کەژەکە ئەرەیاۋناش: "چنی دەسپنەکەرڎەو ٤٦ەمین ساڵەو پەکەکەی پۍ ئازاڎیی جەستەیی ڕابەریما، پۍ ماڕای هجومە کۆکوشییەکا و بنیاڎنیای کوردسانی ئازاڎی، جە کوردسانی ئازاڎەنە خۆلقنای ژیۋایۍ ئازاڎی و ژەنی ئازاڎۍ، ئێمە جە گرڎ وەختۍ زیاتەر ئیراڎەما بەرزتەرا".
پەیامەکەو کەژەکەی کە بە بۆنەو ٤٥ ساڵەو ئەرەمەرزناو پەکەکەیۆ وەڵاش کەرڎۆ، پی جۊرەنە:
"ساڵیاڎوو ئەرەمەرزناو پارتیما پەکەکەی کە ڕۊو ژیۋایۆ ژەنا و گەلوو کوردین، سەرەتا جە ڕابەر ئاپۆی، جە کەسایەتی گەشمەرڎە حەقی و گەشمەرڎە سارۍ، جە گرڎوو گەشمەرڎە بە قیمەتەکاما کە پەی ژیۋایۍ ئازاڎی و کەرامەتداری گیانشا فیدا کەرڎەن، جە گەلەکەیما کە بیۍ بە بەشێوە جە پەکەکەی، دۆسەکاما و جە گرڎوو ژەنا مبارەک کەرمۍ".
ۋەروودەم و یاڎەوەری گەشمەرڎە قارەمانەکامانە کە جە گەشمەرڎە حەقی قەراریۆ دەسش پنەکەرڎ و ئا گەشمەرڎۍ کە جە تاریخوو ٤٥ ساڵەو کۆشیاینە گیانشا فیدا کەرد، بە ڕێز و منەتۆ سەرەما ۋەران ۋەرشانە منامنمېرە، وەعد مڎەیمۍ کە بە ڕۆحی سەرکۆتانەو پەکەکەی و بە ڕۆحی فیدایی گەشمەرڎا ئاخېزەکەیما سەروزمۍ.
پارتەکەما پەکەکە کە ٤٥ ساڵېن جە گرڎ بواڕێوەنە کۊشیای کەرۆ، چوار پارچەو کوردسانینە پۍ ئازاڎیی گەلەکەیما کۊشیایش کەرڎ، جە وەختێنە دەسش پنەکەرڎ کە دەوڵەتە ستەمکارەکۍ حیچ ئومێدێوەشا پۍ ژیوای جە چوار پارچەو کوردسانینە ناستەبێوە، بە قسۍ ۋېشا 'گەلوو کوردیشا وستەبۍ دلۍ قەبرێوە و بە کۆنکرېت سەرشا پۊشنانەرە'. پۊکەی پەکەکە پارتوو خۆلقنای هیوا و ئازاڎییا. پارتوو گەلوو کوردی، سۆسیالیست، دیموکرات، کرێکار، گەنجا، ژەنا و زارۊڵان. ئەرەمەرزناو پەکەکەی کە ڕابەر ئاپۆ ئینەی پېسە 'جە ئەڎابیەی دووەمی' پێناسە کەرۆ، تاریخوو کۊشیای ٤٥ ساڵەینە یاوایمېنە کە پۍ گرڎ کەسێوە داواو ژیۋایۍ بە کەرامەتی و ئازاڎی کەرۆ و ئی ڕووە ڕۊو جە ئەڎابیەیا. پارتەکەما دلۍ تەجرووبەی و دەسکۊتەکانە گۊرە بی، هەمیشە جە بواری ڕۆحی و جۆش و خرۆشیوە حەر جە سەرەتاوە بە گەنجی مەنۆ.
هەر پۊکەی ئارۊ جە گرڎ یاگۍ جەهانینە گرڎ کەسێوە جە ٧ ساڵ تا ٧٠ ساڵ بە دروشمەو 'پەکەکە گەلا، گەل ئیناچۍ' هاوار کەرۆ.
پەکەکە جە کوردسانەنە نەبی بە پارتېوە ئاسایی، بی بە شێوازێوە ژیوای و ڕۆحوو ئازاڎیی. ڕابەر ئاپۆ بە واتەی 'سەختتەرین هەرمانە جە جەهانەنە وەشکەرڎەی ئینسانېوە تازەیا ' دەسش بە ڕاپیمای ۋېش کەرڎ، گەلوو کوردی کە چێروو گۆشەگیری، ئەرەگیری و جە لێواروو دلېنە شیەینە بۍ، چنی پەکەکەی یاوا بە بەهاکا مرۆڤایەتی، بی بە ڕاو خۆلقنای ئینسانۍ تازەی، ژەنېوە تازۍ. پۊکەی پەکەکە نیشانۍ بەهاکا مرۆڤایەتی، ئازاڎیی، کەرامەت، ئەخلاق و ویژدانوو گلېرگەیا.
نەک هەر کوردسانەنە بەڵکم گرڎوو جەهانینە یاگۍ ژەنۍ دلۍ پارتەکانە تەنیا لایەنی جەستەیی بۍ، شۆڕش و شۆڕشگێڵنەکۍ هەمیشە پرسوو ژەناشا وستەن پرۆسەو دماو شۆڕشی. ڕابەر ئاپۆ درکش پانەی کەرڎ کە یاگۍ ژەنۍ دلۍ گلېرگەو کوردسانینە ئینا جنسی دووەمەنە، بە شێوېوە هەرە ڕادیکاڵ جە ۋەران ۋەروو ئینەینە هۊرئێست پەکەکەش کەرڎ بە مېڎانۍ کە ژەنی بتاوا دلېشەنە ۋېشا بیاونا پنە، کۊشیای کەرا و ژیۋایۍ ئازاڎ بنیاڎ بنیا. ۋەروو ئانەی کە پەکەکە ئانڎەی هینوو گەلوو کوردین، بە پارادایموو ئازاڎیی کە نیشانۍ واوەی جە ئەڎابیەیۊ ژەنەو کوردین، پا قسۍ کە ماچۆ 'ڕزگاری ژەنۍ ڕزگاری گلېرگەیا' کێشەو ژەناش کەرڎ بە کێشېوە سەرەکی کە مشۊم چارەسەر کریۊ. ئی کۊشیایە بە ڕەنجوو هەڤاڵە قارەمانەکاما، ساکینە جانسیزۍ کە یۆ جە کادرە سەرمەشقەکاو پەکەکەی بۍ دەسش پنەکەرڎ و بە هۊرسەنگنای پەکەکەی پارتوو ژەناو ڕابەر ئاپۆی یاوا بە هېزېوە فرە گۊرە. ژەناو کوردی کە چېروو ئەرەگیری و فیۆدالیزمینە خنیکیېبێنۍ، چنی ئەرەمەرزناو پەکەکەی ۋېشا ئشناسا، ئنڎەو کۊشیای ڕزگاری نەتەوەیی، گرینگیش بە کۊشیای ڕەگەزی دا: چنی پارتوو ژەنا، یەکەکاو پارېزنای ژەنا، سیستموو کۆنفیدڕاڵی ژەناو دیموکراتیکی و ژنۆلۆژی بی بە سەرچەمە پۍ گرڎوو ژەناو جەهانی.
ئی هێزەی کە جە لایەنوو پەکەکەیۆ خۆلقیان، چنی ئا گەریلایا کە ڕووبەروو هجومە هەرە سەختەکا باوە، حەرپاسە چنی ئا کۆشیایەی کە جە دما ئۆپەراسیۆنی شۆڕشگێڵنینە کەردشا، نیشانەشادا کە مەتاویۆ شکسشا پنەبۍ.
پارتەکەما کە دەوڵەتوو ئەرەگیروو فاشیستوو تورکی گرڎ ساڵێوە بانگەشەو ئانەی کەرۆ کە دلېشەنە بەرڎەن، بەپێچەوانۊ گرڎ ساڵېوە گۊرەتەر بۆ، جە سنوورەکاو کوردسانی و ۋەرکەوتوو میامینینە ۋیەرڎەن، یاوان بە ئاستېوی میان نەتەوەیی، پېسە دار چنارېوە ڕېخێش کېشتێنۍ دلۍ خاکی. چی ساڵانەکە ئێمە ٤٥ەمین ساڵیاڎوو پەکەکەی مبارەک کەرمۍ. دۆساو گەلوو کوردی و ژەناو جەهانی پۍ ئازاڎیی ڕابەر ئاپۆی دەسشا کەرڎەن بە هەنگامەو 'ئازاڎیی پۍ عەبدوڵڵا ئۆجالانی، چارەسەری سیاسی پۍ کێشەو کورد'ی. ئی هەنگامۍ ئانەی بەروزۆ کە پەکەکە و ڕابەرایەتی گەردوونیۍ بیېنۍ.
ڕابەر ئاپۆ ئیمراڵینە چنی خەتەو بێکۆتایی و نەدۆڕیای پەکەکەی، بە ئیمان و هومېڎۊ ئینا مدرامانېوە ناوازەنە. گەریلاکېما، گەلەکەما شۊنپاو ڕابەر ئاپۆی و گەشمەرڎە گەورەکاما گېرا و مدرامانېوە گۊرە خوڵقنا. ئێمەی ژەنا بە هێز و ئیراڎە و ئیمان و تەجروبەی تاریخی ٤٥ ساڵەو کۊشیای، جە گەشمەرڎە قارەمانەکاماوە، کۊشیای ۋېما سەروزمۍ.و ئازاڎیی ژەنۍ ئانڎەی تەر بەقوەت کەرمۍ. چنی سەرەتاو ساڵەو ٤٦و پەکەکەینە، ئێمە جە گرڎ وەختۍ زیاتەر ئیراڎەما پۍ ئازاڎیی جەستەیی سەرکردایەتیما، پۍ ماڕای هجومە قڕکارییەکا و بنیاڎنیاو کوردسانێوی ئازاڎی، وەشکەرڎەی ژیۋایۍ ئازاڎی و ژەنېوە ئازاڎی جە کوردسانی ئازاڎەنە.
بۊنەو ٤٥ ساڵەو ئەرەمەرزناو پارتیما پەکەکەی جارێوەتەر داوا جە گەلوو کوردی و دۆسا و ژەنا و گەنجا کەرمۍ کە ژیۋایۍ ئازاڎ و دیموکراتیک و یەکسان بنیاڎ بنیا، و بەشڎارۍ ڕیزەکاو پەکەکەی با، کە بەهاکاو ئازاڎیی و مرۆڤایەتی پارېزنۆ، خۆتان ۋنەکەرڎەیشا چنە کەرۆ و ملۆ وەڵېوە."
