دەسەو ڕاوەبەریی کەژەکەی سەبارەت بە هجوومەکاو دەوڵەتوو تورکی ئەرەیاوناێوەش وەڵا کەرڎۊ.

 کەژەکە ئەرەیاوناش، "دەوڵەتوو تورکی فاشیستی و ئینسانکوشی هەڵای ڕوخساری دڕندەانە و شکسوارڎەش دژوو خەڵکوو وەرنیشت و  سەرنیشت- وەرکەوتوو سوریای نیشانە مدۊ. بە هەوڵدای پەی دماییئارڎەی بە ژیوای گەلەکەیما، هەوڵۍ کۊچبەرکەرڎەی، پەنابەرکەرڎەی و فاڕای دیمۊگرافیای بە ڕۊشنی مدۊ، سیاسەتە دوژمنکارییەکێش بە ڕۊشنی وەراوەروو کورڎی نیشانە دێنۍ، ئاوی و کارەبا و گەنمۍ، کە پێویسیی سەرەتایۍ ڕوانەو ژیوای ئینسانینۍ بەئامانج  گێرا، بۊرڎومانوو چێرخانە سەرەکییەکاو ژیوای گلێرگەی کەرا و جەهەرمانەشا وزا. ئێمە گرڎوو ئا گەشمەرڎا جە هجوومەکانە مەرڎێنی یاد کەرمێوە، وەعد مدەیمۍ بە کۊشیایما هاگاداریی جە کۊشیایشا کەرمۍ و بیاونمێش سەرکەوتەی. حەرپاسە پەرسە و سەرەوەشیما ئاڕاستەو بنەیانەکاشا و گەلەکەیما کەرمێ".

ئەرەیاونییاو دەسەو ڕاوەبەریی کەژەکەی پێسە درێژەش هەن:

"وەرەچەماو گرڎوو دنیێوە دەوڵەتوو تورکی بە ڕۊشنی وەرنیشتنە تاوانوو جەنگی کەرۊ، جیهان چەمێش حاسوو ئینەینە قووجنێنی. زلهێزە ئیمپریالیست و هەژموونوازەکۍ و دەوڵەت-نەتەوە ستاتۊپارێزنەکاو مەنتێقەکەی پەی بەرژەوەندییەکاشا، بێدەنگۍ و بێهەڵوێستێنی، هەمان وەختنە پەشتگیرییشا کەرا. ئێمەی ژەنی و گەل خاس ئی ڕاسییە مزانمۍ و هاگادارێنمۍ، وەلۍ دەوروبەرما، ڕێکوزیۍ و ئا هێزۍ، کە وێشا بە چەپ و سۊسیالیست و لایەنگیروو ستەموەنەکریایا مشناسا بانگەشەو ئانەیە کەرا کە پەیش کۊشیا بێدەنگۍ و بێهەڵوێستۍ بێنۍ، ئینەیچە یاگۍ شەرمەزارینە و قبوڵکریا نییا، جگە چانەیچە بێدەنگیی بەشێوە چا حزب و لایەنە کورڎییا بەتایبەتی پانیشتوو کورڎستانینە، دروس نییا،  کە بە تەرسی یا وێپارێزنییوە خۊپارێزنییەوە پێناسە کریۊ، یا پا شێوە نزیکۍ باوە دیسان قبووڵ مەکرییۊ، ڕەوشێوەن دوژمن کورڎش وستەن دلێشۊ، پەی بڕێوە گێرا تەرسی یان وێپارێزنی بۊ، وەلۍ ڕۊشنا پەی بڕێوە تەری کۊیلایەتی و خیانەتا.

دەوڵەتوو تورکی فاشیستی بەئەقڵیەتوو دلێنەبەرڎەی و سڕیەیۊوە هجووم کەرۊ و تاوانوو جەنگی کەرۊ، زارۊڵۍ و  ژەنی و ٦٥ ساڵۍ کوشۊ، پیسە جمیەروو ئازادیی ژەناو کورڎستانی نەک حەر ئا هجووما شەرمەزار  کەرمۍ، بەڵکوم هەمان وەختەنە حەریاگێوە، کە گەل و ژەناو ئێمدەش جەن مژیوا کەرمێش بە مەیدانوو مدرامانی و کٶشیای دژوو ئی هێزە فاشیستەیە. جارێوە تەر ئەرەیاونمێش، کە سەروو کوشتەی گەلوو کورڎی و وێرانکەرڎەی ژیوگەیما بەدڵنیاییوە هەقەشا چەنە کەرمێوە.  

 پێسە هەڤرین خەلەفی و فرەو نموونای تەری، کە وەرنیشتەنە موینییۊ، دەوڵەتوو تورکی بە یاواینەی و ئەقڵوو داعشیوە، ژەنی کورڎی پێسە دەسکەوت و کەرەسەو جەنگی وینۊ و مامەڵەشا چەنی کەرۊ. پەی نموونەی وەختوو پڕۊسەو وێڕاوەبەرینە جەنازەو دا هامڕا ئەکین وانۍ و دەیان ژەناشا ڕووتۍ کەدێوە و بێحورمەتییشا پەنە کەرڎۍ. فرەو دیمەنە چانیشایچ مەیدانەکاو جەنگینە وینیێنۍ. هەمان دیمەنی جەنگوو باڵکانی و ئەرمینیای و ئازەربایجانی و حەماس و ئیسرائیلینە وینمۍ. جەنازەو ژەنە مەدەنییا و سەروازە کوشیایەکا ڕووتۍ کەراوە و بێحورمەتییشا پەنە کەرا، ئینە ڕێبازێوە پیس و دماکەوتانەن، کرڎەوێوەن ئەقڵییەتوو داعشی و فاشیزمینە هەن، گرنگ نییا کۍ بۊ و چە نامێوەش بۊ، ئی هجوومۍ دژوو ژەنا هجوومی فاشیستیۍ و پیاوسالارانێنیۍ و ئێمە شەرمەزارێشا کەرمۍ و داوا وەنەو گرڎوو ژەناکەرمۍ، وەراوەروو ئی کرڎەوە دژەئینسانانا و ئاوڕووبەرانا و قێزەونە پیاسالارانا، هەڵوێستی جیددییشا بۊ.  

ئاشکران کە هجووموو جینۊسایدوو دەوڵەتوو تورکی سەروو گەلەکەیما وەرنیشتنە درێژەو ئا پیلانێنە، کە ٩و تشرینوو یوەموو ١٩٩٨ دژوو ڕابەرایەتیما کریا. پێویسا گەلەکەما، ژەنی و گەنجێما حەربوارێوەنە کە  هەنۍ مەیدانی ڕەواو کوشیای و پارێزنای وینا و جواب بداوە. بێدەنگی و بێهەڵوێسی یانۍ بێدەنگی وەراوەروو جینۊسایدی و پیلانگێڵنینە.  ئەوەڵ سەرنیشت، پانیشت، وەرکەوت، وەرنیشیت و ئەورووپا، پێویسا گرڎ یاگێوەنە کۊشیا. هەرمانەو گرڎ وەڵاتپارێزنێوە و کورڎێوەن پا زوانەی کە زانۊش جواب بدۊوە. وەراوەروو سیاسەتیشاوە پێویسا ئێمە چالاکیی سیاسی، ئابووری و مەعنەوییما کەرمۍ، جوابی قەوەتشا دەیمێوە.

داوا وەنەو ژەنا و گەلە ستەموەنەکریایاو دنیۍ کەرمۍ، کە وەراوەروو ئی هجووم و جینۊسایدەینە هەڵوێستێوە قەوەت نیشانە بدا. بە هەڵوێست و چالاکییەکاشا چەنی شۊڕشوو ژەناو وەرنیشتی با و کۊشیا.

 سەرەتا داوا وەنەو هێزەکاو  ئەمریکای و هامپەیمانا کەرمۍ واز جە سیاسەتی و دووەڕوویی بارا، کە کورڎی پێسە ئامرازوو بەکارئارڎەی دژوو دەوڵەتوو تورکیای وینا، واز چا هەڵوێستاشا بارا و پەی بەرژەوەندییەکاشا کورڎی نەکەرا قوربانی. ئێمە ماچمۍ ئی هەڵوێستە قبوڵکریا نییا".