کۆمەڵکوشی ٩-١-٢٠١٣ی پاریسی کە ساکینە جانسز و هەڤاڵەکێش کەردێ ئامانج چی ئەجام دریا و چ ئاژێوش شونیەرە ئوما و سەرەڕاو بەڵگێ کەسەلەمناش تورکیای ئەنجامشدان، پەی چێشی فەڕەنسای پەردەپۆش کەرد و عومەر گونەی تاوانباری بەڕوواڵەت سەرەکی و میتە بەشداربیەکێ تەرێ کۆمەڵکوشیەکەی ڕووبەڕڕوێ چ چارەنویسێ بیێوە و چێشان سەر ئاوما؟ بەرژەوەندی سیاسیی، ئابوریی، سەربازیی و دیپلۆماسیی چ ڕۆڵێش جە کۆمەڵکوشییەکەنە و پەردەپۆشکەدەیشەنە بێ؟ کورد و ئازادیوازێ هەڵوێشتشان وەرانوەر بە کۆمەڵکوشیەکەی نیشانەدا و هەن؟
جە دمای ٩ ساڵان جە دەربازبییەی سەرو کۆمەڵکوشی پاریس-یەرە، ئی پرسیارێ هیشتای ئینێ ئاژەو کوردی و ئازادیوازەنە و فرەکەسێ و لایەنێ و عەوداڵێ هۆرگێرتەی وەڵامەکێشانێ! جەی ئی کۆرنۆلۆژیەنە هەوڵدریان بەوردی و دروستی وەڵام بدریانێ و سەبارەت کۆمەڵکوشیەکەی فرەتەرین زانیاریێ بوزیانێ ڕووە. 

"سەرەتا"

جە ۹ مانگەو کانونو دووەمو ساڵەو ۲۰۱۳ی، جە پاریس-و پایتەختو فەڕەنسای ژەنە پێشەنگەو جمیەرو ئازادی کوردستانی (ساکینە جانسز ئەشناسیێ بە سارا) و هەر دووێ ژەنە کۆشەرێ (فیدان دۆغان ئەشناسیێ بە رۆژبین) و (لەیلا شایلەمەز ئەشناسیێ بە رۆناهی) کۆمەڵکوشێ کریێ. سەرەڕاو ئانەیە بکوشەکەشان عومەر گونەی دەستگیر کریا و بەبەڵگێ سەلەمیا کارش پەی دەستگاو هەواڵگری و سیخوڕی میتی تورکی کەردەن و بە فەرمانو میتی و ڕاست تەر بەفەرانو ئەردۆغانی تاوانەکەش ئەنجامدان و جەی ئی چوارچێوەنە دماتەر دیسان چەندین بەڵگێ تەرێ دەنگیێ و دیمەنییێ و وێنەیی و نویسیێ بەدەستێوزیێ، بەڵام دەوڵەت و دادگەری فەڕەنسای جە سەرەتاەوە تا کۆتایی تاوانەکەی پەردەپۆش کەرد. جە ئی چوارچوەنە کوتوپڕ بانگەشە کریا کە عومەر گونەی بە شێوازێکی گوماناوی جە زیندانەنە مەردەن و واچیا، گوایا  تۆماری سەرەتانی سەرەشەنە بییەن، بە ئا هۆکارە گیانش جەدەستدان. بەڵام ئا بانگەشە هەرگیز پەشتڕاست نەکریاوە و دیار نییە جە بنەڕەتەنە عومەر گونەی مەردەن یان زیندەن؟
پەی پەردەپۆشکەردەکەی کۆموڵکوشی پاریسی هامکات چەنی بانگەشەو مەردەی عومەر گونەی جە زیندانەنە، جە سەکەندالێوی ئاوڕوبەرانەنە دیسان بانگەشە کرایام کە گوایا سەرجەم بەڵگێ و دۆسیێ سەرو کۆمەڵکوشیەکەی کە جەلاو دادگای و دادوەری فەڕەنسای بیێنێ، دزیێنێ.

"کۆمەڵکوشیەکە چەنی ئەنجام دریا و دادگا هەڵوێستش چیش بێ"

٩ ساڵێ جەی وەرتەر، جە باڵەخانەو ناوەندو کوردستانی جە شارو پاریسی، ژەنە پێشەنگەو جمیەرو ئازادی کوردستانی و یوە جە ئەرەمەزنەرانو پەکەکە-ی (ساکینە جانسز ئەشناسیێ بە سارا) و هەر دووێ ژەنە کۆشەرێ (فیدان دۆغان ئەشناسیێ بە رۆژبین) ئەندامەو کۆنگرەی نەتەوەیی کوردستانی- کەنەکە و (لەیلا شایلەمەز ئەشناسیێ بە رۆناهی) ئەندامەو ڕێکوزیاو گەنجانو کوردی جە ئەوروپا، دڕندانە شەهیدێ کریێ. هەر زوو بەرکەوت و ئاشکرا بی کە کەسێ بەنامێ عومەر گونەی بە فەرمانو دەستگاو سیخوڕی تورکیای - میت تاوانەکەش ئەنجامدان. دمای ئانەیە گونەی دەستگیر کریا و دزانش نیا تاوانەکەیەرە، دادگا و دادوەر دەستشان دا پەیجۆری و پارێزێ قوربانیەکانو کۆمەڵکوژییە سەدان بەڵگێ حاشاهۆرنەگێرێشان وستێ وەردەست و دادگای و دادوەری گردی فەرەنسای.
جە ماوە نزیک بە چوار ساڵان جە پڕۆسە و دادگاییکەردەکەیەنە بە بەڵگێ دەنگیێ و دیمەنییێ و وێنەیی و نویسیێ سەلەمیا کە عومەر گونەی ودەزگاو سیخوڕی تورکیای- میت پیلان و بەرنامەو کۆمەڵکوشیەکیەشان متێنەرە و بەفەرمان و سەرپەرستی خودو ئەردوغانی ئەنجامشان دان. بەڵام دادگاو فەڕەنسا هەرگیز باسش جە ئانەیە نەکەرد و جە بارە حقوقی و قانونیەکەوە دزانش بە ئا ڕاستیەرە نەنیا.

"دادگا دۆسیەکەش وستەرە"

جە وەختێوەنە بڕیار بێ جە 23 کانونو دووەمو ساڵەو 2017 دادگا دەست بە ئەرەنیشتەکێ دۆسیەو کۆمەڵکوشی پاریسی بکەرۆنەوە  هەتا  24 ی شوباتو هەمان ساڵی  به‌رده‌وام ببۆنە، بەڵام بەهۆکارو ئانەی پڕێوەنە عەمەر گونەی تاوانباری سەرەکی بە شێوازێوی گوماناوی جە زیندانە گیانش جەدەستدا و واچیا بە نەوەشی مەردەن، ڕاڕەو دۆسیەکەی و دادگای فاڕیا و دادگا فەڕەنسای بڕیارشدا بە ئەرەوستەی دۆسیەکەی.
بەڵام پارێزەرێ قوربانیەکێ کۆمەڵکوشی پاریسی دژ بە بڕیارەکەی مدرێوە و ئاشکراشان کەرد، نمەکریۆن دۆسیەکە ببەسیۆنەوە تەنها بە عومەر گونەی کە تاوانباری سەرەکییەن، چونکە بە دەیان بەڵگێ سەلەمیان چەندین گەورە کاربەدەستێ تورکیا بەشدارێ تاوانەکەی بیێنێ و نمەکریۆن پەلکێشی دادگای نەکریانێ. پارێزەرەکێ دەستنیشان کەرد، دۆسیەکە تەنها حقوقی و قانونی نییەن، بەڵکو تەمام سیاسییەن و وەرو ئانەیە تانە جە بڕیارەکەو دادگای مدانی و پەسەندش نمەکەرانێ و هەرگیزیچ دەست جە دۆسیەکەی هۆرنمەگێرانێ.

"پەیوەندی عومەر گونەی و میتی تورکی"

عومەر گونەی تاوانباری سەرەکی کۆمەڵکوشی پاریسی، نزیک بە ساڵێوە وەر جە کۆمەڵکوشیەکەی جە ئەڵمانیاوە شییەبێ پاریس و پەیوەندیش بە جمیەرو ئازادی کوردی کەردەبێ. ئیتر جە دمای ئانەیە وردە وردە متمانەش پنە مەکریۆنە و چەنی ئەندامێ و لایەنگرێ جمیەرەکەی تێکەڵ مەبۆنە و تا دەرنجام سەرەش ناوەندو زانیاری کوردستانی جە پاریس بەرمشۆنە و بە هامکاری و ڕانمونی میتی پیلانەو تیرۆرکەردەی ساکینە جانسزێ و هەڤاڵەکانش مجارە. گونەی شۆنەو ئەنجامدای کۆمەڵکوشیەکەی، جە کۆجیەو "لافایت"ی دەسگیر مەکریۆن و پۆلیس ونەش مەپەرسۆنەوە. نامبریا سەرەتا نکۆڵی جە ئەنجامدای تاوانەکەی مەکەرۆن، بەڵام وەختێوە کە دیمەنێ تۆمارکریێ کامێراکێ چەمداریش نیشانە مدریانێ، تێستی دی ئێن ئەی-ش پەی مەکریۆن، پەنجەمۆرش جە یاگێ تاوانەکەیەنە بەرکەوتێ و ئەوامەنەو بارووتی سەر چاکەتەکەیشەوە ئێزیاوە، بەناچاری دزانش نیا ئەنجامدای تاوانەکەیەرە. 
یەک ساڵ دماتەر یانی جە 2014نە، بەڵگێ تەرێ پەیدێ کریێ. جە ئا ساڵێنە میانەو ڕژێمەکەو ئەردۆغانی و تاقمەکە فەتوحوڵڵا گولەن-ی تێکشی و هەر دووێ لا پەی زڕنای نامێ هەنتری، کۆمەڵێ بەڵگێ دەنگیێ، دیمەنیێ و نوسیاریێشان جە ئەنتەرنێتەنە وەڵاوێ کەردێوە، کە بەشێ جە ئا بەڵگا پەیوەستێ بێنێ بە پیلانەو ئەنجامدای کۆمەڵکوشی پاریسی و سەلەمنێنێش کە ڕاستە ڕاستە ڕژێمو ئەردۆغانی وەرپەرسیار و ئەنجامدەرو کۆمەڵکوشیەکەیەن.

شۆنیشەرە تۆمارێوی تەری دەنگی وەڵاوکریاوە کە دلێشەنە عومه‌ر گوینه‌ی و 2 سیخورێ ڕژێمو تورکیای پێوەرە پیلانو تیرۆرکەردەی ساکینە جانسزێ مجارە. جە تۆمارەکەنە باس جە وردەکاری تیرۆرەکەی مەکریۆنە و پنەوازی بە بەدەستوستەی چەکی پەی کوشتەی ساکینەی قسێش سەر مەکریانێ.
تۆمارەکە دەنگییەکە جەلاو پۆلیسە پسپۆره‌ فه‌ره‌نسیه‌کاوە پەشتراست کریاوە و ئا کەسە پەیجۆرکارە فەرەنسیێ کە جە نزیکەوە شۆنیەرەلوای پەی تاوانەکەی مەکەرێنێ ئاشکراشان کەرد: جە دمای ئاشکرا بییەی ئەنجامدەرێ کۆمەڵکوشیەکەی و پەی ئانەیە کوشەری سەرەکی یانی عومەر گونەی زیاتەر وردەکاریێ تاوانەکەی ئاشکرا نەکەرۆن کە جە رێککەوتو 21 کانونو دوه‌مو 2013 ده‌ستگیرکریابێ، میت هەوڵش دا جە زیندانە بڕفانانەش و ڕزگارز بکەران، بەڵام پیلانەکەشان ئاشکرا بی و سەرش نەگێرت و شکست ئاورد.

"ئیتر دەست کریا بە لاڕارەبەردەی ڕاستی کۆمەڵکوشیەکەی و پەردەپۆش کەردەیش"

دمابەدمای ئانەیەکە پیلانو دەربازکەردەی عومەر گونەی جە زیندان ئاشکرا بی و شکستش وارد، شێوازێوی تەر جە پیلانی گیریانەوەر. ڕژێمو ئەردۆغانی کە دەستەکەش کەشف بییەبێ و بەڵگێ تاوانباریش جە کۆمەڵکوشیەکەنە حاشاهۆرنەگێرێ بێنێ و تاوانەکە سەرش ساخ بییەبێوە، فاشارە سیخۆڕیێ و هەواڵگریێ و ئابوریێ و دارایێ و سیاسیەکێش دژ بە دەوڵەت و حکومەتو فەڕەنسای وستێ گەڕ و چێر بەجێر و بەئاشکرا چەندین پەیمانێ و ڕێککەوتێ تازێش چەنی حکومەتی فەرەنسی ئیمزێ کەردێ کە بەهۆشانەوە فەڕەنسا دەیان ملیارد یۆروێ قازانج مەکەرێ و کەلوپەل و تفاقێوی سەربازی فرە بە تورکیا مەورەشێ. دەرەنجام ئانەیچە بەرهەمشدا و هەر خێرا حکومەتی فەڕەنسی فشارەکێش پەی سەرو دادگای و دادوەری زیادێ کەردێ. دادگا و داوەری گردیی فەرەنسای هەرچی بەڵگێ سەبارەت بە گەورە کاربەدەستەکێ تورکی بێنێ و سەلەمنێنیش دەستشان جە کۆمکوشیەکەنە هەن، نەوستێشانە دۆسیەو کۆمەڵکوشیەکەی و نادیدێشان گێرتێ.
هەر جە ئا چوارچوەنە، جە دۆسیەو کۆمەڵکوشی پاریسیەنە سکەنداڵ "ئاوڕووشییە"ی گەورە ڕووشدا و واچیا کە گوایا "کۆمپیوته‌رو دادوەری گردیی فەرەنسای، ژان دویێ-ی کە ڕاستەوێ پەیجۆری پەی کۆمەڵکوشیەکەی مەکەرێ و سەرجەم بەڵگەکەێ کۆمپیوتەرەکەشەنە بێنێ، جە 25و ئەیلولو 2013ی جە یانەکەشەنە دزیان.
بەڵام سەرجەم ئی پیلانێ کۆڵەشان بە خانەوادێ و پارێزەرێ قوربانیەکان و گەلو کوردی و دۆستەکانش نەدا و سورێ بیێ سەرو بەردەوامیدای بە دادگاییکەردەکەی و ونەکۆڵیای زیاتەر جە دۆسیەکەی. هەر پۆکەی بەناچاری ونەپەرسای جە دۆسیەکەی 2 ساڵی تەمام بەردەوام بێ. بەڵام دادگا و دادوەری گردیی فەرەنسی دەستی دەستی بە دۆسیەکەی و بەڵگەکان مەکەرێ بە ئا ئومێدە کەسوکارێ و پارێزەرێ قوربانیەکان و گەلو کوردی و دۆستەکێش کۆڵە جە دادگاییکەردەکەی و کۆمەڵکوشیەکەی بدانێ. ئانەیچە فاشارێوی فەرەش وستەبێ هەم سەرو حکومەتی فەڕەنسی و دەزگا دادگەریەکەیش هەم ڕژێمە کۆنەپارێز و فاشیست و دژە کوردەکەو ئەردۆغانی.
پەی وێ دەربازکەردەی جە ئا فاشارەیە، جە مانگەو 4و ساڵەو  2015یەنە بە ڕانمونی حکومەتی فەڕەنسی دادگا بڕیارشدا دۆسیەکە بوزیۆرە و جە 13و ئابو هەمان ساڵیەنە ئا بڕیارە کیانیا پەی دادگاو سزا قورسەکانو پاریسی. 
سه‌ره‌تا دادگاکە بریارشدا کە جە 5 و16 ی کانوونو دوه‌مو ساڵەو 2016یەنە ئەرەنیشتەو دادگای ئەنجام بدریۆنەوە. بەڵام چیرو فشارەکانە ئانە هەرگیز ڕووەش نەدا و جە 24 حوزەیرانیەنە بەرکەوت کە دۆسیەکە پەی 23 کانوونو ساڵەو 2017 دما وزیانەوە.

"پەی وێ دەربازکەردەی جە کۆمەڵکوشیەکەی و بە یەکجاری ئەرەوستەی دۆسیەکەی عومەر گونەی-شان کوشت"

دماوستەی دۆسیەکەی مشتومڕ و گفتوگۆ و توڕەیی فرەش شۆنیەرە ئاوما و هەم خانەوادێ و پارێزەرێ قوربانیەکان و هەم کورد و دۆستەکێش بە چالاکیێ جۆراوجۆرێ ناڕەزایەتیشان نیشانەدا و فاشاری زیاتەرشان وست سەرو حکومەتی فەڕەنسی و دادگەریەکەیش تا ڕاستیەکەی ئاشکرا بکەرۆن. ئی جارە فشارەکێ فرە قورسێ بێنێ و ئاستەم کریێ دادگا و حکومەتی فەڕەنسی نادیدێشان بگێرانی. پەوکەی پەی ئانەیە ڕاستیەکە ئاشکرا نەبۆنە، پەنا بریا بە کوشتەی عومەر گونەی. جە ئا چوارچێوەنە کوتوپڕ واچیا، گوایا گونەی نەوەشەن و تۆماری سەرەتانی ئینا سەرەشەنە و بە ئا هۆکارە جە 17و کانوونو یه‌که‌مو 2017یەنە جە زیندانەنە گیانش جەدەستدان یان مەردەن.
ئیتر جە دمای ئانەیە دادگا بڕیارش دا بە ئەرەوستەی یەکجاری دۆسیەکەی، بە ئا بەهانە کە گونەی تاوانباری سەرەکییەن و مەردەن و قانون ڕا بە بەردەوامی دادگایی کەردەکەی نمەدۆنە.

"پەی چێشی دۆسیەکەی وزیارە و ئەگەر ئاشکرا بکریێ چێش ڕووە دێنە"

ئیتر دۆسیەو تیرۆرکەردەی ژەنە پێشەنگەو جمیەرو ئازادی کوردستانی و یوە جە ئەرەمەزنەرانو پەکەکە-ی (ساکینە جانسز ئەشناسیێ بە سارا) و هەر دووێ ژەنە کۆشەرێ (فیدان دۆغان ئەشناسیێ بە رۆژبین) ئەندامەو کۆنگرەی نەتەوەیی کوردستانی- کەنەکە و (لەیلا شایلەمەز ئەشناسیێ بە رۆناهی) ئەندامەو ڕێکوزیاو گەنجانو کوردی جە ئەرووپا، بی بە 26مین دۆسیەو تیرۆری سیاسی جە فەڕەنسانە کە بەبێ ئاشکرا کەردەی تاوانبارەکان و سزای دایشان، نا قانونیانە و نائەخلاقیانە بوزیۆرە. چونکە جە فەرەنسا تا ئیسە 25 تاوانێ تەرێ سیاسیێ ڕووەشان دێنە کە تا ئارۆچ هیچکامشان ڕۆشنێ نەکریێنوە و کەس سەرشان دەستگیر نەکریان و سزا نەدریان و سەرجەمشان دەوڵەت و حکومەتی فەڕەنسی پەردەپۆشێ کەردێنێ. 
چونکە ئەگەر تا تیرۆرە سیاسیێ ئاشکرێ بکرینێ، ئاوەختە وەڵێ گردیەنە ئەردۆغان و چەندین کاربەدەستێ باڵێ ڕژێمەکەیش و چەندین کاربەدستی فەرەنسیێ و تەنانەت ئەورووپێێ و وڵاتێ تەرێ جیهانێ ئەشیەی پەلکێشیێ دادگایی بکریێنێ و سزای قورس بدریێنی. هامکات چەندێن سکەنداڵی گەورێ دەستگاکێ هەواڵگری و سیخوڕی ئا وڵاتا و ڕێککەوتێ و پەیمانێ چێر بەچێرێ بەرژەوەندیوازێ کە حکومەتەکی سەرو حسابو گەلو کوردی و گەلە بندەستەکێ تەرێ ئیمزێشان کەردێنێ، ئاشکرێ ببیێنێ و ئەشیەی دادگای گەورەی میاندەوڵەتی پەی دەستگیرکەردەی و سزادایشان ڕێکوزیابێ.

"سەبارەت بە کۆمەڵکوشی پاریسی بەڵگێ تازێ ئاشکراێ بیێ"

سەرڕەاو ئانەیە کە هەم ڕژێمە فاشیستەکەو تورکیای و هەم دەوڵەتو فەڕەنسای تەنانەت هێزگەلێوی ئەورووپیێ و میاندەوتیێ هەوڵ و تەقەلاشان پەی پەردەپۆش پەردەکەی کۆمەڵکوشی پاریسی و بە یەکجاری ئەرەوستەی دۆسیەکەی بەگەڕ وستەبێ، بەڵام هەم گەل و هەم جمیەرو ئازادی کوردی ئانەشان قبوڵ نەکەرد و جە چوارچوەو خاوەنداری کەردەی جە دۆسیەکەی جە ئاستێ جیاوازێ سیاسی، دبلۆماسی، قانونی و حقوقی و مەدەنییەنە کارا کۆشیێ و ئا کۆششە جە ئاکاتەوە تا بە ئارۆ بەدەوامەن.  تەنانەت خاوەنداریەکە بواری سەربازی یان گەریلایەتییچش گێرتەوە و جە ئی چواچوەنە جە مانگەو ئابو ساڵە 2017 گەریلاکێ هێزەکێ پارێزنانی گەلی- هەپەگە ئۆپەراسیۆنی تایبەتشان ئەنجامدا.
ئۆپەراسیۆنەکە کە بەنامێ 'تۆڵەئەسانی ساکینە جانسزێ' جە ناوچەو دوکانی سەر بە پارێزگاو سلێمانیێ جە پانیشتو کوردستانی ئەنجام دریا و دەستگیرکەردەی دووێ گەورە کاربەدەستێ دەستگاو سیخوڕی و هەواڵگری میتی و دەوڵەتو تورکیایش ونە کەوتەوە. دەستگیرکەردەکە چەنی وێش بەڵگێ تازێش سەبارەت بە کۆمەڵکوشی پاریسی وستێ ڕووە کە بە ڕەهایی سەلەمنێنێش ڕژێمە دژە کورد و مرۆڤایەتیەکەو ئەردۆغانی ئەنجامدرەش بییەن.
جە ئۆپەراسیۆنەکەنە دووە گەورە کاربەدەستەکێ دەستگاو سیخوڕی و هەواڵگری میتی و دەوڵەتو تورکیای بەنامەکێ ' ئەرهان پەکچەتین و ئایدن گونەل'ی جە ونەپەرسایەکانە چەنیشان دزانشان نیا بێ بە بەشداری بییەی میتی تورکی  جە کۆمەڵکۆشی پاریسیەنە کە ئا بەشدارییە سات بە سات بە فەرمان و ئاگاداری هاکان فیدان سەرۆکو میتی و ئەردۆغانی بییەن.

"ئەردۆغان سات بە سات سەرپەرشتی ئەنجامدای کۆمەڵکوشی پاریسیش کەردەن"

گەورە سیخوڕ و کاربەدەست 'ئەرهان پەکچەتین' ئاشکراش کەردەبێ: "کۆمەڵکوشی پاریسی و شەهیدکەردەی 'ساکینە جاسزێ' سەرۆکو ژوورو چالاکی پارچەکەردەی نەتەوەیی، ئوغوور کان ئایک و ڕاوەبەرو لقو ئۆپەراسیۆنەکان، 'ئۆغوز یورەک' و ئەندام جە ژوور ئۆپەراسیۆنەکان، 'ئایهان ئۆرەن' سەرپەرشتی کرایان و ئەنجام دریان و سات بە سات ئەردۆغان و هاکان فیدان، سەرۆکو میتی جە بابەتەکەی ئاگادارێ بیێنێ".

هەرپاسە ئاشکرا کریابێ کە جە دووێ تەرێ جە گەورە کاربەدەستەکانو میتی و دەوڵەتو تورکی بەنامەکێ 'سەلاحەدین ئاساڵ' و  'موحەمەد دەروێشئۆغڵو' کە هەردووێ هاموەخت ساڵەو 2013ی ئەندامێ کیاستە "شاند"و ئیمرالی بێنێ، کارا جە ئەرەمتەی و ئەنجامدای کۆمەڵکوشی پاریسیەنە بەشدارێ بینێ. 
یانی ئا کاتەنە هەم جە ئیمرالی چەنی ڕابەر 'عەبدوڵا ئۆجالان'ی دیدارشان ئەنجامدان و هاوەخت بە شێوازێوی نائەخلاقانە و دوور سەرجەم پیمانە ئەخلاقییە سیاسی و دبلۆاسییەکان پیلانە کۆمەڵکوشش پاریسیشان متەنەرە و سیاسەتی دوو ڕووانەشان چەنی ڕابەر ئۆجالانی و جمیەرو ئازادی کوردی ڕاوەبەردەن و ڕاو گردینو تورکیایشان هۆرخەڵەتێنە. جە بنەڕەتەنە ئانە نیشانەش مدۆنە کە ڕژێم هیچ کات نییەتش پەی چارەسەری و ئاشتی نەبییەن.

هامکات'ئەرهان پەکچەتین' دزانش نیابێ پۆرە کە 'عومەری گونەی' کە ڕاستە ڕاست بە تاوانەکەی هۆرئێستەن، ئەندامو دەستگاو سیخوڕی و هەوڵگری میتی بییەن و میت و گونەی پەی ئەنجامدای تاوانەکەی چەنی میتی بەردەوام پێوەرە جە هەماهەنگییەنە بینێ و گونەی و میت سات بە سات زانیاریێشان فاڕێنێوە و دێنێ یەکتری. ئا کاتە کە تاوانەکەش ئەنجام دان، میت و دەوڵەت سەرجەم هێزشان پەی ئەڕفانایش و ڕزگارکەردەیش جە زیندانەنە وستەن گەڕ.

"کورد و ئازادیوازێ سورێنێ جە حساب پەرسای"

ئارۆچ سەرەڕاو ئانەی کە کۆمەڵکوشی پاریسی و تیرۆرکەردەی پێشەنگە کۆشای ئازادی و یوەجە ئەرەمەرزنەرەکانو پەکەکە-ی (ساکینە جانسز-ە ئەشناسیێ بە سارا) و هەر دووێ ژەنە کۆشەرێ (فیدان دۆغان ئەشناسیێ بە رۆژبین)-ە و (لەیلا شایلەمەز ئەشناسیێ بە رۆناهی)-یە،  ٩ ساڵێش سەرەنە شییەن و ڕژێمەکێ تورکی و فەڕەنسای هەوڵ پەی سەرگێرتەی کۆمڵکوشیەی مڎانێ و گەرەکیچشانە ئانەی سەپنارە سەرو کوردی و ئازادیوازارە، بەڵام بە پێشەنگی بنەماڵێ هەر یەرە ژەنە شەهیدەکان و جمیەرو ئازادی، هەم  گەلو کوردی و هەم ئازادیوازێ دنیای سورێنێ جە حساب پەرسای جە ئەنجامدەر و پەردەپۆشکەرێ کۆمڵکوشیەکەی. 
کورد و ئازادیوازێ بە درێژایی ٩ ساڵان کۆڵەشان جە دۆسییەکەی نەڎان و بە چالاکیێ، ناڕەزایەتییێ و کەمپەینێ جۆربەجۆرێ هەم جە کوردستان، هەم جە فەڕەنسا و ئەوروپا و ووڵاتێ تەرێ جیهانینە، وازیارێ دادپەروەریی و بە فەرمی ئاشکراکەردەی ئەنجامدەرێ و تاوانبارەکانێ کە بێگومان بە پاو بەڵگێ و پەیجۆرەکان، ئەردوغان و ڕژێمەکەشەنە.