کەنەکە، جەژنەو ڕەمەزانیش جە گەلوو کوردسانی و جەهانی ئیسلامی پیرۆزە کەردە و ئەرەیاۋناش، "هیواڎار و باوەڕدارێنمۍ پانەی کە گەلەکەما جە ئاینڎێوە نزیکەنە بە ئارامی، ئاشتی و ئازاڎییۆ جەژنە و شاڎیی ۋێش سەروو خاکوو ئازاڎیی کوردسانیۆ پیرۆزە بکەرۆ."
کۆنسەو ڕاوەبەری کۆنگرەو نەتەوەیی کوردسانی کەنەکەی بە پەیامێوە جەژنەو ڕەمەزانیش پیرۆزە کەردە.
دەقوو پەیامەکەو کەنەکەی پی جۊرەنە:
"ئارۆ جەژنەو ڕەمەزانینە، ئێمە جەژنەو ڕەمەزانی سەرەتا جە زینڎانیا و جەنگەوانا ئازاڎیی، گەلوو کوردی و جە گرڎوو گەلا جەهانی ئیسلامی پیرۆزە مکەرمۍ، پا هومېڎەی جەژنەو ڕەمەزانی جە وڵاتەکەیما و گرڎوو جهانی بۆ بە وەسیلەو ئاشتی و ئازاڎیی."
هێزەکاو پارېزنای کوردسانی جە چن مانگی ۋیەردەنە، دژوو ئەرەگیرا ئۆپەراسیۆنی گەورەشا ئەنجامدا و گورزەی قورسەشا جە ئەرەگیرا شانا. ئیساتۍ ئینایمۍ سەرەتاو وەهارینە. یەرۍ حەفتۍ چېوەڵتەر جە سەرانسەروو کوردسانی و بەروو وڵاتی بە جۆش و خرۆشێوە فرۆ جەژنەو نەورۆزیما پیرۆزە کەردە. دماتەر جە هۊرچنیە هەرێمیەکاو سەرنیشتوو کوردسانینە، گەلەکەما ئیراڎەو ۋێش نیشانە دا و سەرکەوتەیۍ گەورەش دەس وست. ئیساتۍ ئێمە بە ڕۆحوو ئی سەرکەوتاوە پێشوازی جە ڕەمەزانی مکەرمۍ."
ئەڵبەتە هەڵای ئاژېوە ئاڵۆز ئینا ئارانە. جە گرڎوو کوردسانینە هجوومی کۆمکوشی پەی سەروو گەلەکەیما بەردەواما. هجووم و ئەرەگیرا و هەڕەشۍ دوژمنا پەی سەروو پانیشت و ۋەرنیشتوو کوردسانی تا مۍ ڕووە جە زیاڎبیەی مکەرۆ. جە ۋەرکەوتەنە فشارەکۍ دەوڵەتی سەروو گەلەکەیما بەردەوامېنۍ و قۊرتە کۆمەڵایەتییەکۍ ڕووانە قووڵتەرۍ باوە. پانیشتەنە قەیرانەو ئابوری و کۆمەڵایەتی درێژەش هەن، حەرپاسە قۊرتەو مەنتیقە ئەرەبڕیاکا چارەسەر نەکریێنۍ و هجوومەکۍ دەوڵەتوو تورکیایچ پەرەشا سانان. چی وەختەنە پێویسا گرڎوو هێزە کوردسانیەکا ۋەرا ۋەر پا هجووما مرداوە. پی بۆنۆ داوا جە گەلەکەیما و گرڎوو گەلا مەنتیقەکەی مکەرمۍ جە دژوو هجوومە ئەرەگیریەکا دەوڵەتوو تورکی مرداوە، جە دژوو ئەرەگیرا دەنگشا بەرز بکەراوە و یۊبیەی ۋێشا بەقوەتتەر بکەرا."
بەتایبەت چی ڕووا جەژنېنە، هیوا و باوەڕما پاسەن کە گەلەکەما جە ئاینڎێوە نزیکەنە بە ئارامی و ئاشتی سەروو خاکوو ئازاڎیی کوردسانینە جەژنە پیرۆزە بکەرا. جارێوەتەر جەژنەو ڕەمەزانی جە گرڎوو زینڎانیا جەنگەوانا ئازاڎیی و گەلوو کوردی و کوردسانیا و گرڎوو جەهانی ئیسلامی پیرۆز مکەرمۍ.
