ئەرەیاوناێوەنە کۆمیتەو گەشمەرڎە پێشەوای مەهابادنە، یاڎو قازیی محەمەدی سەرۆککۆمارو کوردستانی و هامڕایەکاش بەرز ئرمانا، کە وەڵێ ٧٧ ساڵانە و ١٠ی خاکەلێوەینە لاو دەسەڵاتی پاشایەتیی ئێرانیوە دریێ قەنارە.  

ئەرەیاونایەکەنە ئامان، جە کەسایەتیی گەشمەرڎا ئارین ئاری و تۆڵهەڵدان قەندیلینە سەرەو ڕێزی و نەوازشی پەی سەرجەمو گەشمەرڎاو کوردستانی کۆمنمێرە و وەعد مدەیمێ تا ئامایدیی ئامانجەکاشا درێژە بە کۆشیای بدیمێ"، هاموەخت قسێوە ڕابەرو گەلو کوردیشا ئارڎێنۆ ویر، کە گەشمەرڎێش پێسەو ساعیبی هەقەتینو وەڵاتی و جمیەری نامێ بەرڎێنێ.

ئانەیچە وزیان ڕووە، "کە دەوڵەتی ئەرەگیرکەرو پاشایەتیی ئێرانی بە قەنارەدای پێشەوا قازیی محەمەدی گەرەکش بێ داوای ئازادیوازییەو گەلو کوردی دلێنە بەرۆ، بەڵام بەتایبەتی دماو شۆڕشو ژەنی، ژیوای، ئازادی-یوە بەرکەوت، کە ڕێبازو قازیی محەمەدی و هامڕایاش گومە نەبییە و ئاماژە بە لوایڕاوەی  شکۆدارانەو مەراسیمەکاو نەورۆزی سەرجەمو بەشەکاو کوردستانینە و تاراوگەنە کریان و چا ڕووەوە ئەرەیاونایەکەنە ئامان، "کوردسانیێ سەلەمناشا ساڵ دماو ساڵی دەنگی ئازادیوازییشا بەرزتەر مبۆ".

 بەشێوی تەرو ئەرەیاونایەکەو کۆمیتەو گەشمەرڎە پێشەواو مەهابادینە ئاماژە بە خەتەو خیانەتیچ کوردستاننە کریان، کە ببیێنێ بە دارڎەسو ئەرەگیرا و چا ڕووەوە وچیان، "خەتەو خیانەتی بیێنە شێرپەنجە پەی وەڵاتەکەیما و ڕوانە پیلانگێڵنی و چەمساقیی پەی ئەرەگیرا مکەرۆ" جەختیچشا کەرڎەنۆ، کە بەرڎەوامێ با جە کۆشیای تا گلێرگەو کوردستانی خاس ئا خیانەتەیە بشناسۆ و وەراوەرشۆ هۆشیار بۆ و شەرمەزارش بکەرا.  

ئەرەیاونایەکەنە ئەوەخوای جە پابەندییشا بە ڕابازو قازی محەمەدی و سەرجەمو گەشمەرڎا کریانۆ و داوایچ کریێنە حزبەکێ پابەندێ وەسێتنامەو قازیی محەمەدی بانێ و بە یەکڕیزی و یۆگێرتەییشا دوژمنی ماڕا.

ئەرەیاونایەکە بە دروشمەکاو 'گەشمەرڎێ نمەمرا' و 'بژیوۆ ڕابەر ئاپۆ'ی دماییش ئاما.