە پرسەنامێوەنە ئەرەیاۋناش: "ئێمە بە رێزۆ ۋەروودەم و هامڕایی ئاڎینە چنی گەلوو کوردی، واچەی ئازایانەو حەقەتینیەکا و بڕوابیەی بە کۊشیای دیموکراسی سەرەو ۋێما منامنمێرە".
جە ئەرەیاۋناکەو هامسەرۆکایەتی دەسەو ڕاوەبەری کەجەکەینە ئامان:
"بە خەم و پەژارێوە فرۆ هەواڵوو گیان جە دەسدای رۆنامەوان جەلال باشلانگیچیما پنەیاوا. سەرەتا سەرەوەشی جە بنەیانەی، کەسوکاری، هامڕایاش و گلېرگەو ئەرەیاۋنکارا مکەرمۍ.
بە دڵنیاییوە جە دەسدای دۆسێوە دڵسۆزی پا جۆرە کۆسێوە گەورەن. جەلال باسلانگیج بە هەڵوێس و کۊشیای ۋێش ئانەش نیشانە دا کە مردای جە یاگۍ درووسەنە بە چ شێوێوەن و پی جۆرە بی بە ئینسانێوە بەقیمەتوو کۊشیایما. جە دژوارتەرین وەختەکانە چنی کۊشیای گەلوو کوردی بۍ، جە وەختێنە کە گرڎ کەسۍ ۋێش چا کۊشیایە دزێوە یان چەمێش ئاستشەنە قوجنێنۍ. بە بێ سڵەمایۆ گرڎوو ئێش، دژواری و کۆمکوشیەکا کە سەروو گەلوو کوردیرە ئامێنۍ، نویستێوە و گێڵنێشۆ. تاوانۍ فرۍ دەوڵەتیش کوردسانەنە ئاشکرۍ کەردۍ و جە بارەو حەقەتینەکاوە رای گرڎینش ئاگاڎار کەردۆ. جە ڕاو ئاشکراکەردەی تاوانەکاو دەوڵەتوو تورکی جە کوردسانەنە یاردیدەرێوە گەورە بۍ پەی ئانەی راسی دەوڵەتوو تورکی بوینیۆ. بی بە دۆسێوە راس و دروس و گەلوو کوردی. ۋەروو ئانەی راسی واچۍ و چنی کۊشیای رەواو گەلوو کوردی بۍ، جە تەرەفوو دەوڵەتیوە فشار و سزاش سەرەرە سەپیا، بەڵام حەجگیز سەرەش ۋەروو دەموو هیچ فشار و هەڕەشێوەنە نەنامنارە و دەسبەرداروو مردای پاڵ و راسی و ئاشکراکەردەی راسینە نەبی. بی بە خاوەن هەڵوێس و کۊشیایۍ پا گیرانە و قەراردارانە.
دۆسی بەقیمەتوو گەلەکەیما و ئینسانی کۊششکار جەلال باشلانگیچ پەی ئەرەیاۋناو کوردیچ هامکاریۍ فرەش وستەبۍ گەڕ. تاساتە وەختوو گیان جە دەسدایچش بەردەوامبۍ جە پەشتیوانی جە ئەرەیاۋنای ئازاڎیی. پېسە مزانیۆ بەمەڵامەتوو پەشتیوانییەکاشۆ جە ئەرەیاۋنای ئازاڎەنە، رووبەڕوو فشاری و سزۍ بیۆ و پا مەڵامەتەیچۆ ناچار بی ڕووە بکەرۆ تاراوگە. جە تاراوگەیچەنە درێژەش بە هەڵوێس و کۊشیای ۋێش دا. ئەرەیاۋنای کوردی فرەو چێوانە قەرزاروو ئاڎیین.
بەڕێزۆ ۋەروودەم و هامڕایی ئاڎیینە چنی گەلوو کوردی، گێڵنایۆ ئازایانەو حەقەتینەکانە، بڕوابیەیش بە کۊشیای دیموکراسی و حۊڵەکێش چا مەجالەنە، سەرەو ۋێما منامنمێرە. جارێوەتەر سەرەوەشی جە بنەیانەی، کەسوکاری، دۆسا و گلېرگەو ئەرەیاۋنای ئازاڎیی و دیموکراتیکی مکەرمۍ".
