کورڎاو ڕووسیای کوشتەی ڕۆنامەنوویساشا شەرمەزار کەرڎ
کورڎاو ڕووسیای ئەرەیاۋناشا کە جە ئاکامو هامکاریییەکا پەدەکەینە، دەوڵەتو تورکی ٢ ڕۆنامەنویسێش جە سلێمانینە تیرۆرۍ کەردۍ، هامکات ئەرەگیری و خیانەتشا شەرمەزار کەرڎ.
رێکوزیا کورڎییەکۍ ڕووسیانە بە بەیاننامێوە هامبەش هرووژمەکەو دەوڵەتو تورکی ئەرەگیریشا پەی سەرو قەزاو سەیسایەق و سەر بە شارو سلێمانی شەرمەزار کەرڎ کە جە ئاکامەنە بی بە مەڵامەتوو گەشمەرڎەبیەی ٢ڕۆنامەنویسا کورڎی بەنامەکا گوڵستان تارۍ و هێرۆ بەهادینی.
جە بەیاننامەکەنە سەرەوەشی جە کەسوکارو ئا دووە گەشمەرڎەیە و گەلوو کورڎی کریا و هامکات هامکارییەکۍ پەدەکەی و بنەیانەو بارزانی چنی دەوڵەتو ئەرەگیرو تورکی بە تنی شەرمەزار کریۍ.
جە ئەرەیاۋناکەینە ئامان، "جە ئاکاموو خیانەت و هامکارییەکا پەدەکەینە، دەوڵەتو فاشیستی تورکی لوان دلۍ خاکو هەرێموو کورڎەسانی و بە شێوێوە وەحشیانە هرووژم مکەرۆ سەرو کوردا، شۆڕشگێڵنا و سیاسەتمەدارا، چالاکا و ڕۆنامەنوویسا. هرووژمی دماین پەی سەرو خاکو هەرێموو کورڎەسانی جە ٢٣ۍ ئابینە دژوو ڕۆنامەنوویسا کورڎی ئەنجامدریا. هرووژمەکە بە پەشتیوانی و هامکاری پەدەکەی ئەنجام دریا و جە ئاکامەنە ڕۆنامەنوویسا گوڵستان تارا و هێرۆ بەهادینە گەشمەرڎۍ بیۍ و ڕۆنامەنووسێوە ئازاڎیچ زامڎاربی."
جە بەیاننامەکەنە، بە نامۍ کوردا ڕووسیایۆ داوا جە پەدەکەی و بنەیانەو بارزانی کریا، واز جە خیانەتی و هامکارییەکاشا چنی دژمنوو گەلوو کورڎەسانی بارا.
