کۆنسەو سەرۆکایەتی گرڎیی کەجەکەی ئەرەیاۋناش، "٤و نیسانی ڕۊو جە ئەڎابیەی ڕابەر ئاپۆین کە تەمەنش بۆ بە ٧٥ ساڵۍ، جە ژەنا، گەنجا و  گرڎوو گەلوو کوردی و وڵاتپارێزنا و دۆساو کوردسانی پیرۆز بۆ."

جە ئەرەیاۋناکەو کەجەکەینە ئامان، "بە ڕێز و حورمەتێوە فرۆ مەحسوم کارائۆغلانی و مسەفا داغی، کە جە ٤و نیسانینە گەشمەرڎې بیۍ، یاڎ مارمێوە ئاڎۍ دووۍ ڕۆڵۍ قارەمانۍ گەلەکەیمانۍ کە بیۍ بە ڕەمزوو دڵسۆزی وڵاتپارێزنی پەی ڕابەر ئاپۆی."

ئەرەیاۋناکەی پی جۆرە بەردەوام بۍ؛

"ساڵانێوە فرەن گەلەکەما بە جۆش و خرۆشێوە فرۆ ٤و نیسانی پیرۆز مکەرۆ، ٤و نیسانی ڕۊو جە ئەڎابیەی ڕابەر ئاپۆیا، پەی گەلوو کوردی و ژەنا مەعنێوە قووڵەنە، ٤و نیسانی ڕووێوەن کە گەلوو کوردی جە زمسانێوە سەردۆ یاوا بە ۋەری، پێسە ئاودای خاکێوە وشکی پاسەن، پەی گەلوو کوردی و مزانی ژیۋایۊین، مزانی هۊرگێرتەیۆ شوناسوو ۋێشا کە لێواروو دلێشیەینە بۍ، مزانی ژیۋایۍ ئازاڎین.

٤و نیسانی ڕۊو ژیۋایۊین پەی گەلوو کوردی

٤و نیسانی پەی گەلوو کوردی پێسە ڕۊو جە ئەڎابیەی و ژیۋایۊین. جە ئەڎابیەو ۋێش پێسە ڕۊو جە ئەڎابیەیش موینۆ و پا جۊرە پیرۆز مکریۆ. چونکی پۍ کوردی وەڵۍ ٤و نیسانی هیچ جیاوازیێش چنی تاریکی قەبرسانی نەبۍ. گەلوو کوردی ڕووبەڕوو ستراتیجوو کۆمکوشی بیۆ. ڕاسی ژیۋای جە کوردسانەنە کە بە سنووری بایۆلۆجی سنووردار کریابۍ، ئی کۆمکوشییەشە ئانڎەی تەر قورستەر کەرد. جە چوارچێوەو ئا سنوورداریە بایۆلۆجییەینە 'نە ژیۋای و نە مەردەی' گەلوو کوردیش بە ئاژێوە مەحکوم کەردەبۍ کە جە مەردەی خراپتەر بۍ. ئی ئاژەی کە کورد چنەشەنە ژیۋۍ هامشێوەو زینڎە بەچالكەردەی ئینسانەکا بۍ. پۊکاتی یاڎوو جە ئەڎابیەی ڕابەری جە ٤و نیسانی پێسەنە مزانی پۍ ئا گەلەیە کە جە قەبرەنە بە زینڎەیی ئەسپەردە کریابۍ.

سەردەمێوە کە بە جە ئەڎابیەو ڕابەر ئاپۆی دەسش پنەکەرد، سەردەمێوە تازە پۍ گەلوو کوردی دەسش پنەکەرد. پاسشە کەرد گەلوو کوردی بیاوۆ بە ڕێخە و ڕیشەی تاریخی ۋێش و شوناسی گومبیەو ۋێش و بە شوناسی حەقەتینەو ۋێش یاواوە، جارێوەتەر چمێش ڕووەو ژیۋایۍ شکۆمەندانەیرە کەردۆ. جە سایەو ڕابەر ئاپۆینە گەلوو کوردی دلۍ گەلاو جەهانینە بی بە خاوەن قیمەتۍ. گەلەکەما بە دڕندەیی کۆمکوژی و زەحمەتی گۊرەش ۋەروو چەما ۋێشەنە باجێوە گەورەش دا و پی کۊشیایە ڕووانە ۋەرە ۋەرە گەشەش کەرد. چونکی هەستش پانەی کەرد کە خەتەو ڕابەر ئاپۆی تەنیا ڕاو ڕزگاری و ئازاڎینە و باوەڕش پنە ئارد. پۊکاتی زەحمەت و سەختی بی بە سەرچەمەو هەنگامەی شۆڕشگێڵنانەی تازۍ و جوانی پۍ بەدەس ئاردەو مافەکاش.

ئا ڕۆحەی ڕابەر ئاپۆ بە گەلوو کوردیش بەخشا، بی بە ڕۆحوو دیموکراتیکی، ڕۆحوو ئازاڎیی، ڕۆحوو برایەتی گەلا. جە کوردسان و ۋەرکەوتوو دلێڕاسەینە، کە سیستموو دەوڵەت نەتەوەی سەروەر بۍ و جە حۊڵوو بە یەک ڕەنگکەردەینە بۍ، بە ڕامان و کۊشیای ڕابەر ئاپۆی، ئاژەکە و تایبەتمەندییەکاش پێوەرە، پێسە کولتوورێوە دۆڵەمەنڎیی پۍ یۊبیەی گەلا سەروو بنەماو برایەتی وینیۍ. پێوەرە ژیۋای شوناس و کولتوورەکا جە کوردسان و ۋەرکەوتوو دلێڕاسەینە، سەروو بنەماو برایەتی گەلا، ئاژەکە سەرنجکێش و تایبەتا پەی مرۆڤایەتی. ئانەی ئی هەنگامێشە نیا، بیرۆکەو کۆمەڵایەتی و دیموکراتیکی ڕابەر ئاپۆیا کە دژوو ڕەگەزپەرسی، نەتەوەپەرەسی کۊشیایش کەردەن. بە مەعنێوەتەر بیرۆکەو ئاپۆیی سیستمێوە فیکرییا کە ۋێش جە گرڎ جۆرە ڕەگەزپەرسی، نەتەوەپەرسی و زایندەیی ماککەردۆ.

تێزەکاو ئازاڎیی ژەنا ڕابەر ئاپۆی زیاتەر ڕاو ژەنا کوردیش ڕۊشنەکەردۆ

تێزەکاو ئازاڎیی ژەنا ڕابەر ئاپۆی جە سەڎەو ٢١ینە زیاتەر ڕاو ژەنا کوردیش ڕۊشنکەردۆ. ژەناو کوردی بە تێزەکاو ئازاڎییوە کۊتێنۍ ڕا، بە کۊشیایشا جە کوردسان و ۋەرکەوتوو دلێڕاسەینە وەڵێکۊتەی جدی خوڵقنا. ئاستوو ئیرادەی گەورە کە ژەناو کوردی جە ڕەهەندی سیاسی، سەروازی و گلێرگەی خوڵقنانش، جە گرڎوو پارچەکاو کوردسانی هەم دلۍ ژەناو کوردینە هەم دلۍ ژەناو گەلا هامسایانە هوشیاری و هۆشمەندیێوە جدی چنی ۋێش مارۆ. ئینەیچ بۆ بە وەڵێکۊتەیۍ کە مەتاویۆ ڕاش ۋنە گیریۆ. هێزوو هیچ دەوڵەتێوە مەتاوۆ ئی هوشیاربیەی و هۆشمەندیە، ئیراڎەو ئازاڎیی ژەنۍ سەرکووت بکەرۆ. ئینەی بە فرەیی جە هەڵوێسو مدرامان و قەراروو ژەنا کوردینە موینمۍ کە جە دژوو سیاسەتوو دوژمنکارانەو ژەنەو ڕژێموو فاشیستی ئاکەپە-مەهەپەی قڕکەرینە جە تورکیانە نیشانە دریا. هەر پاسە جە جەنگوو دژوو داعشی دوژمنوو مرۆڤایەتینە ئینەی جە مدرامانوو ژەنا ۋەرنیشتینە موینمۍ. بە هەمان شێوە جە سەرهۊرداکا ژەنا ۋەرکەوتینە دیما کە بە دروشمەو 'ژەنی، ژیۋای، ئازاڎیی' دەنگش داوە. پۊکاتی  مدرامانوو ژەنا کوردی جە سایەو هۆشمەندی و هێزوو ڕابەر ئاپۆینە، بی بە زلێوە بەقوتە ۋەروو ڕووەو دەسدرێژییەکا سیستموو سەرمایەداری کەوت.

خاوەنداریکەردەی جە ڕابەر ئاپۆی خاوەنداریکەردەین جە بەهاکا ئازاڎیی

ڕامانەکاو ئازاڎیپارێزی ژەنۍ، دیموکراتیک و ئیکۆلۆژی ڕابەر ئاپۆی تا زیاتەر بشناسیۆ و ڕۊشن کریۆوەو بیاواشەنە، ئانڎە زیاتەر دلۍ بەشوو ۋەرفراوانوو گلێرگەی و گەردوونینە وەڵا بۆوە، هەتا زیاتەر وەڵابۆوە ئانڎە زیاتەر خاوەنداریش ۋنەکریۆ. ۋەروو ئانەی دلۍ فکروو ڕابەر ئاپۆینە ڕاو فاشیزم، نەژاڎپەرسی، نەتەوەپەرسی، زایندەپەرسی، ناحەقی و بێ ئەخلاقی مەبۆوە. ۋەروو ئانەی وەرگیری جە ڕابەر ئاپۆی هەڵوێسێوەن جە دژوو سەرمایەداری. هۊرئێستەیۆ ۋەرا ۋەر بە نەژاڎپەرسی، نەتەوەپەرسی، پیا سالاری، هۊرئێستەیۆن ۋەرا ۋەر بە دژبەری سروشتی و ئیکۆلۆژی. وەرگیریکەردەی جە ڕابەر ئاپۆی خاوەنداریکەردەین جە بەهاکا دیموکراسی، ئازاڎیی و یەکسانی گلێرگەی جە سەڎەو ٢١ینە. پارێزناو ڕابەر ئاپۆی هەڵوێسێوە دژە سەرمایەداری و سۆسیالیست دیموکراتیکیا. ئازاڎیپارێزی ژەنۍ، دیموکراتیک و ئیکۆلۆژیکییا.

ئامانجی هەرە گەورە مسۆرگەرکەردەی ئازاڎیی ڕابەر ئاپۆیا

گەلەکەما نەورۆزوو ئێساڵیش پێسە نەورۆزوو ڕابەرایەتی پیرۆزکەرد. جۆش و هەڵوێسوو ۋێش جە مێڎانەکا نەورۆزینە نیشانەدا، بە دەنگێوە بەرزۆ داواو ئازاڎیی ڕابەر ئاپۆیش کەرد. بە شێوێوە ڕۊشن ئانەش دیاریکەرد کە پێسە گەلوو کوردی ئامانجی هەرە گەورەشا مسۆگەرکەردەی ئازاڎیی ڕابەر ئاپۆیا، کە ئینەیچ داوێوەنە شیاوو دما وستەی نیەنە. گەلەکەما ئی هەڵوێس و قەرارداریەی نەورۆزەنە نیشانەش دا، جە هۊرچنیە دلێینەییەکا ئی دماییەینە فاڕاش پۍ ئیراڎێوە گەورەی سیاسی؛ پی جۆرە ڕژێموو ئاکەپە-مەهەپەی فاشیستی قڕکەری-قەیومیش شێونا. هەم بۊنەو هەڵوێسوو ئازاڎیی پارێزنی جە نەورۆزەنە و هەم بۊنەو سەرکەوتەی جە هۊرچنیەکا دلێینەینە پیرۆز مکەرمۍ. قەناعەتما پاسەنە کە دژوو سیستموو قەیومی، تاڵانکەری، دزوو ڕژێمی فاشیستی، جە هەڵوێس و باوەڕداری ۋێش بەردەوام بۆ، هەتا دما نەفەس خاوەنداری جە ئیراڎەو ۋێش مکەرۆ، شارەوانیەکاو ۋێش ڕادەسوو کەسی مەکەرۆ، کە حۊڵمڎا دەسشا سەرەرە بگیریۆ.
ئی هەڵوێسە سیاسیە بە ئیرادە، بە بڕیار و بە جۆشەو گەلی کە جە مێڎانەکا نەورۆزی و جە دەنگدای هۊرچنیە دلێینەییەکانە نیشانەش دا، جە ساڵەو ٢٠٢٤ینە فاڕیۆ پۍ ئاستێوە گۊرەتەروو چالاکی و هێزێوە هێقموو ڕێکوستەی. پێسە تەڤگەری، ئامانجوو لابەردەی گۆشەگیری و مسۆگەرکەردەی ئازاڎیی جەستەی ڕابەر ئاپۆی بکەرمۍ بە بنەماو کۊشیایما و پی ڕوانگۆ خەبات بکەرمۍ. سەروو ئی بنەمایۍ داوا جە ژەنا و گەنجا، تەماموو گەلی وڵاتپارێزیما و دۆسە ئازیزەکاما مکەرمۍ کە پۍ لابەردەی گۆشەگیری سەروو ڕابەر ئاپۆی و مسۆگەرکەردەی ئازاڎیی جەستەی کۊشیای فرە گەورەتەر بکەرمۍ، ڕێکوستەیەکا فرە هێقمتەر بکەرمۍ، چالاکی فرە کاریگەرتەر پێکبارمۍ. داوا جە گرڎ کەسۍ مکەرمۍ جە ٤و نیسانینە جە هەر مەنتیقێوەنە با ، نەمامۍ بنیا و دەوروبەری سەوز بکەرا."