کەجەکە ئانەش وستەن ڕووە کە ئا گروپۍ کە بەلجیکانە هجوومشا کەردەن سەروو کوردەکا داعشۍ و تورکێنۍ و ئەرەیاۋنایچش، کە دەسەڵاڎداری ئاکەپە-مەهەپەی ئینا پەشتەو ئا هجووماوە. کەجەکە داواش جە گەلوو کوردی کەرد کە جگە جە چالاکی دیموکراتیکی پەنا پۍ حیچ رێوەتەری نەبەرا.
"ئا کوردۍ کە بەجلیکانە مژیۋا، دماو ئانەی جە مبارەکبایی نەورۆزینە گێڵێنێوە رووبەڕوو هجووم و چەتە فاشیست، نەژادپەرس و ئایینپەرسەکا بیێوە. ئا هجوومە و رووەدایەکۍ دماو ئانەیچ بە مەبەسوو کوشتەی ئەنجامدریۍ. دەوروبەروو یانەکەی گیریا و حۊڵدریا ئا کوردۍ کە چا یانەنە گیرشا کەردەبۍ، کوشیانە. جە ئاکاموو هجوومەکەینە ژمارێوە فرێ کوردۍ زامڎارۍ بیۍ و ئاژەو بڕێشا دژوارا. ئا هجوومۍ تا ئیساتێچ دژوو کوردا بەردەوامێنۍ. تەیب ئەردۆغان خودوو ۋێش و یاۋنەری جەنگی تایبەتیش پۍ درێژەدای پا هجووما حۊڵێوە دژوارشا گێرتەنەنە وەر. ئێمە ئا هجوومە فاشیستیە، نەژاڎپەرسییا بە هیستریاو دژە-کوردی ئەنجام مڎریا بە تنی شەرمەزارشا مکەرمۍ. ئا هجوومە بە تەمامی حۊڵدایبۍ پۍ کۆمکوشی. یانێشا سۊچنۍ و نیازشا بۍ ئا کەسۍ کە ئینۍ دلۍ یانەکانە سۊچناشا و کوشاشا. ۋەروو ئانەی مقارنەو ئا حۊڵوو کۆمکوشیە چنی کۆمکوشی مادیماکی پێسەنۍ یۊی. چەتە فاشیست، نەژاڎپەرس و ئایینپەرسەکۍ ئوتێل مادیماکشا بە کەسەکا دلێشۆ سۊچنا.
هجوومەکەو بەلجیکای جە ئاکاموو پلانە و رێکوستەی دەسەڵاتی فاشیستی ئاکەپە-مەهەپەینە کە ۋەرا ۋەر بە بەرزبیەیۆ و بە گوڕتەربیەی کۊشیای گەلەکەیمانە نەتاواش دڎان گێرۆ ۋێشەرە، ئەنجامدریا. ئامانجەکە ئانەنە کە گەلی تەرسنا، بە ئاژاوەگێڵنی رۆژەڤوو گەلەکەیما پێچەوانە بکەراوە. گەلەکەیما جە ۋەرا ۋەروو حکومەتەکا وڵاتا پەیوەندیدارینە رووبەڕوو بکەراوە و پی جۆرە کۊشیای گەلەکەیما لاواز بکەرا. دەسەڵاتداری ئاکەپە- مەهەپەی جە ۋەرا ۋەروو کۊشیای ئازاڎیینە بە تایبەتی کە بە نەورۆزی یاوا قوڵەپۊپە توڕە و دەستەوسان دەسش بە گێڵایۍ پا جۆریە کەرد و پا جۆرە حۊڵدای کۆمکوشی بەلجیکای ئاما ئاراوە. گەلەکەما بە جۆش و خرۆشێوە گەورۆ نەورۆزش جە چوار پارچەو کوردسانینە و جە بەروو وڵاتینە پیرۆز کەرد، دژوو ئەرەگیری و خیانەتی هامبەشی هەڵوێسێوە فرە بەقوەتش گێرتەنە ۋەر و دڵسۆزی ۋێش پۍ کۊشیای ئازاڎیی و بە رابەر ئاپۆی نیشانەو گرڎ کەسی و دۆس و دوژمنی دا. ئا هەڵوێسە تاریخیەو گەلەکەیما جە نەورۆزوو ٢٠٢٤ینە بە ماناو شکسوو سیاسەتوو قڕکەری فاشیستی دەسەڵاڎداری ئاکەپە-مەهەپەین. جە لێوەتەرۆ یۆ جە ئامانجە سەرەکیەکاو ئا هجوومایچە ئانەنە کە هانوو دەوروبەری بڎا، دلۍ گەلوو کوردی و بەتایبەتی گەنجاو کوردینە توڕەیی ساز بکەرا و ئاڎیشا ناچار بکەرا جوابوو هجوومەکا بڎاوە و پی جۆرە گەلوو کوردی وزا دلۍ تەنگەشەی دژواریوە. بە تایبەتی هەڵمەتەو جەهانی ئازاڎیی کە جە ١٠و تشرینوو یووەم و ٢٠٢٣ جە تەرەفوو دۆسا و ئینتەرناسیۆناڵیستەکاوە دەسشپنەکریا، کۊشیای گەلوو کوردیش بە جەهانی کەرد و جە تەرەفوو گەلا، ژەنا، چێردەسا و رای گرڎیی دیموکراتیکی جەهانیوە پەشتیوانی گرنگش بەدەسئارد.
دەسەڵآتداری نەژاڎپەرس و فاشیستی ئاکەپە-مەهەپەی کە پلانە و ئەرەگیرکەردەی کوردسانی و قڕکەردەی کوردا نیێرە و حۊڵ دۍ جەهانی پانەی قایل کەرۆ، جە ۋەرا ۋەروو هەڵمەتەو ئازاڎینە کۊتەن دلۍ دژواری و گۆشەگیری و سیاسەتوو قڕکەردەی سەروو رابەر ئاپۆی ئامان ئاراوە. دەسەڵاتداری ئاکەپە-مەهەپە یاوانە کە ئەگەر ئانە زیاتەر وەڵۍ گنۆ مەتاوۆ سیاسەتوو گۆشەگیری و قڕکەردەی درێژە پنەبڎۆ، بە رێکوستەی هجوومەکەو بەلجیکای گەرەکش بۍ ئاژاوێوە گێڵنۆ و بە تێکدای رۆژەڤوو گەلەکەیما جە ئەوروپانە ۋەر بە هەڵمەتەو جەهانی ئازاڎیی گێرۆ. ئامانجی سەرەکی ئا هجوومەی جە بەلجیکانە جە تەرەفوو چەتە نەژاڎپەرست، ئایینپەرس و فاشیستیەکاوە دەسشپنەکەرد ئینەنە. فرە گرنگا کە گەلەکەما، دۆسا و دامودەزگا دیموکراتیکەکاما ئا ئاژەیە بۋینا و بە شێوێوە کە ئا گێرەشێونیە پوچ بکەراوە، جماوە. پۍ ئانەیچە عالتەرین ڕا ئانێنە جوابدایۆشا بە چالاکی و هەڵوێسی دیموکراتیک نیشانە بڎا و نەگنا دلۍ جموجوڵی و حۊڵدای تەریوە. ڕاو شکسدای و تێکدای هجوومی نەژاڎپەرسی فاشیستی بە شێوێوە بەقوەت رێبازوو دیموکراتیکی و کۊشیاین. جەخت چانەی کەرمێوە و قەناعەتما پاسەن کە گەلەکەما جە ئەوروپانە سەروو ئا بنەمایۍ جماوە.
جە ڕاو هجوومەکەو بەلجیکایۆ جارێوەتەر ئانە بەرکۊت کە دەوڵەتوو تورکی و دەسەڵاڎداری ئاکەپە-مەهەپەی چ هەڕەشێوەن سەروو ئەوروپای. ئا گروپۍ کە ئا هجوومەشا ئەنجامدا هیچ جیاوازیێوەشا چنی داعشی نییا. ئانۍ راسەوخۆ چەتۍ دەوڵەتوو تورکینۍ. جە حەقەتینیچەنە ئانەی داعشی وەی کەرۆ، ئاراسەش کەرۆ و بە داعشی هەڕەشۍ جە گرڎ کەسی مکەرۆ، دەوڵەتوو تورکی و دەسەڵاتوو ئاکەپە-مەهەپەین. هێزی سەرمەشق پەشتەو گرڎوو هجوومەکا داعشیۆ دەوڵەتوو تورکی و حکومەتوو ئاکەپە-مەهەپەین. هجوومەکەو بەلجیکای دماو کۆمکوشی مۆسکۆی، بە رێکەوت نییا. دەسەڵاڎداری ئاکەپە-مەهەپە بە هجووم و چەتەکا داعشی گەرەکشا گرڎ شۊنێوە کەرۆ بە مێڎانوو جەنگی، بە ئامانجوو بەدیئاردەی ئامانجەکا نیۆعوسمانی و بە تایبەتی قڕکەردەی کوردا، گەرەکشا داواکارییەکاش سەروو ئەوروپایرە سەپنۆ. ئێمە ئانەی بە راس و ئەرێنی موینمۍ کە دەوڵەتوو بەلجیکای حۊڵمڎۆ سەروو رووەداکەی بێدەنگ نەبۆ. بەڵام مشۊم بزانیۆ پەشتەو ئا هجووماوە دەسەڵاڎداری ئاکەپە-مەهەپەی هەن و مشۊم شەرمەزار کریۆ، قاو بڎریۆ و چنەش قبوڵ نەکریۆ. مامەڵەو دەوڵەتا ئەوروپای جە ئاشکراکەردەی راسیەکانە دوورا.
مامەڵەو ئاڎیشا گرڎوو کۊمکوشیەکا وەڵینینە دژوو کوردەکا پا جۆرە بیەن. ئا مامەڵەکەردەی کە حەقەتینەکۍ نەوزیا ڕووە، گرڎ جارێ بناغە پۍ هجوومی و کۆمکوشی تازەی ساز مکەرا. دەسەڵاڎداری ئاکەپە- مەهەپەی جە گرڎوو ئەوروپاینە بە ئەندێشەو ئایینپەرسی، فاشیستی و نەژاڎپەرسی رێکوستەی ساز مکەرۆ، چەکڎارۍ ساز کەرۊ و هجووم کەرۆ. بەڵام وەختۍ ئانە بە شێوێوە کراوە کریۆ، جە ۋەرا ۋەروو حیچ چێوێنە مەکریۆ، پێسە ئانەی ئازاڎ مکریا. ئێمە داوا جە دەوڵەتا ئەوروپای بە تایبەتیچ دەوڵەتوو بەلجیکای مکەرمۍ کە مامەڵەکەردەی و هەڵسوکەوتوو ۋێشا فاڕا. مشۊم بزانیۆ کە ئا فاشیست، نەژاڎپەرس و ئایینپەرسۍ، چەتەکۍ داعشینۍ و نەک هەر کوردا، گەلاو ئەوروپایچ کەرانۍ ئامانج. بانگەوازما پۍ گەلەکەیما ئانەن کە جگە جە چالاکی و ۋێنیشاندای دیموکراتیکی پەنا پۍ کردەوەی پشێونانەی و رێبازەکا تەری نەبەرا".
