ئارۊ چوارشەممە شاندێوە مەڵبەندوو دووۍ ڕێکوستەی یەکێتی نیشتمانی کوردستانی، سەروو ئاستوو کەسی یەکەمی شاروو کەرکووکینە، بە سەرپەرشتی ڕەوەند مەلا مەحموود سەرۍ بارەگاو ئەنجوومەنوو هەرێموو کەرکوووکوو تەڤگەروو ئازاڎیی گلێرگەو کوردستانیشا دا، کۊمەڵ سەرمەد هامسەرۊکوو هەرێموو کەرکوووکوو تەڤگەروو ئازاڎییوە خێرامایشا کریا، کە بە مەبەسوو جەختکەرڎەیوە جە یەکڕیزیی حزب و لایەنە کوردستانییەکا کەرکوووکنە دماو پەسەندکەرڎەی ئەنجاموو ورچنیەیەکاو ئەنجوومەنوو پارێزگاو کەرکوووکی و میانەو سەردایەکەینە، هەردووە لۍ هامڕۍ بێنۍ جە گرنگیی یەکڕیزیی دلۍ یانەو کوردینە و پەلەکەرڎەینە جە پێکئارڎەی حکومەتی وێمانەو کەرکوووکینە تا دمایی پی دۊخە ناسەقامگیرەو ئیساتۍ شارەکەی باریۊ.

چی ورچنیەیەنە کورد تاواش سەنگیش سەپنۊ

ڕەوەند مەلا مەحمود وەرپەرسوو مەڵبەندوو دووۍ یەکێتی نشتیمانیی کوردستانی، دماو کۊبییەوەکەی چەنی ئەنجوومەنوو هەرێموو کەرکوووکوو تەڤگەروو ئازاڎی گلێرگەو کوردسانی، کۊنگرێوە ڕۊنامەوانیینە سەبارەت بە سەرەدایەکەیشا پەی دەزگاکاو ئەرەیاونای واتش: "دماو ورچنییەیەکاو ئەنجوومەنوو پارێزگاو کەرکووکی، وەشبەختانە کورد تاواش دەنگ و ڕەنگ و سەنگەو وێش خاس سەپنۊ، ئیساتێنە ئێمە بە بە بەرنامێوە سەرۍ حزبە کوردی و عەرەبی و تورکمانییەکا مدەیمێ، ئەوەڵ حزبە کوردییەکاوە دەسما پەنە کەرد".

تەڤگەروو ئازاڎی جە ڕووە سەختەکانە هەڵوێستی جیددیشا بییەن و وەرگێرییشا وەنەو کەرکوووکی کەرڎەن

ڕەوەند مەلا مەحمود باسوو گرنگیی دەوروو تەفگەروو ئازاڎییش کەرد جە وەرگێریی خەڵکوو کەرکووکینە رۊژگارە سەختەکانە و واتش: "تەڤگەروو ئازاڎی یۊ چا حزبە کوردستانییانە کە لە کەرکووکنە دەوری خاسش بییەن جە هاندای خەڵکینە پەی لوای سەروو سندوقەکاو دەنگدای و هەرپاسە ڕوە سەختەکانە هەڵوێستی جیددیشا بییەن شارەکەنە چەنی خەڵکی مەنێنیوە و وەرگێرییشا کەرڎەن، پەووکای بە پێویسم زانا، کە سوپاسشا کەرمۍ پەی هەڵوێستەکەیشا و پەنەشا واچمۍ کە ئێمە گردما هەنمۍ پێوە".

بتاومۍ دلۍ یانەو کوردی کەرکوووکنە ڕێک وزمۍ

ئینجا نامێبریا کۊنگرە ڕۊنامەوانیەکەنە واتش: "دماو ئانەی ورچنیەیەکۍ تەمامیێ، پێویس کەرۊ جارێوە تەر گردوو پەیوەندییەکاما تازۍ کەرمێوە و هاگاداروو یۊترینی بیمۍ گردوو بابەت و بۊنە نەتەوەیی و نشتیمانییەکانە و گردما پێوە یەک دەس بتاومۍ یانەو کوردی کەرکووکنە ڕێک وزمێ، وەشبەختانە تەڤگەروو ئازاڎییچ هەمان پەیلوایشا هەن و تاواما ویروڕا فاڕمێوە، ئیساتێچەنە ئێمە ئینایمۍ سەروبەندوو پێکئارڎەی حکومەتی وێمانەینە کەرکووکنە و پێویس کەرۊ ویروڕا چەنی حزب و لایەنە کوردییەکاو شارەکەی فاڕمۍ و ڕاو گردوو حزبەکان ورگێرمۍ تا دماتەرەنە حکومەتێوە وێمانەی قەوەت وەش کەرمۍ پەی خزمەتکەرڎەی تەماموو ئەرەنیشتاو شارەکەی بەبۍ فەرامۊشکەرڎە حیچ پێکئاماێوە.

دەسوەشییشا وەنە کەرمۍ پەی پارێزنای یەکڕیزیی یانەو کوردی

لاو وێشۊ کۊمەڵ سەرمەد سەبارەت بە سەردایەکەو شاندەکەو یەنەکەی پەی لاو ئەنجوومەنوو هەرێموو کەرکووکوو تەڤگەروو ئازاڎی، پەی دەزگاکاو ئەرەیاونای واتش: "ئینە بەشێوەن جە لە کولتوری دبلۊماسی و سیاسیی یەکێتی نشتیمانیی کوردستانی جە حەر ڕووەدای و پەرسێوە تایبەت بە نەتەوەکەیمانە کەرکووکنە سەروو حزب و لایەنە سیاسییەکا مدا بەتایبەتی حزبی کوردی، ئێمەیچ پێسە تەڤگەرووی ئازاڎ دەسوەشییشا وەنە کەرمۍ پەی ئی هەنگامە مەبارەکۍ پەی پارێزنای یەکڕیزیی یانەو کوردی".

حکومەتێوی وێماننە وەش کەرمۍ هینوو گردوو پێکئامایەکا بۊ

کۊمەڵ سەرمەد هامسەرۊکوو ئەنجوومەنوو کەرکووکوو تەڤگەروو ئازاڎیی واتیچش: "سەبارەت بە ئیدارەی وێمانەو شاروو کەرکووکی ئێمە تەسەورما چانەن، کە گردما پێوە پاڵپەشتیی لیستوو (کەرکوووک هێز و ئیرادەمانە)ی کەرمۍ کە فرەتەرین کورسیێش جە ورچنیەی ئەنجوومەنوو پارێزگاو کەرکووکینە ئارڎێنۍ تا بتاوا حکومەتێوە وێمانە وەش کەرا، کە گوزارشت جە گردوو پێکئامایەکا کەرۊ.

بە وەشکەرڎەی ئیدارەی وێمانەی متاومۍ دمایی پی دۊخەو ئیساتۍ بارمۍ

سەبارەت بە پەلەکەرڎەی جە ئەرەمەرزنای حکومەتی وێمانەینە شاروو کەرکووکینە پەی دماییئارڎەی پا دۊخەیە ملوو کورداو شاروو کەرکووکیرە ئامان، کۊمەڵ سەرمەد هامسەرۊک پەی دەزگاکاو ئەرەیاونای واتش: "بەدڵنیاییوە چند پەلە کریۊ جە نیایرەی حکومەتی وێمانەو شاروو کەرکووکینە خاستەرا و لیستی فرەتەرین دەنگیچ لیستوو (کەرکووک هێز و ئیرادەمانە)ینە کە بتاوۊ ئیدارە وێمانەکەی وەش کەرۊ تا بتاومۍ کێشە و قەیران و دۊخەکەو کەرکووکی چارەسەر کەرۊ".