شارو کۆپنهاگن و پایتەختو دانیمارکینە مەراسیمێوە یاڎکەردەیۆ پەی ٥ هەزار گەشمەرڎا کۆمکوژی هەڵەبجەی لوواڕاوە کە جە ١٦و ئادارو ١٩٨٨ ینە بە هرووژمی کیمیاۋیی جە لایەنو ڕژێمو سەدامیوە کۆمکوژ کریۍ.
یاڎەکە جە کەسایەتی گەشمەرڎا هەڵەبجەینە بە دەیەقێوە بێدەنگی پەی یاڎو تەمامو گەشمەرڎا کوردەسانی، دەسش پنەکەرڎ.
دماتەر قسۍ کریۍ و زانیاری سەرو کۆمکوژی هەڵەبجەی باس کریا. ئاماژە پانەی کریا؛ "پەی ئانەی ئا جۆرە کۆمکوژیۍ سەرو گەلوو کوردیرە واوەی نەباوە، پەنەوازا کورد ناکۆکییە دلېینەییەکاش وزۆنە لاوە و یەکڕیزیی ۋێش بنیاڎ بنیۆ".
هەرپاسە جە مەراسیمەکەنە باس جە بانگەوازییەکەو ڕابەر ئاپۆی پەی ئاشتی و گلېرگەی دیموکراتیکی کریا و ئەرەیاۋېیا، "پەنەوازا گەلوو کوردی و گرڎو پێکئامایەکا کوردەسانی بە عالی چی پرۆسەیە بیاوانە و خاوەنداریش ۋنە بکەرا".
مەراسیمەکە بە هوتافەکا "گەشمەرڎۍ هەڵەبجەی نمەمرا"، "گەشمەرڎۍ کەرامەتو ئێمەنۍ"، "مەرگ و نەمەنەی پەی فاشیزمی و دیکتاتۆری"، "بژیۋۆ گەریلا"، "بژیۋۆ ڕابەر ئاپۆ"ی دمایش ئاما.
