کۆنسەو ڕاوەبەری کۆنگرەو نەتەوەیی کوردسانی، کەنەکە بۆنەو ساڵیاڎوو تەرتەلەی دێرسیمی کە بە قەراری ڕسمی دەوڵەتی جە ٤و ئایاروو ١٩٣٧ ئەنجامدریا ، بەیاننامێوە نوویسیاش وەڵاکەردۆ.

دەقوو بەیاننامەکەو کەنەکەی پی جۊرەنە:

"٨٧ ساڵۍ چێوەڵتەر، گەلوو کوردی دێرسیمەنە جە حۆت مانگانۆ تا ٧٠ ساڵان کۆمکوش کریۍ. کۆمکوشیێوە وەحشیانە، هجوومېوە پاکتاوکاری سەروو دێرسیمی و دێرسیمیەکارە ئەنجامدریا. جە ٤و ئایاروو ١٩٣٧ بە قەراری ڕسمی دەوڵەتی و حکومەتوو تورکی، هجوومێوە سەروازی ۋەرفراوان بە ئامانجوو دلېنەبەردەی گەلوو دێرسیمی ئەنجامدریا. دەوڵەت و حکومەتوو تورکی بە قینی و کینەو حەق ئەسایۆ جە ئاسمان و زەمینەنە هجوومشا کەرد سەروو دێرسیمی. هەزاران کەسێشا دێرسیمەنە کۆمکوشۍ و زامڎارۍ کەردۍ و بە هەزاران کەسێشا ناچار بە کۆچی کەردۍ و دەربەدەرێشا کەردۍ. کۆمکوشیێوە ڕسمی بە قەراروو دەوڵەتی و حکومەتی تۆمار کریا. ئینە ئەمرەو کوشتەی گرڎوو گەلوو دێرسیمی بۍ. ئانەی دەوڵەت و حکومەتوو تورکی دێرسیمەنە سەروو گەلوو کوردیشارە ئاورد، خراپتەرین دوژمنەکاو کوردی نەکەردەنشا. جگە جە کۆمکوشی و زامڎار بیەی و کۆچبەرکەردەی بنەیانەیی، نامۍ دەرسیمی بە یاسێوە تایبەت فاڕیا پە تونجلی. ئا قەراروو کۆمکوشیە ، ئا سیاسەتە دوژمنکارییە، تا ئارۊیچ بەردەواما. دڵوو گەلوو کوردی بە مەڵامەتوو ئا کۆمکوشیە گەورەیۆ سۊت و قەد یاڎ مەشۆوەو جە یاڎ مەکریۆ. کورد هەم پېسە کردەوەی و هەم ئەنجامدەرا ئا ڕووەدایە مشۊم جە یاڎش نەکەرۆ و پەی هەمیشەی جە یاڎەوەرییەکاشەنە بازۊشۆ.

کەنەکە جە ٤و ئایارینە، ئی کۆمکوشیە مارۆوە یاڎوو  دماو ٨٧ ساڵ بە گرڎوو هێزوو ۋێشۆ دیسان شەرمەزارش مکەرۆ. گرنگ نییا ۋەرپرسا دەوڵەتی و حکومەتی ۋنمچ چێش ماچا، دەرئەنجاموو سیاسەتی گرڎینی چێشا هیچ جیاوازیێوە نییا و ئی دڕندەییەی کە ۋەرا ۋەروو گەلەکەیمان کریۆ پەڕێوە سیاوا جە تاریخی ۋناوی دەوڵەتی و حکومەتوو تورکیاینە. جە هەر یاڎکەردەیۆیۍ ئی کۆمکوشیەینە ئی ڕووە پەڕ جە ئێشەینە، گەلەکەما، ڕابەر، سەرمەشقا و کۊششکارا جمیەری نەتەوەیی گەلەکەیمانە، لە یاڎەوەرییەکاشانە بە ڕۊشنی و حورمەتۆ مازاشۆ و سەروو پرسوو ئی کۆمکوشیە ئەوەپەرسای جە دوژمنی مکەرا و ڕا مەڎا کۊشیایشا لاواز بۆ.

مشۊم سەروو کۆمکوشی دێرسیمی ئەوەپەرسای جە دوژمنی بکریۆ.

کۆمکوشی دێرسیمی جە یاڎ مەکریۆ و مەبۆ جە یاڎ بکریۆ."