کەجەکە واتش، ئامانجی سەرەکیی سەردایەکەو ئەردۆغانی پەی عێراقی، بەڕسمیکەردەی ئەرەگیرکاری و ڕەوایەتیداین بە هجوومی تازەی و داواش وەنەو گرد کەسیو کەردە، کە دژو پلانەکاو دەوڵەتو تورکی پەی هجوومی تازەی و ئەرەگیرکەردەی خاکو عێراقی بمرداوە.
کۆمیتەو پەیوەندییەکاو بەرو کەجەکەی سەبارەت بە سەردای سەرۆککۆمارو تورکی تەیب ئەردۆغانی پەی عێراق، ئەرەیاوناێوەش وەڵا کەردۆ.
کۆمیتەو پەیوەندییەکاو بەرو کەجەکەی واتش: "سەرۆککۆمارو تورکی تەیب ئەردۆغان ڕۆو ٢٢ی نیسانی بە ڕسمی سەرێ بەغدای و هەولێری مدۆ.
حەرچندە ئامانجی سەرەکیی ئا سەردایە پێسەو پەیوەندیی بازرگانیی ئابووری ئەرەیاونیێنێ، بەڵام ئامانجوو تورکیای ئانەنە، کە ٨٧ بارەگێ سەروازیێ وێش سەرو خاکو عێراقی و ئەرەگیرکەرییەکەیش سەرو خاکو عێراقیوە کەرۆ ڕسمی و ڕەوایەتی بە پلانەی تازێ وێش پەی هجوومەکاش بدۆ. دەوڵەتو تورکی بە بەهانێ 'ئەمنی'یوە گەرەکشا بازنەی تازەو ئەرەگیرکەری سەرو خاکو عێراقیوە بکەرۆوە.
دەسەڵاتداریی ئەردۆغانی کەسێ مەدەنیێ مکوشۆنێ
ئەرەیاونایەکەنە وزیان ڕووە، کە حکومەتو ئەردۆغانی مافو سەروەریی عێراقی پاشێل مکەرۆ و کایێ زەمینی و ئاسمانییش بە مەیلوو وێش بەکارمارۆنێ. گرد ڕوێو بە دەیان هجوومێ مکەرۆ و دەگا، مێوە و باخ، یانە و سەیارێ عێراقییەکا بۆردومانێ مکەرۆ و مەدەنییەکا مکوشۆنێ. تورکیا ئا هجووما سایێ هامکارییە سیاسی، سەروازی و لۆجستییەکاو پەدەکەیۆ مکەرۆنێ. گەلو کوردی و گلێرگەو عێراقی، دژو هامکاریی تورکیا-پەدەکەی و ئەرەگیرکەریی تورکیاین. ئەردۆغان هەستش پانەیە کەردەن و گەرەکشا حکومەتو بەغدایچ پەلکێشو لاو وێش بکەرۆ، پەدەکەی چا دۆخە دژوارەیە ڕزگار بکەرۆ و هەم ئەرەگیرکەرییچ عێراقنە هەمیشەیی بکەرۆ.
مشۆم بزانییۆ کە تورکیا چا یاگانە کە پەیشا ملۆ ناسەقامگیری ساز مکەرۆ و پێکهئامای نەتەوەیی، شناسنامە، باوڕ و مەزهەبەکا بەکارمارۆ. پی جۆرە سیاسەتو وێش مجۆرە. ئەرەگیرکەریی تورکیای قوبرسنە و ئا گێجاوێ هەوڵێ مدۆ کەرکوکنە بخوڵقنۆش، یاگەدارکەردەیش لیبیانە تا داعش خاکو سوریاینە وەڵا بکریۆوە و و ڕۆشنیی هامکارییەکا پەی داعشی. تایبەتمەندیێوی تەرو سەردەسەو ئاکەپەی ئەردۆغانی ئانەنە کە ئا چێوە ئارۆ پنەش موچیۆ 'بەڵ"ێ' سەبای ماچۆ "نا". یانێ پا ڕاددە دووەڕوو و درۆزنا. مشۆم گەلو کوردی و گلێرگەی عێراقی خاس بزانا، کە پێسە چەنی ئەردۆغان داراو ئەقڵیەتێوی ئەرێنی نییا، هەوڵێ مدۆنێ ئەرەگیرکەری عێراق و سوریایچنە بکەرۆن بە هەمیشەیی.
دەسەڵاتداریی ئاکەپەی، کە ٢١ ساڵا چێرو سەرکێشی و سەردەسەیی ئەردۆغانینە هەن، جە ورچنیەی ٣١و ئادارینە شکسی گەورەش وێشۆ دی و پەی یوەم جارین بۆ بە حزبی دووەم. ئانەیچە ڕاستەوخۆ کاریگەرییش کەردەن سەرو سیاسەتو قەیرانی ئابووریی تورکیای. بەڕۆشنی وینیا، کە دەسەڵاتداریی ئاکەپەی هەمیشەیی نییا، حکومەتو بەغدایچ مشۆم ئا ڕاسییە بوینۆ و چنی حکومەتەکەو ئەردۆغانی نەلۆ پەیوەندی و ڕێککەوتەی درێژخواینۆ.
لێوی تەرۆ، گەریلاکاو پەکەکەی کە پێسەو بەهانێ نیشانە مدریانێ و ئامادەکاریی پەی هجووم و ئەرەگیرکەری تازەی مکریۆ، ساڵەو ١٩٨٠یۆ جمیەرەکەما چنی گلێرگەی عێراقی و دەوڵەتو عێراقی سەرو بنەماو ڕێزگێرتەی ئۆو یۆترینی ئینێ دلێ پەیوەندیی دۆسانەینە تا ئیساتێ حیچ ئاڵۆزی، ماڵاییۆیرەی و حاڵەتێوی نەرێیی چانە ڕووەش نەدێنە. بەپێچەوانەوە، ساڵەو ٢٠١٤ینە وەختێو داعش هجوومەکێش کەردێ، گەریلاکاو کوردی چەنی گەلو عێراقی و شانە بە شانەشا یەک بەرەنە پەی پارێزنای موسڵ، کەرکوک، هەولێر، شەنگال و مەخموری گژیێ و سەدان گەشمەردێشا پێشکەشێ کەردێ. وەختوو جەنگەکەینە جیای ئانەی تورکیا هامکارو گەلو عێراقی بۆ، هامکارو چەتەکاو داعشی بێ.
پەدەکە تاکە هێزا کە خزمەت بە تورکیای مکەرۆ
ڕاوەبەرایەتیی پەدەکەی تاکە هێزا عێراقنە، کە خزمەت بە مەنەیوەی هەمیشەیی تورکیای سەرو خاکو عێراقیوە مکەرۆ. مشۆم پەدەکە دەمودەس دمایی بە پەیوەندییە شووم و نەگریسەکاش چنی حکومەتو ئەردۆغان بارۆ، کە ئینا قۆناغو وڕاینە. مشۆم بابەتەکاو دژ بە گەلو کوردی و گلێرگەی عێراقینە چەنی تورکیای هامکار نەبۆ.
مشۆم دژو ئەرەگیرکەری و هەوڵدای تازەو ئەرەگیرکەری هەڵوێست برمانیۆ
مشۆم گلێرگەی عێراقی، گەلو کوردی، پارتە سیاسییەکێ، ڕێکوزیا مەدەنییەکێ، ڕۆشنویرێ، نویسەرێ و ئەرەیاونای عێراقی دژو ئەرەگیرکەریی تورکیای سەرو خاکو عێراقیوە و پلانەکاو هجوومی تازەی مردانێوە. مشۆم دژو ئەرەگیرکەری حکومەتەکەو ئەردۆغانی سەرو خاکو عێراقی و هەوڵە تازەکاو ئەرەگیرکەری بەنامێ "ڕاو پەرەسانایوە '، 'ڕێککەوتەی تازەو ئاوێ' و ' ڕێککەوتەی تازەو ئاسایشی هامبەش'یوە هەڵوێست برمانیۆ".
