کوشتەی و زامڎاربیەی کۆڵبەرا ژمارېوە پێوانەیش تۆمار کەرد
بەپاو ئامارێوە ماوەو ١٣ ساڵا ۋیەردەینە دووۍ هەزارۍ و ٤٠٩ حاڵەتۍ کوشتەی و زامڎاربیەی کۆڵبەرا جە مەنتیقە سنوورییەکا ۋەرکەوتوو کوردسانینە تۆمارکریێنۍ، کە فرەتەرینشا ساڵەی ۋیەردێنە بیەن.
ماڵپەڕوو کۆڵبەر نیوزی وەڵاش کەردۆ، کە جە ماوەو ١٣ ساڵا ۋیەردەینە لاوکەمیۆ دووۍ هەزارۍ و ٤٠٩ کۆڵبەرۍ سەروو سنوورەکاوە بیېنۍ بە قوربانی و چا ژمارەیە ٦٨١ کەسېشا کوشیێنۍ و هەزار و ٧٢٨ کەسېچشا زامڎارۍ بیێنۍ.
بە پاو ئا ئامارۍ ساڵەی ۋیەردۍ (٢٧٢٣/١٤٠٢) لاوکەمیۆ ٤٤ کۆڵبەرۍ کوشیېنۍ و ٤٠٠ کۆڵبەرېچ زامڎارۍ بیېنۍ، پانەیچ چا شارەنە بەرزتەرین ژمارەو کوشیایا و زامڎاربیەی کۆڵبەرا تۆمارکریان.
ئینەیچ جە وەختېنە ساڵەی ۋییەردۍ کوشتەی و زامڎاربیەی ٢٣٤ کۆڵبەرا تۆمارکریابۍ.
پېسە رێکوزیاکا داکۆکیکاری جە مافەکاو مرۆڤی ئاماژەش پنەکەرا فرەیی ئا کۆڵبەرا بیېنۍ بە قوربانی، بە تەقەی راسەوخۆو هێزەکا دەوڵەتوو ئێرانی پېکیېنۍ.
بە مەڵامەتوو نەبیەی هەلوو کاری و رێژەو بەرزی بۍ هەرمانی حەرپاسە خراپی باروو گوزەرانی جە مەنتیقەکا ۋەرکەوتوو کوردسانی ژمارېوە فرە جە هامووڵاتیا ناچارۍ با پەی حاسڵکەردەی بژێویشا ڕووە بکەرا کۆڵبەری جە مەنتیقە سنوورییەکانە.
