کۆنسەو ڕاوەبەری کۆنگرەو نەتەوەیی کوردسانی (کەنەکە) بۆنەو جەژنەو پاسکالیوە پەیامێوەش وەڵاکەردۆ.

پەیامەکەو کەنەکەی پی جۊرەنە:

"ئارۆ جەژنە، ڕۊو هۊرئێستەیۆ، جەژنەو پاکبیەیۆ، جەژنەو پاسکالاینە.جە وەختێنە کە گرڎوو گەلا میزۆپۆتامیای و گەلا کوردسانی بە قۆناغێوە تاریخیەرە وییەرا، بە دڵێ وەشۆ جەژنەو گەلا ئاشوری-سوریانی-کلدانی و گرڎوو باوەڕدارا مەسیحی پیرۆز مکەرمۍ.

ئێساڵ ئی ڕووە و ئی جەژنۍ جە قۆناغێوە تاریخیەنە سەروو گەلا کوردسانیرە وییەرۆ. ئی قۆناغۍ پۍ گرڎوو گەلا مەنتیقەکەی بە گرڎیی و گەلاو کوردسانی بە گرڎوو چین و توێژێکاوە، قۆناغێوە چارەنوویسسازەنە. ئاخێزوو گەلا جە دژوو زوڵمی و ئەرەگیری کە گەلاو کوردی، ئاشوری-سوریانی-کلدانی، عەرەب، ئەرمەنی و هتد... کۊکەردێنۍ و جە ۋێش گێرتێنۍ و تەماموو دنیێنە دەنگش دانۆ. چی ڕووە تاریخیانە پیرۆزکەردەی جەژنەو پاسکالی، عەشقێوە گەورە و ئیرادێوە بەقوەتتەر مڎۆ بە یۊبیەی و مدرامانی هامبەش پۍ ئەرەمەرزناو گلێرگێوە یەکسانی و پێوەرە ژیۋایۍ ئاشتی و بەختەوەرانەی.

پێسە کەنەکەی، بە گەرم و گوڕییوە جەژنەو پاسکالی جە تەماموو باوەڕدارا مەسیحی و گرڎوو گەلاو کوردسانی و تەماموو جەهانی پیرۆز مکەرمۍ. هیواڎارێنمۍ ئی جەژنۍ جە سەرانسەروو جەهانی و وڵاتیمانە، بۆ بە مەڵامەتوو ئاشتی و ئارامی."