کۆنسەو کوردوو سویسرای (جەدەکە-سە) و تەڤگەروو ژەناو سویسرای (یەژەکە-سە)، داواشا جە گرد لێوە کەردە و بەتایبەت کوردستانیێ بەرەو پاریس گنا ڕا. هامسەرۆکەو جەدەکە-سەی، سەلما سورەرە واتش، چا شارانە مەجلیسەکێ هەنێ پاسەکێ پەی فاڕایۆ بەشداربییا پەی پاریسی ئامادێ کریێنێ.

جە ئەرەیاونیای نویسریاو جەدەکە-سەی و یەژەکە-سەیەنە، گەشمەرداو کۆکوشییەکاو پاریسی یادێ کریێوە.

ئەرەیاونایەکە  ئەوەخوایش کەرۆوە، کۆکوشییەکێ دژوو تەڤگەری ئازادی و جە کەسێتیی ژەناو کوردینە شۆڕشوو ژەنان کریان ئامانج. وەرپرسی سەرەکییچ دەوڵەتوو تورکین، ماچۆ: "دڵنیێنمێ گەلوو کوردوو سویسرای و دۆسەکێشا بە پاگێرتەیرەوە بەشدارێ با جە  ڕاپیمای و کۆبییەیوەکانە.  پەی شەرمەزارکەردنەی هجوومە دڕندانەکاو پاریسی، پاس گردوو مەجلیسەکاو سەر بە جەدەکە-سەینە دابین کریۆ ".

سەلما بە ئاژانسەکەیماش وات، بەئامانجگێرتەی سەرمەشقاو شۆڕشی و ژەناو کوردی، نیشانێ تەرسەو دەوڵەتوو تورکینە جە ژەناو کوردی، واتش: "ئێمە بە پاگێرتەیرەوە ماچمێ، پاریس ئینا تاریکیینە، کوا دادپەروەری؟ پێسە ژەناو کوردی جە ڕاو کۆشیای وێماوە پاریسی ڕۆشن کەرمێوە. گەرەکمانە ٧ تا ٧٠ ساڵی و بەتایبەت ژەنی بەشدارێ ڕاپیمای و کۆبییەیوەکاو ٦ کانوونوو دووەموو پاریسی بانێ. چا شارانە مەجلیسوو ئێمەش چەنەن، جە ڕاو چند پاسێوە خەڵکی فاڕمێوە پەی پاریسی".

سەلما واتش، ٥ کانوونوو دووەمی شارەکاو ژنێڤ و لۆزان و بێڵ و بێرن و زوگ و لوزەرن و سۆلۆزەرن و ئاراو و زیوریخ و بازل و سانت گالن و وینتەرتور و ڕاپەرسویلوو سویسرایۆ بە پاس و سەیارەی تایبەت ڕووە کەرا پاریسی.