عوسمان ئونەی ڕاوبەروو سەندیکای شۊڕشگێڵنیی کرێکاراو ئاوەڎانی و بیناسازی و ڕاوبانی (دیسک) واتش: "پێسە گرڎوو بەشەکای تەروو گلێرگەی، کرێکاراو ئاوەڎانییچ ئیتر ڕژێمەکاو ئاکەپەی و مەهەپەیشا گەرەکۍ نییەنۍ".

عوسمان ئونەی ڕاوبەروو سەندیکای شۊڕشگێڵنیی کرێکاراو ئاوەڎانی و بیناسازی و ڕاوبانی (دیسک) ئەرەیاوناش: ئاڎۍ وەختوو دەسەڵاتوو ئاکەپەی و مەهەپەینە چێروو فشارێوە فرەینە بیێنۍ و وەختێوەیچ مافەکێشا پاشێلۍ کریێنۍ، دەوڵەت چەمۍ وێش چا  پاشێلکارییە کۊرۍ کەرڎێنۍ.

 ئونەی واتیچش، بە پاو بەیاننامەو ئەنجوومەنوو سڵامەتی و تەندروسی کرێکارا (ÎSÎG)، ساڵانە ٢ هەزار کارێکارۍ بۊنەو تاوانەکاو هەرمانێوە مرا. واتیچش: "سەڎا ٣٥وو ئا کرێکارایچە کرێکاری کەرتوو ئاوەڎانکەرڎەیۊنۍ. ئا کرێکارۍ جە سیستموو هەرمانەو بەڵێندەرە ناسەرەکییەکانە هەرمانە کەرا. سەرباروو ئانەی ٢ جارۍ ڕانماییۍ گرڎینۍ چا بوارەنە وەڵۍ کریێنۍ، وەلۍ بە پاو ئەو ڕانمایا هەرمانە بە کرێکارا مەکریۊ. وەختێوەیچ ئێمە ماچمۍ، شمە تاوانۍ کەرڎۍ، ئا بەڵێندەرە لاوەکییۍ ماچا، وەزارەت چی بابەتەیە هاگاڎارا".

ئونەی ئانەیچش وات، ئا کرێکارۍ دەنگشا بە ئاکەپەی دان و دماتەر نەعلەتەشا وەنە کەرڎەن. ئونەی باسش چانەیچە کەرد، فرەو کرێکارا کورڎستانۊ ئامێنۍ و واتش: " کورڎستاننە ئانۍ مافوو ژیوایشا نییا، فرێشا کرێکاری کەرا. یان مشۊم با بە جەرڎەوانۍ و جاشۍ، یان مشۊم بە کەرامەتوو وێشا هەرمانە کەرا. بەشێوە فرەو کرێکارا خەڵکوو کورڎسانینۍ، ورچنیایە وەڵینەکانە هەدەپە پاسش پەی گێرتێبێنۍ و ئاڎێچۍ لوێبێنۍ پەی سەروو بنکەکاو دەنگدای و دەنگشا دابۍ.

پێسە گرڎوو بەشەکاو گلێرگەی، کرێکاراو ئاوەڎانی و بیناسازی ئیتر ڕژیموو ئاکەپەی و مەهەپەیشا گەرەک نییا. هەڵوێسشا ڕۊشنا. کرێکاراو ئاکەپەیچ چا دۊخەیە بێتاقەتێنۍ و جە ئاکەپەی دوورۍ گناوە. من فرێم دیێنی، کە نەعلەتە کەرا وێشا کە دەنگشا بە ئاکەپەی دان. کرێکارۍ گەرەکشانە ئاکەپە بلۊ و جیاتیی ئاکەپەی کەسانۍ لایەنگیرۍ زەحمەتکیشا و ڕەنجدەرا، ئاشتی،  دیموکراسی و ئازاڎی بەیا".

س.ز