ئارۊ دووەشەممە ١٨/١٢/٢٠٢٣، سەعات ٧ بەیانییوە ناوەندەکاو دەنگدای ڕووەو دەنگدەرارە پەی ورچنیەى گردینوو ئەنجوومەنوو پارێزگاکاو عێراقیرە کریێوە و خەڵکوو شاروو کەرکوکوو پانیشتوو کوردستانی بە پۊشتەی جلە ڕەنگاوڕەنگە ڕەسەنە کوردییاوە بەرەو بنکەکاو دەنگدا لوۍ و جۊشو خرۊشێوە فرە بەینوو هاموەڵاتە کوردانە بۍ پەی ئی ورچنییەیە تا پەنەش بتاوا پارێزگاری سەپییاو شارەکەی فاڕا.  

یاگۍ ئاماژەینە، دماو ١٨ ساڵا و پەی یوەم جاری ورچنییەی ئەنجوومەنوو پارێزگاو کەرکوکی کریۊ،  شاروو کەرکوکینە یەک ملوێنو ١٥٣٠٠ کەسۍ مافوو دەنگدایشا هەن، وەلۍ ٨٦٨ هەزارۍ و ٩٠١ کەسۍ کارتی بایۊمەترییشا هەن و متاوا دەنگ بدا.

عومەرە درێژی هونەرمەندوو مەقامواچی ئشناسیاو پانیشتوو کوردستانی و شاروو کەرکوکی، ورچنییەیەکەینە بەشدار بۍ و پەی ئاژانسوو هەواڵوو فورات (ANF)ی واتش: "ئاندە ماچوو' هەی کوردا هەی گەورا با دەس وزمۍ دەسوو یۊترینی' بژیوۊ کەرکوک بژیوۊ کوردوو کەرکووکی و گرد کوردێوە دڵسۊز، هومێدەوارنا تەماموو کوردا بەیا سەروو سندوقەکاو دەنگدای و دەنگ بدا پێسە چەنی پی عومرەوە ئامانا، هەن عومرش ١١١ساڵێن ئامان دەنگدای پەنەوازا گەنجەکێچ بەیا دەنگ بدا و نەمردا چونکوم ئارۊ ڕوێوە چارەنویسسازا پەی ئێمە".

لێوە تەرۊ  مەلا بەهادین کەسایەتیی دیاروو شاروو کەرکووکین، کە پیرتەرین دەنگدەروو کوردین و ١١١ ساڵێن، ئارۊ دەنگدای گردینەنە دەنگش دا و وەختوو چەمپەنەکەوتەینە چەنی ئاژانسوو هەواڵوو فوراتی مەلا بەهادین شیعرەو (کوردم ئەمن)وو هێمن موکریانی شاعیری گەورەوە کوردیش واناوە و جە ڕاو ئاژانسوو هەواڵوو فورات (ANF)یوە داواش وەنەو گردوو کوردا کەردە، کە بەشداریی ورچنییەی کەرا و واتیچش "شەرما کە خەڵک نەیا بەشدارۍ ورچنیەی با، شەرما پەی حەرکوردێوە، کە ئارۊ دەنگ نەدۊ".

بەهار ڕەشیدە مامۊسێوە شاروو کەرکووکینە و سەبارەت بە گرنگیی بەشداریی کوردا چی ورچنییەینە پەی ئاژانسوو هەواڵوو فورات (ANF)ی واتش: "ئی ورچنییەیە پەی شاروو کەرکووکی تایبەتمەندیی وێش هەنش چونکوم ئەوەڵ جارا شاروو کەرکووکینە ئی ورچنییەیە کریۊ، پەوکای داواکارەنا جە گرد کوردێوە بەشەرەفی گردوو چینەکانە بلا سەروو سندوقوو دەنگدای و دەنگ بدا بە کوردی، گرنگ نییا دەنگ بە چە حزبێوە مدەیمۍ گرنگ ئانەن، کە دەنگ بە کوردی بدەیمۍ تا کورد چی شارەنە سەرکەوتە بۊ ".

واتیچش: "تا جارێوە تەر پرۊسەی بەدناموو ئەنفالی و کیمیاوارانوو وەڵاتەکەیما نەکریۊ، تا جارێوە تەر گەنجاو کوردی نەلا وەردەموو قەنارەی و تاتێما مازیشا نەمەڕیۊ و ئەدۍ جگەرشا نەسۊچۊ و ژەنی و کناچۍ کوردی سیاوپۊشۍ نەبا، لوودۍ دەنگدای و دەنگ دەیدۍ بە کوردی".

کوردستان ئازادە ژەنێوە تەرەو شاروو کەرکووکینە، کە ساعیبپەنەوازەی تایبەتە بۍ و تواناو لوایش نەبێ، وەلی ئینە نەبییەبۍ بە وەربەسوو ئامایش پەی دەنگدای پەی سەروستەی کوردی شارەکەنە، کوردستانە پەیامێوەش ئاڕاستەو کورداو شارەکەی کەرد و واتش: "داواکارەنا گردوو چینەکا و عومرە جیاوازەکا بە مۊڕاڵۊ بلا دەنگ بدا و پەنجێشا مۊرەکەرا پێسە شانازیی کوردایەتی ".

یاگۍ باسینە، پەی ورچنییەیى گردینوو ئەنجوومەنوو پارێزگاکاو عێراقی زیاتەر جە ١٥ ملوێن کەسا مافوو دەنگدایشا هەن پەی دیاریکەردەى ٢٨٥ ئەنداماو ئەنجوومەنوو پارێزگاکا دلۍ نزیکەو شش هەزار نوێنەرانە.