کەژار سەبارەت بە مانگێرتەی وریشە مورادیۍ ئەرەیاۋنێوەش ئاراسەو ڕای گرڎی و ژەنا کۆششکاری کەرد: "سەرو بنەماو ڕۆحو ئەرەکۆشایما داوا جە هەڤاڵێما مکەرمۍ دمایی بە مانگێرتەکەیش بارۆنە پەی ئانەی کۆمیتەکێما بتاوا جە درێژەو مانگێرتەکەینە درێژە بە مانگێرتەی بڎا."
پەی ڕای گرڎی و ژەنا کۆششکاری
بە پاو ئا هەواڵا کە زیڼانو ئەوینیوە لاما یاۋێنۍ، هەمڕێما وریشە مورادیە (جوانا سنە) بەمەڵامەتو وەستەیرەی فرەو پەستانو ۋنێوە ئینا ئاژێوە فرە مەترسیڎارەنە و ئەگەری فرەش هەن هۆش جەدەس بڎۆ گنۆ حاڵەتو کۆمایۆ.
هەمڕێما وریشە مورادیە ئەندامەو گلێرگەو ژەنا ئازادی ۋەرکۆتوو کورڎەسانی (کەژار) جە مانگەو ئابو ٢٠٢٣ جە کورڎەسانەنە جە لایەنو هێزەکاو ڕژێمو ئێرانیوە باڵبەسە کریا و ماوەو چن مانگێوە ئەشکەنجەی جۆراوجۆری جەسەیی و دەروونیش سەرەرە سەپیا. دماتەر جە لایەنو دادوەر سەڵواتیۆ بە تۆمەتو "بەغی" خیانەتکەردەی تۆمەتبارە کریا و تا ئیساتێچەنە جە ئاژێوە نادیار و بێ قەرارەنە ڕاگیریێنە. هەرپاسە وریشە جە ئەرەنیشتەی دووەمو دادگاییکەردەکەینە پېسە ناڕەزایی بەربڕیەی ۋەرا ۋەر بە سەپنای سزاو جە قەنارەدای سەرو شەریفە محەممەدیۍ و پەخشان عەزیزیێرە ئاماڎۍ نەبیە. یاگۍ ئاماژەیا وریشە جە ١٠و تشرینو یووەم و ٢٠٢٤یوە کە هامکاتە چنی ڕۆو جەهانی دژ بە سزاو جە قەنارەدای جە دژو بەرکەردەی و جابەجێکەردەی سزاو جە قەنارەدای جە ئێرانەنە، دەسش بە مانگێرتەی کەردەن. مانگێرتەی ئازایانەو وریشەی بیەن بە قۆناغێوە جە ئەرەکۆشای ژەنا کۆششکاری جە زینانەکانە و دەنگو مڎرامانی و ئازادیوازی یاوان گۆشو ئازادیوازا و بانگەوازو مڎرامانوو ژەناش یاۋنان بە چوار گۆشەو جەهانی.
ئێمە پېسە گلېرگەو ژەنا ئازادی ۋەرکۆتوو کورڎەسانی ( کەژار ) سەرەڕاو سڵامی شۆڕشگێڵنانەیما پەی هەڤاڵەی قارەمانە و سەرمەشقێما، بە هەست و ئەرکی ۋەرپرسیارانەو ۋێما جە ۋەرا ۋەرو ئی ئاژەینە، سەرو بنەماو ڕۆحو ئەرەکۆشایما داوا جە هەمڕێما مکەرمۍ دمایی بە مانگێرتەکەیش بارۆ پەی ئانەی کۆمیتەکێما بتاوا جە درێژەو مانگێرتەی جە واردەکەیشەنە درێژە بە مانگێرتەی بڎا. چی ڕوانگەیچۆ ئەرەیاۋنمێش کە جە سەوایۆ بە شێوێوە بازنەیی جە وڵاتە جیاجیاکاو ئۆروپایۆ پەی پەشتیوانی جە وریشە مورادیۍ و گرڎو زینانیا سیاسی و گرڎو ئا ئینسانا کە مەترسی جە قەنارەدایشا سەرا و ڕووبەڕوو کوشتەی بەزانا بیەی دۆڵەتی(جە قەنارەدای) بیێنێوە، مانگێرتەی جە واردەی پەی ماوەو یەرۍ ڕوا دەس پنەکەرمۍ. هەرپاسە داوا جە گرڎو ئازادیوازا مکەرمۍ بەردەوامۍ با جە پەشتیوانی و کۆششیشا جە پارێزنای و خاوەنداری جە وریشەی و گرڎو سەرمەشقەکا تەرو گلێرگەی جە زینانەکا کۆمارو ئیسلامی ئێرانینە.
مرۆڤایەتی و ئازادیوازی سەرکۆتۍ مېڎانەکا ئەرەکۆشاینۍ.
ژەنی، ژیۋای، ئازادی
گلێرگەو ژەنا ئازادی ۋەرکۆتوو کورڎەسانی (کەژار)
جومعە ٢٥/١٠/ ٢٠٢٤
