کۆنفیدراسیۆنو سەندیکاکا و کۆنفیدراسیۆنو سەندیکاکا گرڎیی کرێکاراو کەتالۆنیای ئەرەیاۋناشا کە ئەگەر ئا ئینسانۍ پەی جەهانێوە عالتەری ئەرەکۊشا باڵبەسۍ بکریا، نمەبۆ جە ۋەرا ۋەرو ئانەینە بێدەنگۍ با و پەشتیوانی ۋێشا پەی هەڵمەتەو ئازادی واوەی کەردۆ.
یۆ جە کۆنفیدراسیۆنە گۆرەکا کرێکارا جە ئیسپانیانە کۆنفیدراسیۆنو سەندیکاکا (سی ئای) جە یووەم ساڵیاڎو هەڵمەتەو 'ئازادی پەی عەبدوڵا ئۆجالانی، چارەسەری پەی پرسو کوردی' سەرو ماڵەپەڕەکەیشۆ بە نامونیشانو "دماو ساڵێوە ئێمە بەهەمان جۆر پا گیرێنمۍ: ئازادی پەی عەبدوڵا ئۆجالانی، چارەسەریی سیاسی پەی پرسو کوردی" ئەرەیاۋنێوەش وەڵاکەردۆ.
جە ئەرەیاۋناکەینە ئاماژە بە ئەرەیاۋناو هەڵمەتەو ئازادی پەی عەبدوڵا ئۆجالانی، چارەسەریی سیاسی پەی پرسو کوردی کریان کە ساڵەی ۋییەرڎۍ جە ساڵیادو دەسپنەکەردەو پیلانگێڵنیی مېیاننەتەوەیینە دژو رابەرو گەلوو کوردی ئەرەیاۋییابۍ و هەرپاسە باس چانەی کریان، کە "ئۆجالان بە بێ ۋەرچەمگێرتەی مافەکاش دادگاییکریا و سەرەتا سزاو جە قەنارەدایش سەرەرە سەپیا و دماتەر سزاکۍ فاڕیا پەی زیڼانی هەتاهەتایی و بە شێوێوە رەها دوورگەو ئیمراڵینە گۆشەگیریش سەرەرە سەپیا و جە ساڵۆو ٢٠٢١یوە بنەیانە و پارێزنەراش نەتاوانشا چەمشا پنەش گنۆ و نەتاوانشا هیچ پەیوەندیێوەش پۆوە بکەرا".
جە درێژەنە ئامان، کە جە یووەم ساڵیاڎو هەڵمەتەو مېیاننەتەوەیی ئازادینە قەولشا پەی شەرمەزارکەردەی پاشێلکارییەکا مافو مرۆڤی جە تورکیانە واوەی مکەراوە و جەختش کەردەنۆ، کە پەی چارەسەرکەردەی پرسو کوردی و جابەجێکەردەی داواکارییەکا گەلوو کوردی دلۍ سنوورەکا تورکیاینە ئازاڎکەردەی زیڼانیا سیاسی و ئەنجامدای ئەرەنیشتەی پەنەوازا و عەبدوڵا ئۆجالانیچ جە چارەسەری پرسو کوردینە دەوری یەکلاکەرەوەش مەبۆ.
جە دمادمایی ئەرەیاۋناکەینە ئامان، "پەشتیوانی جە ئەرەکۊشای گەلوو کوردی، ئازادی عەبدوڵا ئۆجالانی و چارەسەری پرسو گەلوو کوردی مکەرا.
سی جی تی: ئازادی پەی عەبدوڵا ئۆجالانی، بۆنەو جەهانێوە عالتەریۆ
کۆنفیدراسیۆنو گرڎیی کرێکاراو کەتالۆنیا (سی جی تی)ی جە ئەرەیاۋنێوەنە پەشتیوانی ۋێش پەی هەڵمەتەو ئازادی عەبدوڵا ئۆجالانی و چارەسەری سیاسیی پرسو کوردی واوەی کەردەنۆ تەئکیدش چانەی کەردەنۆ کە ئامانجو پیلانگێڵنی و گۆشەگیری سەرو رابەرو گەلوو کوردی عەبدوڵا ئۆجالانی پەی ڕاگێرتەی بییەن جە وەڵا بیەیۆ ئەندێشەکاش جە دژو دۆڵەتی، تاتەسالاری و سەرمایەداری.
هەرپېسە ئەرەیاۋنانیچش، ئازادی ژەنا، ئیکۆلۆژی و ۋێڕاوەبەری کۆڵەکەکۍ کۆنفیدڕاڵیزمی دیموکراتیکینۍ. ئەندێشە و رامانەکۍ جمیەرو رزگاری گەلوو کوردی جە دژو رێکوستە دیکتاتۆرییەکا نەتەوە دۆڵەتینۍ و ئانەیچ بە مەترسی پەی سەرو دۆڵەتا تورکیا، ئێران، عێراقی و سوریای منریۆرە.
جە دمادماییچەنە ئەرەیاۋنانش، "ئێمە گەرەکمانە ئۆجالان ئازاد بکریۆ، ۋەرو ئانەی پېسە سەندیکاکا جە ۋەرا ۋەرو زیڼانی کەردەی ئا کەسانە کە پەی جەهانێوە عالتەری ئەرەکۊشا، نمەکریۆ بێدەنگۍ بیمۍ. ۋەرو ئانەی هەمڕایا شۆڕشو ۋەرنیشتی جە جبەرو دیکتاتۆری سەرمایەی و نەتەوە دۆڵەتی ۋێشا ڕێکوستەن و نمونەو ئەرەکۊشایێنۍ کە هیوای تازە بە جمیەرە کۆمەڵایەتیەکا جە سەرانسەرو جەهانینە بەخشانۍ.
ئازادی پەی ئۆجالانی، چارەسەری پەی پرسو کوردی".
