کۆردیناسیۆنو کەژەکەی واتش دماو ورچنیەی چەتەکا دەسشا دا تاوانی ڕەگەزی و جەنگی تایبەت دژو ژەناو کوردی و ماچۆ: "پێویسا کوردسانیێ وێپارێزنای وەڵێ وزا، دژو هجوومو ڕێکوزیا و ئا کەسا ماددەی هۆشبەر و لەشورەشی و چەوسنایۆ ڕەگەزی پەرە پەنە مدانێ".
کۆردیناسیۆنو کۆمەڵەو ژەناو کورستانی (کەژەکە) پێوەس بە مدرامانو وێپارێزنای گەلو شەرناخی وەراوەرو هجوومی ڕەگەزی هیزی شەوێ دژو ژەنێوی کوردێ، ئەرەیاوناێوەش وەڵا کەردۆ، واتش: "وێپاریزنای گەلو شەرناخی دژو ئەندامو هێزی تایبەتو دەوڵەتو تورکی و هجوومی ڕەگەزی پەی سەرو ژەنێوی کوردێ، نیشانەش دایمێ مشۆم جەنگو شکۆی چەنی بکریۆ. ئا شۆڕشە دیموکراتیکەو گەلەکەیما ورچنیەینە نیشانەش دا و مدرامانو وێپارێزنای گەلو شەرناخی خەیلێ شکۆدارێنێ، سڵام چی مدرامانەیە مکەرمێ".
ئەرەیاونایەکەو کەژەکەی پەی ڕای گردینی دیموکراتیکی ئینەن:
"ئا هجووما ئەرەگیرکاریێ، کە حکومەتی فاشیستی ئاکەپە-مەهەپەی جە چوارچوەو پلانەو دلێنەبەردەی کۆشیای ئازادیی گەلەکەیما مکەرۆش، بە بەیاگەیاونای جەنگی تایبەتی گردو بوارەکاو سەروازی، سیاسی، جڤاکی و چاندیی مکریانێ. هەوڵێ مدۆ گەلو کوردی جە گردو بەها و ئامرازەکاو وێپارێزنای بێبەش بکەر، تا گەلو کوردی بێشناسنامە و بندەس مەنۆوە. پی جۆرە ڕژێمی قڕکەر گردو مەیدانەکانە پلانەو کودەتای و ئەرەگیرکاریی وێش بکەرۆ. ڕژێمی فاشیستی ئاکەپە-مەهەپەی دوژمنو گەلاو کوردستانین، ژەنی و گەنجێ شکۆدارێ کوردی بە وێپارێزنای و مدرامانی بێوێنە تارێخو جیهانینە و ئینسانیەتینە وێشا ئشناسنا، دلێنەبەردەی گەلو کوردی ئازادی و ئا ژیوایە ئازادە بە مدرامانی ٥٠ ساڵەی بەدەس ئامان، ئی ڕژێمە ڕاو چەتەکاو جەنگی تایبەتی و جمیەرە سۆسیال-چاندییەکاوە ماددەی هۆشبەر و لەشورەشی و سیخوڕی و بەتاڵکەردەیۆ چاند و کۆمەڵایەتییبییەی وەڵا مکەرۆوە، پێسەیچ ڕاسەوڕاس ژەنی و گەنجێ با بە ناوەندو بەئامانجگێرتەی ئی ڕژێمە فاشیستەیە.
تاوانو هجوومی ڕەگەزی مکریۆنە
ئا شۆڕشە دیموکراتیک و مدرامانە، کە تەڤگەرو ئازادیی ژەناو کوردی کوردستاننە و وەرکەوتو دلێڕاسەینە ڕاو فەلسەفەو "ژەنی، ژیوای، ئازادی"یوە پەرەشا پەنە دان، خەتەی ئازادەو ئی سەردەمەیە دیاری مکەرانێ. ژەناو کوردی و عەرەبی و تورکی و فارسی و ئەرمەنی و سریانی ئیتر بیینێ ساعیبو هێزو وێشا و چارەنویسو جیهانی دیاری مکەرانێ. پەوکای کەسێتیی ئاکەپە-مەهەپەینە، هێزەکاو دژە شۆڕشی و تاتەسالاری هەرێمەکەی دژو ژەناو کوردی و تەڤگەرو ئازادی، هامپەیمانییوی شاریاوە شێوازو داعشینە وزا وەڵێ. کوردستاننە سەدان هەزار سەروازێ و پۆلیسێ و جەردەوانێ و سیخوڕێ و کلکێشا و داعشێ، پێسەو هێزی گێچەڵکاری و تندوتیژی دژو ژەنا میاونا یاگێ و گەرەکشانە پێسە ڕا گێرا وەنەو چارەسەرو نەتەوەی دیموکراتیکی، کە سەرو بناغەو ئازادیی ژەنێ وەرکەوتی دلێڕاسیننە مکریۆ. هێزە دژە شۆڕش و میلیتاریستەکێ دژو گەلو کوردی وێشا ڕێک وستەن، ژیوای ژەنەو کوردی و تورکی و عەرەبی و فارسی بە سەروازی مکەرا، ئەنجامو ئینەیچنە تندوتیژیی سەرو ژەنا و هەژاری و کۆیلایەتی پەرە مسانۆنە. پی مانێ، هجوومو قڕکەردەی و هجوومی ڕەگەزی دژو ژەناو کوردی، ماناو قڕکەردەی و تندوتیژیین دژو ژەناو وەرکەوتو دلێڕاسەی.
سڵام جە مدرامانو وێپارێزنایی گەلە سەربەرزەکەیما مکەرمێ
تورکیا و کوردستاننە ورچنیەیێوی شۆڕشگێڵنانەی دیموکراتیک کریا و گەلەکەما بە سەرەوردایە شکۆمەندەکەیشا دژو قەیومەکا نموونەو وێپاریزنایێوی وەرەچەمیشا نیشانە دا. یۆ چا یاگا کە بە دڕندانەترین شێواز داگیر کریا، شەرناخ و گەلو قارەمانو بۆتانی بێنێ. ڕۆو ورچنیەینە ئیرادەو گەلو شەرناخی لاو ڕژێمو فاشیستو ئاکەپە – مەهەپەیۆ بە هەنگامێوی داگیرکارییە زەوت کریا. غەڵەتێوی گەورەن ئەگەر پاسە ویرێ بکەرمێوە، کە تەنیا ئیرادەو خەڵکو شەرناخی دەسش ملەرە گیریان. ئەگەر ئیرادەو گەلی حەر شۆنێونە لاو دەیان هەزار سەرواز و پۆلیساوە دەسش ملەرە بگێریۆ، ماناش ئانێنە ئیرادەو گردو وەڵاتی دەسش ملەرە گیریان. چێوە پیمەرو سەرکەوتەێوی دیموکراتیک ورچنیەیەکانە، گێڵنایوە ئیرادەی دەسملەرەگیریاو گەلو شەرناخین ڕاو کۆشیای گردو هێزە دیموکراتیک و ئۆزپۆزیسیۆنەکاوە.
دماو ماوێوی کەمی ورچنیەیەکانە، چەتەکاو تاوانی ڕەگەزی دژو ژەنا، دەسشا بە جەنگی تایبەت کەرد. دژو هجوومیوی ڕەگەزی پەی سەرو ژەنێوە کوردێ شەرناخنە، وێپارێزنای دژو هێزەکاو جەنگی تایبەتو دەوڵەتو تورکی نیشانە دا، مشۆم جەنگو شکۆی چەنی بکریۆ. ئا شۆڕشە دیموکراتیکەو گەلەکەیما ورچنیەیش نیشانە دا و مدرامانو وێپاریزنایی گەلو شەرناخی قەیرێو شکۆدارێنێ، سڵام چی مدرامانەیە مکەرمێ. تارێخ واوەی بەرش وست، حیچ هێز و دەوڵەتێو گەورەتەر نیا، چا گەلەیە کە بەراش ڕاوە و وێپاریزنایی وێشا مپارێزنا. دیسان سەلەمیاوە، گەلو کوردی بییەن ساعیبو ئیرادیوی نەبڕیا و حاشاورنەگێری، ئی ئیرادە و عارەزووەو ئازادییە حەرگیز نمەمردنیۆ.
نمەبۆ ڕا بدەیمێ دەس پەی شکۆیما بەرا
سەرو ئی بناغەیۆ بانگەواز وەنەو گردو گەلاو کوردستانی و ژەنا و جمیەرەکاو ژەنان و گەنجا مکەرمێ، گرد لایێ دژو سیاسەتو جەنگی تایبەتی، هامسای و هامڕای و زاڕۆی و هامڕایاشا هۆشیار بکەرانێوە، دەوروبەرو وێشا جە جەنگی تایبەتی بپارێزنا. ئینە جەنگو شەرەفین و نمەبۆ بازمێن دەس پەی شکۆیما بەرا. جمیەرەکاو ژەنا و ڕێکوزیا جەماوەرییە دیموکراتیکەکا، مشۆم بە گرد جۆرە هۆشیاری و پەروەردە و ڕێکوستەی و چالاکیێوی وێپاریزنای، دژو جەنگی تایبەت سەفەربەرێ با. پەنەوازا ئەرەمەرزیێ و کارمەنداو دەوڵەتو کۆڵۆنیاڵیستی جە ڕووەو جڤاکی و چاندییوە گۆشەگیرێ بکریا. پێویسا گرد هاموەڵاتێوی کوردی دژو گرووپەکاو ماددەی هۆشبەری و لەشورەشی و هجوومی ڕەگەزی پەی سەرو ژەنا و گەنجاو کوردی، ڕاستەوخۆ وێپاریزنای نیشانە بدانێ. پێویسا هیچ ژەنێوی کوردی هجومو سەرو شکۆیش قبووڵ نەکەرۆ و دەمودەس وێش بپارێزنۆ.
سەرو ئی بناغەیە بانگەواز وەنەو جمیەرەکاو ژەنا و گەلاو چوارپارچەو کوردستانینە و لایەنە دیموکراتیکەکاو تورکیای مکەرمێ، دژو هجوومی داگیرکاری سەرو گەلو شەرناخی بمرداوە و پێسەو ڕۆژەڤی سەرەکی کۆشیای دیموکراسی تورکیای بویناش. پی مانێ شەرناخ پێسەو ئامەد و ئێلح و موش و ڕحا و مێردین و ئیدر و ئیستەنبوڵ و ئەزمیر و مێرسینی. شەرناخ، وەرنیشت و پانیشت و وەرکەوتو کوردستانین. بەیدێ با شەرناخی بکەرمێ بە ناوەندو کۆشیای دیموکراتیکی و بۆتانی شکۆدارۆ مدرامانو ژەنا بەرزتەر بکەرمێوە.
