قەزیەو کۆبانێ بە وەرگیری سیاسەڎمەدارەو کوردی گوڵتان کشاناکۍ بەردەوام بۍ.

کشاناکە ئەرەیاۋناش من و هەڤاڵەکێم نەک هەر تاوانبارۍ نیەنمۍ، بەڵکم ساحیب قەزیەنمۍ ، دژوو ئانیشا مردمېوە کە دژایەتی مافەکا مرۆڤی و مافوو ژەنا کەرا.

کشاناکە ئاماژەش بە پرۆسەو ئاشتی و دەوروو ژەنا کەرد چا قۆناغێنە، وە کۊشیای هامبەشوو ژەنا پۍ یەکسانی جنسی، واتش: "بانگەشەو ئانەی کریۆ کە جە ساڵەو ٢٠١٢ ینە بەشداری چالاکییەکا پۍ ئازاڎیی بەڕێز ئۆجالانی و مانگېرتەی جە واردەیم کەردەن. جە تەلەفزیۆنۆ دیما نەک هەر ئێمە، دەوڵەتیچ قەناعەتش بە دەور و ئیراڎەو ئاشتیوازانەو ئۆجالانی ئارڎەن. ئەگەروو چارەسەری و ئاشتی هەن. بەڕێز ئۆجالان پی جۆرە دەوروو ۋێش گێڵنا. ئارۊیچ قسەکۍ بەڕێز ئۆجالانیم ویرەنە وەختۍ جە سوریانە لووا و واتش: "پۍ چارەسەری پرسەکەی ملوو پۍ ئەوروپای. من مرۆڤوو ئی خاکەینا. ئەرکوو من ئاشتییا، ئەگەر گەرەکتابۆ بەشداربوو، ئانە ئینانی چۍ ". چا وەختۆ پەی ئاشتی کۊشیۆ و قسۍ کەرۆ. دەوڵەتیچ ئینەی مزانۆ".

کشاناکە ئاماژەش پانەی کەرڎ ئیسەیچ پېسە ساڵەو ٢٠١٣ مانگرتەی جە واردەی پۍ کەردەیۆ بەرەو ئیمراڵی هەن، بەڵام ئا وەختەو و ئیساتێچ نزیکایەتیێوە ناتەندروس ۋەران ۋەر بە پرسەکەی هەن. دەوڵەت مزانۆ کە ڕابەروو گەلوو کوردی عەبدوڵا ئۆجالان متاوۆ ون مجیای مردنۆ و واتش: "پۍ مردنای ون مجیای بەرەو ئیمراڵی کەردېوە".

کشاناکە ئەرەیاۋناش مشۊم بزانیۆ کە کێ خەڵەتش کەردەن و چکۊنە خەڵەت کریان، با میت ئەرشیفەکا بەربارۆ و بەڵگەکا وزۊڕووە تا بزانیۆ جە ئیمراڵی و قەندیلەنە باسوو چێشی کریان و چێش وچیان؟ واتش: " پېسە ژەنێوە کە ژیۋای ۋێش بە وەنایۆ و نوویستەی و کۊشیای بەردەن سەر، ماچوو تا پرسوو کوردی جە تورکیانە چارەسەر نەکریۆ، پرسوو کوردی جە سوریا چارەسەر مەبۆ. متاومۍ سردەو ئاشتی وەشەکەرمۍ. وەختۍ ئیمپریالیستەکۍ وازشا جە کۆڵۆنیاڵیزمی کلاسیکی ئارڎ و ئی جوگرافیاشا جیائاست؛ پرسوو کوردیشا بەش کەرد تا پېسە دەرد و بەڵێوە چی جوگرافیانە مەنۊوە. ئەگەر تورکیا ئی پرسەیە چارەسەر کەرۆ، پرسەکۍ عێراق و سوریایچ چارەسەرۍ با. ۋەروو ئانەی چێگەنە پرسەکەی چارەسەر مەکەرمۍ، ئا یاگا پېسە هەڕەشێوە وینمۍ. پێویسا گرڎ کەسۍ چەم جە ئێمە کەرۆ ، پۍ ئانەی ئێمە چارەسەروو ئی پرسەیە کەرمۍ. بیمۍ بە وڵاتێوە نموونە جە ئاشتی نەک جە جەنگی. ئانەی ئی وڵاتیە ڕزگار کەرۆ ئاشتی و چارەسەرییا. ئا وەختەی ئینە چی وڵاتەنە ڕووەمڎۆ، بزاندۍ چنی پێگەو جیۆپۆلەتیکیش فاڕیۆ پۍ ئیسفاڎەی. ڕاکێما کریۊوە، ڕاکێما ئارامە بۆ".

وەرگیری کشاناکۍ سەوای سەعات ١٠:٠٠ بەردەوامیش بۆ.