هامسەرۆکایەتی دەسەو ڕاوەبەری کەجەکەی جەپەیامو موبارەک بایی ساڵەی تازێنە ئاماژەش پانەیەکەرد کە سەرنجەکۍ ڕابەر ئاپۆی پەی چارەسەری جە ٧ خاڵانە وزیێ بێنێ ڕووە، جە ساڵەی تازێنە بانۍ بە ڕانیشاندەر پەی ئەرەکۆشای ئاڎیشا.
هامسەرۆکایەتی دەسەو ڕاوەبەری کەجەکەی باسش چانەیە کەرد کە بڕواشا هەنە، کە جە ساڵەی تازێنە ڕابەر ئاپۆ ئازاد بکریۆنە، پرسو کوردی چارەسەر بۆنە و تورکیاو هەرێمەکە دیموکراتیکێ بانە، هەرێمەکە و گرڏو جەهانینە ئاشتی و ئارامی مێنە ئاراوە.
هامسەرۆکایەتی دەسەو ڕاوەبەری کۆما جڤاکێن کوردەسانی (کەجەکە) بۊنەو ساڵەی تازێوە پەیامێوەش وەڵاکەردۆ، پەیامەکە پی جۆرەنە:
"مرۆڤایەتی و گەلەکەما پامنیا ساڵێوە تازێ. ساڵەی ویەردێ جە جەهانەنە، هەرێمەکە و وڵاتەکەمانە جەنگو بەشکەردەو جەهانی یەرەمی قوڵبییۆ، زەرەری گۆرەو گیانی و زامڏارێ فرێش چنەکەوتۍ، مەنتیقێوە زیاتەرش تەناوە و بەردەوام بێ. جەنگ بە شێوێوە دژوار کاریگەری مکەرۆنە سەرو گرڏو مرۆڤایەتی. ئاورای، تەژنای، دەسنەیاونای بە خزمەتگوزاری تەندروسی، هەژاری، بێ هەرمانی، هەلومەرجو ژیوای دژوارتەر بێ و فرەو یاگاش گێرتەنۆ.
جە کوردەسانەنە کردەوێ کۆلۆنیالیسیۍ ئەنجامدریێ
دۆڵەتو تورکی کۆلۆنیالیسی قڕکەر، هەلومەرجو جەنگی جەهانی یەرەمیش پێسەو دەرفەتی بەکارئارد و پەی پاکتاوکەردەی ئەرەکۆشای ئازادیی کوردەسانی، حیچ چێوێ نەمەن نەکەرۆش. گۆشەگیریش سەرو ڕابەر ئاپۆی درێژە پنەدا، جە دژو گەریلاکا درێژەش بە بەکارئاردەو گرڏ جۆرە چەکێوە کیمیایی دا، قورسترین ئەشکەنجەش جە دژو زینانیا ئازادیی ئەنجامدا، نکۆڵیش جە مافە یاسایی و گەردوونییەکا کەرد و گرڏ جۆرە پاشێلکاریێش ئەنجامدا. فشارەکێ سەرو ژەنا بەردەوامێ پێنێ، کۆمکوژی، گێرتەی و دەستدرێژی ئیتر پێسەو چێوێ ئاسایی درێژەش پنەدریان. بەتایبەت نیارەو قەیومی سەرو چنین شارەوانی هۆرچنیا، بەرش وست کە پشووکوڵیێ فرە جە وەراوەرو مافو ژیواو گەلو کوردی هەن.
چنی ڕووەدایەکا سوریای، چەتەکی سوپاو نەتەوەیی سوریای سەر بە حکومەتو تورکی فاشیستی جە سەرنیشتوو وەرکەوتوو سوریای جە چوارچێوەو ئەنجامداو کۆمکوژی جە وەراوەرو گەلو کوردینە، زیاتەر جە سە هەزار مرۆڤێشا ئاوارەکەردێ، ژەنێ و زاڕۆڵێشا کوشتێ.
هرووژمەکێ جە دژو گەلەکەیما و جمیەرەو ئازادیی کوردەسانی، جە ئەساسەنە با ئامانجە ئەنجام دریا کە ئیرادەو مڏرامانی، هیوا و بڕواو ژیوای ئازادی ماڕا. مڏرامانی کە ڕابەر ئاپۆ جە هەلومەرجو گۆشەگیری دژوارنە پەیڕەوش کەرد، مڏرامانو قارەمانا گەریلاکا ئازادیی کوردەسانی جە دژو گرڏ جۆرە چەکێوە قەدەغەکریا و تەکنەلۆژیای وەڵکەوتەو سوپاو تورکی، گرڏو جەیۆدایۆ حکومەتو فاشیستیش جەباربەرد. ئێمە گرڏو ئا جەنگاوەرا ئازادی کە چی مڏرانەنە و جە کوردەسانەنە گەشمەرڏێ بیێ بە رێز و پنەزانایۆ یاڏکەرمێ. جە بناغەو گۆرەکەردەو ئەرەکۆشاینە خاوەنداری جە یاڏو ئاریشا مکەرمێنە و بڕواما بە دەسەبەرکەردەو سەرکەوتەی وسمه ڕووە.
مڏرامانو گەلەکەیما، زەخمەتکێشا و ژەنا کە بە دروشمو 'ژەنی، ژیوای، ئازادی' نیشانەشادا، نازتش کە حکومەتو کۆلۆنیالیستی و فاشیستی کەرۆنە ئامانج. بە تایبەت هەڵمەتەو 'ئازادی پەی ڕابەر ئاپۆ، چارەسەرو سیاسی پەی پرسو کوردی' کە جمیەرەو ئازادیی کوردەسانی و گەلەکەما چنی دۆساشا سەرو ئاستو جەهانینە بەرد ڕاوە، سنوورەکا کوردەسانیش ویەرنان و بە جەهانی بییەن. پەی ئانەی ئا تاریکاییەی خوڵقیان ڕەمنۆشۆ، دەورێ گۆرەش گێڵنا وئاستێوە گۆرەو ئازادیش خوڵقنا.
ڕابەر ئاپۆ جە ٢٨و کانونو یوەمینە چنی شاندو دەم پارتی دیدارش سازکەرد. ئا دیدارە جە ئەنجامو هەڵوێسو ڕابەر ئاپۆی جە ئیمراڵی، مڏرامانو جمیەرەو ئازادیی کوردەسانی، گەلەکەیما و دۆساما جە کوردەسان و تەمامو جەهانینە، بە ئەنجام یاونا. چا دیدارەنە ڕابەرما جە دژو ئا تاریکیەی سەپیۆنە، جارێوە تەر بە وەرپرسیارەتیێ تاریخیۆ روانگە ئەرێنییەکا وێش، چارەسەری و روانگێوەش نیشانەدا کە ئاسۆو هزریش فراوانتەر کەرد. چنی چارەسەرو پرسو کوردی، دیوکراتیک بییەو تورکیای و چارەسەرو کێشەکا وەرکەوتوو دلێڕاسەی بە بڕوا و ئیدارێوە گۆرە ئانەش وست ڕووە کە ئاشتی دادپەروەرانە جە گرڏو جەهانینە ئەرکێوە خێرا و بەپەلەن، پەی گەلی، جمیەرەی، رەنجدای، ژەنی، گرڏو باوەڕییەکا و کلتورەکا ئاسۆیێ تازەو ئازادی، هیوا و بڕواو بنیادنیای. ڕابەرایەتیما روانگەکا وێش پەی چارەسەری جە ٧ خاڵەنە دیاریکەرد، ئانەیچ پاسە کەرۆ کە ئێمە پێسەو جمیەرە و گەلی بە هیوای زیاتەرۆ جە ساڵەو تازێ نزیک بیمێ و ئا ئەرکێ کە مشۆم جابەجێشا کەرمێ، پەی ئێمەش دیاری کەردەن.
پێسەو جمیەرەو گەلی و ئازادی، ئێمە ئەرەیاونمێش کە تەماشەکەردەو ڕابەرایەتیما دماو ڕووەکا ساڵەو ٢٠٢٤ی پێسەو مانیفیستۆین، جە ساڵەی تازێنە بۆبە ڕانیشاندەرو ئەرەکۆشایما.
ئێمە داوا جە گەلەکەیما، گرڏو دۆساماو، بەشە سیاسییەکا و رێکوزیا جەماوەرییە دیموکراتیکەکا لایەنگرا چارەسەری پرسو کوردی و دیموکراتیکبییەی تورکیای مکەرمێ کە سەرو ئا بنەمێ ئەرەکۆشانە. بە ویر و بڕواو ئانەی کە جە ساڵەی تازێنە ڕابەر ئاپۆ ئازاد بۆنە، پرسو کورد چارەسەر مکریۆ، تورکیا و هەرێمەکە دیموکراتیک بۆنە و ئاشتی و ئارامی هەرێمەکەیما و سەران سەرو جەهانی گێرۆوە، ئێمە سەرەتا سەرو ساڵێ تازێ جە ڕابەر ئاپۆی، گرڏو هامڕایا، ژەنی و رەنجدەرا کە پەی ئازادی ئەرەکۆشانە، موبارەک مکەرمێ".
