کۆنگرە ستار سەبارەت بە قەرارو سزاو جە قەنارەدای دژو پەخشان عەزیزیۍ و وریشە مورادیۍ ئەرەیاۋنێوەش وەڵاکەرڎۆ و داواش جە ڕێکوزیا مېیاننەتەوەییەکا کەرد دژو سزاو جە قەنارەدای مرداوە.
کۆنگرە ستارو کانتۆنو فوراتی سەبارەت بە قەرارو سزاو جە قەنارەدای سەرو چالاکا کوردی پەخشان عەزیزیۍ و وریشە مورادیێرە ئەرەیاۋنێوەش ۋەناوە.
ئەرەیاۋناکەی جە مېڎانوو ژەنۍ ئازادێنە جە کۆبانێ و جە لایەنو مەیسون کاواریۍ ئەندامەو کۆنگرە ستاریۆ ۋنیاوە.
جە بەیاننامەکەنە ئامان: "ماوۍ چێوەڵی دادگاو باڵای ئێرانی قەرارو سزاو جە قەنارەدایش سەرو دووۍ ژەنە چالاکا کوردی، پەخشان عەزیزیۍ و وریشە مورادیێرە سەپنا، بە تۆمەتو چالاکی چەکڎاری و ئەندامبیەی جە یۆ جە پارتە ئۆپۆزسیۆنەکانە. یاگۍ ئاماژەینە ئا دووە چالاکە کوردۍ ڕووبەڕوو ئەشکەنجەی بەڎەنی و دەروونی فرەی بیێنێوە. هەرپاسە دیدارو بنەیانەکاشا چنە قەڎەغە کریان و ڕاشا پنە نەڎریان پەی ۋەرگریکەردەی جە ۋێشا پارێزنەر گێرا."
هەرپاسە ئانەیچ ئەرەیاۋېیا: "پېسە مزانیۆ پەخشان عەزیزیە پېسە چالاکێوە کۆمەڵایەتیۍ جە سەرنیشت و ۋەرکۊتوو سووریاینە هامکاری و پاڵپەشتی ئا کناچا و ژەناشە کەرڎەن کە دەسو داعشینە ڕزگارۍ کریێنۍ. هەرپاسە وریشە مورادیە پېسە چالاکێوە جە مڎرامانوو کۆبانێنە جە دژو چەتەکا داعشی بەشدارەو مڎرامانی بیە."
کۆنگرە ستار جە ئەرەیاۋناکەیشەنە سزاو جە قەنارەدایش شەرمەزار کەرد و داواش جە گرڎو ڕێکوزیا مېیاننەتەوەییەکا و ڕێکوزیاکا مافو مرۆڤی و گلېرگەی مېیاننەتەوەیی کەرد دژو سزاو جە قەنارەدای دەسوەردای بکەرا و ئا سزۍ هۊرشێوناوە.
