هامسەرۊکایەتیی کۊنسەو ڕاوەبەریی کەجەکەی داواش وەنەو گرد لایێوی کەرد، کە ڕۊوبییەی ڕابەرو گەلو کوردی عەبدوڵا ئۊجالانی بە جۊش و دڵوەشیێوی گەورەوە مەبارەک بکەرمۍ و کۊشیای ئازاڎیی وەرفراوان بکەرمۍ.
هامسەرۊکایەتیی کۊنسەو ڕاوەبەریی کەجەکەی بە بۊنەو یادو ڕۊوبییەی ڕابەرو گەلو کوردی عەبدوڵا ئۊجالانی ئەرەیاوناێوەش وەڵا کەرڎۊ.
ئەرەیاونایەکەینە ئامان: "لوایمۍ دلۍ ٧٦ ساڵەو پەیدابییەی ڕابەر عەبدوڵا ئۊجالانیوە، کە بە کۊشیای ئازاڎیی کورڎسانی بییەی گەلو کوردیش مسۊگەر کەرد. گەلەکەما بە شێوێوی مافدار ڕۊوبییەی ڕابەر عەبدوڵا ئۊجالانی پێسەو پەڕماناتەرین ڕۊوبییەی و مەبارەک موینۊ و بە دڵوەشی و پەنەزانایوی فرەوە مەبارەک مکەرۊ. ئێمەیچ ڕۊوبییەی ڕابەر ئاپۊی، کە یۊن جە پەڕماناتەرین ڕۊوبییەی تارێخنە، بە وەشەسیای و هەستو پەنەزانایۊسڵام مکەرمۍ، ئی ڕوە پەڕمانا وەنەو ڕابەر ئاپۊی، گەلو کورڎسانی، گەلاو وەرکەوتو دلێراسەی مەبارەک مکەرمۍ.
بێگومان ڕابەر ئاپۊ کەسایەتیێوی تارێخیین. قووڵ بییەنۊ و فکرش ڕێک وستەن، ڕاش پەی تاریخی وەشە کەرڎێنە و واوەی خولقنانشۊ. بە هەڵوێست، ژیوای و خەباتو وێش ئانەش نیشانە دا کە وەڵاتپارێز، شۊڕشگێڵن، سۊسیالیست، هامڕا، دۊس و ڕەنجدەرێوی فرە گەورەن.
بییەی، ژیوای، ڕۊحو وێش جە دماییئارڎەینە بە ناهەقی، سەرڕاسکەرڎەیۊ کەموکەچی، مسۊگەرکەرڎەی ژیواێوی ڕاسی و بەمانای تەرخان کەرڎەن. فکرنە فرە قووڵ بییەنۊ، ئی قووڵبییەیۊشو ورچەرخنان پەی زانیاری و ئەنەیاوای و کەرڎەنش بە یانەو گەلی و ئینسانیەتی. پەی گەل و وەڵاتەکەیش، پەی گلێرگەی و ئینسانیەتی هەرمانۍ فرە گەورێش کەرڎۍ، کۊشیای فرە گەورەش کەرد و هەرمانۍ خاسێش کەرڎۍ. پەی گەلو کوردی کە ڕووبەڕوو ناحەقییوی تاریخی بییەبێوە، فکر و چالاکییش خولقنا تا واوەی ورزاوە. بی بە کەسایەتییوی تارێخی، فرسەتش خولقنا کە کەسایەتیۍ تاریخیۍ دلێشنە ورزاوە. مەزڵوم، سارا، عەگید، زەکییە، ڕاشان و چندینۍ تەرۍ نموونەو ئانیشا بە فکر و فەلسەفەیش هەنگامێسا نیۍ و تارێخشا نویستۊ. گەلو کوردی هەنگامەی تاریخییە و پارادایم و فەلسەفەو ڕابەرو گەلو کوردی عەبدوڵا ئۊجالانیش ئشناساوە، زانا و ئازاڎ بی. جە دۊخو گلێرگەی پارچەی و تاویاویۊینە ڕزگارش بی، فاڕیا پەی گەلێوی چانەی کە پەی ئامانجی گەورەی مژیوۊ و بەها مخولقنۊ. پەوکای گەلو کوردی بە ڕابەر ئاپۊیۊ سەرەش بەرزا، هەمان وەختنە وێش بە قەرزارو ڕابەر ئاپۊی مزانۊ. دڵسۊزی و عەشقو کوردی پەی ڕابەر ئاپۊی وەروو ئینەینە.
ڕابەر ئاپۊ بی بە کەسایەتیێوی تارێخی
هێزەکاو سەرمایەداری کە ئەهریمەنۍ ئی سەرڎەمینۍ، بە پیلانگێڵنی گەرەکشابۍ هەنگامەی تارێخیەو ڕابەر ئاپۊی مردنا. پەوکای ئا هەنگام و وەڵێکەوتەیە ڕابەر ئاپۊی خولقناش، خەڵکش ئازاڎ کەرد و پلانەکاو مۊدێرێنێتەی سەرمایەدارییش وەرکەوتو دلێڕاسەینە فۊتنۍ. پیلانگێڵنیی میاننەتەوەیی کە بە گێرتەی ئیمراڵینە دماییش ئاما وەروو ئینەیە بۍ. بەڵام ڕابەر ئاپۊ گیریایش ئیمراڵینە کەرد بە ئامرازی ڕۊشنبییەیۊێوی تازەی و قۊناغێوی تارێخی. دژو تاڵانکاریی مۊدێرنێتەی سەرمایەداری سەرو سروشتی، گلێرگە، کەسایەتی، مۊدێرنێتەی دیموکراتیکش وەش کەرد کە سروشت، گلێرگە، کەسایەتی و ژەنۍ ئازاڎ مکەرۊ. ڕابەر ئاپۊ پارادایمو ژیوای دیموکراتیکینە کە وێش دەسش پەی بەرد، ئازاڎیی ژەنۍ و ئیکۊلۊژییش خولقنا، پێسە سیستەمێوی چینەش بونیاد نیا، کە نەک بە تەنیا گەلو کوردی هەمان وەختنە تەمامو ئینسانیەتی ئازاڎ مکەرۊ و ئەنجامنە یاوا ڕاسیێوی گەردوونی. ئینەیچ بی بە جوابێوی هەرە تارێخی وەراوەرو دیلگێرتەی و پیلانگێڵناینە. پیلانگێڵنۍ گەرەکشابۍ بە گێرتەیش ئیمراڵیینە دمایی بە ڕابەر ئاپۊی بارانۍ، بەڵام ڕابەر ئاپۊ بی بە کەسایەتیێوی گەردوونی. بێگومان ئی دۊخەیچە سەیەو دڵسۊزیی ڕابەر ئاپۊینە بۍ پەی گەلو کوردی، گەلە بندەساو جیهانی، ژەنی، ژیوای، بەها گەردوونییەکۍ و وەشەسیایش چی بەهایا وەش کەرد. گەر ئارۊنە ئاستی میاننەتەوەیینە خاوەندارێتیکەرڎەی وەنەو ڕابەر ئاپۊی مکریۊ، فکرەکێش وەڵۍ باوەو داواو ئازاڎیی جەستەییش مکریۊ، ئی ڕاسییە پەشتڕاس مکەرۊوە. ئاشکران ڕۊوبییەی ڕابەر ئاپۊی، هەنگامە گەردوونییەکێش و خاوەنداریکەرڎەی جە ئاستی میاننەتەوەیینە وەنە مکریۊ، وەڵێکەوتەێوی گرنگو ئی سەرڎەمەینە.
دەسەڵاتدارێتی فاشیستی ئاکەپە-مەهەپەی بە گۊشەگیرکەرڎەی ڕەها گەرەکشا ئی هەنگامە گەردوونی و تارێخیۍ قوفڵ بکەرۊ و گەلو کوردی قڕ بکەرۊ. هەمان وەختنە نیاز و داواو هێزەکاو مۊدێرنێتەی سەرمایەدارییچا. پەشتگیریێوی گەورەو هێزەکاو سەرمایەداری ئینا پەشتەو گۊشەگیرییوە. جە جەوهەرو گۊشەگیری سەرو ڕابەر ئاپۊینە مەیل هەن، کە تەمامو ئینسانیەتی مەحکومو مۊدێرنێتەی سەرمایەداریی بکەرا. وەرو ئینەیە پەشتگیریی گەلو کوردی، هەنگامۍ ئازاڎییەی جیهانییەی فرە مانادارە و سەنگینەنە. پەوکای کۊمەڵایەتی و سیاسیینە هەنگامەو نەورۊزو ئازاڎیی ڕابەر ئاپۊی فرە لوێنە وەرۊ، وەراوەرو سیاسەتەکاو تاڵانکاری و پیلانگێڵنیی دەسەڵاتی فاشیستی قڕکەرینە، ئا ئیرادە کە گەلەکەما و هێزەکاو دیموکراسی دەستنیشانێشا کەرڎۍ، شایسۍ پۊرەرەواتەینۍ. بە حورمەتۊ سڵام وەنەو کۊشیای گەلی و هەڵویستو مدرامانیشا مکەرمۍ.
جارێو تەر ڕۊوبییەی مەبارەک وەنەو گەلو کوردی، ژەنا، گەنجا، گەلاو وەرکەوتو دلێڕاسەی، تەمامو ئینسانیەتی مەبارەک مکەرمۍ. داوا ئۊو گرد کەسێو مکەرمۍ فرە خاس ڕابەر ئاپۊی بشناسا، بیاواشنە، خاوەندارییش وەنە بکەرا، ڕۊوبییەی مەبارەکی بە دڵوەشی و جۊشێوی گەورەوە مەبارەک بکەرا و کۊشیای ئازاڎیی گەورە بکەرا."
