کەنەکە ورکوایسەرو ستۆدیۆکاو ستێرک تی ڤی و مەدیا خەبەر تی ڤی-یش شەرمەزارێ کەردێ و واتش: "جارێوی تەر پەشتیوانیی وێشا پەی دامودەزگاکاو ئەرەیاونای کوردیی بەرموزانێ و مەبارەکبایی جە مدرامانیشا مکەرا ".
دەسەو ڕاوەبەریی کۆنگرەی نەتەوەیی کوردستان (کەنەکە)ی، سەبارەت بە هجوومەکاو سەرو ستۆدیۆکاو ستێرک تی ڤی و مەدیا خەبەر تی ڤی-ی ئەرەیاوناێوەش وەڵا کەردۆ، کە دەقەکەش ئینەنە:
"بۆ کەناڵەکاو ئەرەیاونای و ڕای گردینی
شەوەی ویەردێ و دماو نیمەشەوی پۆلیسو بەلجیکای ورش کوان سەروو ستۆدیۆکاو ستێرک تیڤی و مێدیا هەبەر تیڤی و دەسش سەرو کۆمپیوتەر و کەرەسەی تەکنیکیرە گێرتەن و چندین کەلوپەلێشا بەردێنێ و تاڵانییشا کەردەن. ئینە جارو ئەوەڵی نیا، کە هجوومی چینە پەی سەرو میدیای کوردی بەلجیکانە ڕووە بدۆنێ. وەڵتەر ساڵەو ١٩٩٦و هەرپاسە ساڵەو ٢٠١٠ تەلەفزوێن و ڕێکوزیا کوردییەکانە ئا جۆرە ئۆپەراسیۆنێ کریێنێ. دماو چند ساڵێوی و جە ئەنجامو ئا ئۆپەراسیۆنانە بەرکەوت، کە ئی هجوومێ سەرو داواو دەوڵەتو تورکیای و هامکارەکاش کریێنێ. سەبەب و بەهانێ حەرچیێو با، ئی ئۆپەراسیۆنەیچە حەر درێژەو ئا ئۆپەراسیۆناو وەڵێنێ و جە ئەنجامو مامەڵە قێزەونەکاو بەینو تورکیای و ئی ئەم دەوڵەتانە و سەرو داواو دەوڵەتو تورکیای کریێنێ و مکریا.
هجووم پەی ستۆدیۆکاو تەلەفزیۆنی چی وەختانە، مامەڵێوی ناعەقڵانی و دوژمنکارانەن، ئانەیە بەر موزۆ، کە ئی ئۆپەراسیۆنە پەیامێو پەی دەوڵەتو تورکیای و هامکارەکاش مکیانۆ. جە چند مانگی ویەردەنە هاکان فیدان، وەزیرو بەرو تورکیای چند جارێو بە نامێ کاروبارو بازرگانیوە سەرێ بەلجیکایش دان و گرێبەسو بازرگانییش رێک وستەن. حەرچیو بوچیۆ، ئی ئۆپەراسیۆنە ئەنجام و بەرهەمو ئا سەردایانە و ئا مامەڵانە. جە ئۆپەراسیۆنەکاو وەڵتەرێنە چندین هۆکارێسا وستێ ڕووە و بنەمای یاساییێشا پەی داواو مافەکاشا وەشێ کەردێ. بەڵام دماو ساڵانێو بەرکەوت کە ئی پەلاماردایێ جە ئەنجامو مامەڵەو رێککەوتەیە و قێزەونەکانە کریێنێ. ئا دۆسیێ گردشا چا وەختەنە دادگاکانە سەرکەوتێ نەبێنێ و تەلەفزوێن بێتاوان بەرشی. بێگومان ئینەیچشا یۆن چا ئۆپەراسیۆنا کە بەبێ ئەنجام مەنۆوە.
ئی هجوومێ پەی ئێمە غەریبێ نییەنێ. ئی ئۆپەراسیۆنە جیا نییا جە ئۆپەراسیۆنە گردییەکاو سەرو تەڤگەرو ئازادیی گەلو کوردستانی و بەشێوەنێ چنەشا. هیزی ئەردۆغان عێراقنە بێ و ئۆپەراسیۆنەکاش دژوو تەڤگەرو ئازادیی گەلو کوردستانی چەنی دەسەڵاتداراو عێراقی تاوتۆ کەردێ. ئی هەنگامێ گردشا پێوەرە لکی دریێنێ.
پێسە چەنی ئۆپەراسیۆنەکای تەر پووچەڵێ کریێوە، ئی ئۆپەراسیۆنەیچە بە ڕای سیاسییە و دیپلۆماسییە و یاساییە پووچەڵێ مکریاوە. دەوڵەتو تورکیای و هامکارەکێش سەرنمەگنانێ و کارەوانو ئازادی سەرو ڕاو وێشۆ بەردەوام مبۆ و میاوۆنە ئەنجام.
پی بۆنەوە ئێمە پێسەو کۆنگرەی نەتەوەیی کوردستانی ئیدانەو ئا هجوومە دڕندانا و ناڕەوایا مکەرمێ و جارێوی تەر پەشتیوانیی وێما پەی میدیای کوردی بەرموزمێ مەبارەکبایی ئاهەنگو مدرامانیشا پەنەمواچمێ."
